1Judiocunapica llulla profetacunami tiyarca. Chashnallatami, cangunapurapipash llullashpa yachachijcuna tiyanga. Paicuna pacalla pandata yachachishpa pandachijpimi, Apunchi Jesús quishpichij cajtapash “na crinichu” ninajunga. Paicunataca, ñapash ninan llaquicuna japishpami tucuchinga.
2Panda yachachishcacunata ashtacacuna catishpami, na llullashpa villajuj Shimita catinataca na alicachishpa, na ali shimicunata rimanajunga.
3Paicunaca, culquimandallami, llulla parlocunataca, imatapash jatujshna yachachinajunga. Paicunapaca, pundamandapacha ninanda llaquichi tucuna nishca cashcamandami, chingaita chingagrinapash ña pactamujun.
4Taita Diosca, angelcunatapash juchata rurashcamandaca na perdonashpami, ucu pachaman shitamushpa, llaquichina punllacaman, yana yana ucupi vichashpa charijun.
5Ñaupa punllacunapipash Taita Diosca na perdonarcachu. Cai pachapi, na alitalla ruraj gentecunata, ninan tamiahuan tucuchijushpaca, alitalla ruraj Noé runagutallami, canchispuracunandi quishpichirca.
6Shinallata Sodoma, Gomorra pueblocunapi causajcunatapash, Diosca ninanda llaquichishpami, uchufa tucungacaman rupachishpa tucuchishca. Chaitaca, cunanbi na manllashpa causajcunaman ricuchingapami, chashna rurashca.
7Ashtahuangarin, alitalla ruraj Lot runagutapashmi quishpichishca. Paica, na ali gentecuna millanayaita causanajujta ricushpami, ninanda llaquirishpa causajushca.
8(Alitalla ruraj Lot runaguca, chai gentecunapaj chaupipimi causajushca. Paicuna na alita rurashpa causanajujta ricushpa, uyashpami, paica ali causaiguta charishpa, punllandi ninanda llaquirijushca).
9Jatun Diosca, Paita yarishpa causajcunataca, ima na alipi urmanamandapash anchuchingami. Ashtahuangarin, na alitalla rurajcunataca, ninanda llaquichina punllapi llaquichi tucuchunmi, alichishca charijun.
10Dios mandajujtapash yangapi churashpa, quiquin munaitalla catishpa, na ali munaicunata rurashpa, millanayaita rurashpa causajcunataca ashtahuanmi llaquichinga. Paicunaca, ninanda jariyashpa, na cazushpami, mandana ushaita charijcunatapash, na manllashpa causanajun.
11Mandana ushaita charijcunataca, ashtahuan yali shinlli ushaita charij angelcunapash, Jatun Diospaj ñaupajpica, “llaquichi tucungapachami” nishpaca, na rimai ushanllu.
12Ashtahuangarin, chai yachachijcunaca, imatapash na yachaj animalcunashna cashpami, na ali shimicunatalla rimashpa causanajun. Paicunaca, japi tucushpa huañuna animalcunashna cashpami chingaita chingagringa.
13Na alitalla rurashpa causashcamandami, paicunaca na alitallata japinajunga. Paicunaca, punllandimi na ali munaicunata rurashpa, ninanda cushijunajun. Cangunahuan tandanajushpa micunajushpapash, paicunapaj pandarishcahuanmi cushijunajun. Chaita rurajcunaca, tinirishcashna mapayashcami causanajun.
14Paicunaca, huainayana munaihuanllami ricunajun. Na shaijushpami juchatalla rurashpa causanajun. Chairalla yachajujcunatapash, na alitara yachachishpami pandachinajun. Paicunapaj shungupipash, shujcuna charishcata munashpallami causanajun. Paicunaca, na alitalla rurashpa causaj gentecunapaj miraicunami.
15Ali causana ñandapash saquishpa, na aliman tigrashpami, Beor shuti runapaj churi Balaam runa na alita rurashcatara catishpa, chingashca purinajun. Balaam runaca, na alita rurashpa culquita japingapami ninanda munashca.
16Na alita rurangapa juizu illajshna rijujpimi, aparishpa purij burrupash, genteshna rimashpa, profeta, na alita rurangapa rijujtaca jarcashca.
17Chai yachachijcunaca, chaquishca pugyucunashnami. Fuyuta, ninan huaira maimambash apashcashnami. Paicunapaca, yana yana ucupi causaita causajgrinami, alichishcalla shuyajun.
18Paicunaca, imapapash na ali shimicunatallami jariyashpa parlanajun. Na ali causaimanda, ali causaiman llujshishca gentecunatami, na ali munaicunata yachachishpa pandachinajun.
19“Huatashcashna causajcunata cacharichishun” nishpapash, paicunallatami na alitalla rurashpa, gañanshna causanajun. Pipash mishai tucushpaca, paita mishajpaj gañanmi tucun.
20Ñucanchita mandaj Quishpichij Jesucristota rijsishca cashpami, cai pachapi mapayashcamandapash, ña anchurishca carca. Shina cashpapash, na alita ruranacunahuan mishai tucushpami, punda causashcatapash ashtahuan yali, cutin na alita rurangapa tigrashca.
21Paicunaca, alitapacha rurashpa causana ñanda na rijsishca cashpachari, ashtahuan ali canman carca. Mandashpa yachachishca, jucha illaj Shimita yachashca jahua, na alita rurangapa tigranallata cashpaca, na yachashpachari ashtahuan ali canman carca.
22Ashtahuangarin paicuna chashna tucujpimi, na llullashpa cashna yarichijuj shimica pactajun: “Alcuca, shungu tigrachishpapash cutin tigrashpa micunllami. Chairalla armashca cuchipash, cutin turupi shitarinllami”.
Who We AreWhat We EelieveWhat We Do
2025 by iamachristian.org,Inc All rights reserved.
