Psalms 52 - Quichua Imbabura 2016

Na ali gentecunaca yangallatami jariyanajun(1 Sam. 22:9-10)Ahimelec shuti runapaj huasiman David shamushcata, Edom llactamanda Doeg shuti runa, Saulman villashca jipa, candajcunata mandaj David rurashca Salmomi.

1Ninan ushaita charij runa,

¿imashpata jatun na alita rurashpara jariyangui?

Taita Diospaj ninan juyaica, na tucuringachu.

2Cambaj shimica, llaquipi churanatallami rimajun.

Navajata filu filuta rurashcashnami, cambaj shimihuanga llaquichijungui.

3Alita rurangapa randica, na alitarami rurashpa catijungui.

Na llullashpa rimana randica, llullatarami rimashpa catijungui. Selah

4Napash rimana shimicunatarami rimajungui,

umachijlla shimi cashpami, chashna rimajungui.

5Shinamandami Taita Diosca,

causaita causaicaman candaca tucuchinga.

Candaca ninanda llaquichishpami, cambaj huasimandaca anchuchinga.

Cai pachamandaca, sapimanda llujchijshnami candaca anchuchinga. Selah

6Alitalla rurajcunaca, chaita ricushpami manllarinajunga.

Cashna nishpami, paitaca asinajunga:

7“Cai runaca, Taita Dios shinllichijuchunga na munarcachu.

Pai ninanda charishcacunatalla yarishpami causajurca.

Chashna cashpami, na alitalla rurashpa causajurca” ninajungami.

8Ashtahuangarin ñucaca,

Taita Diospaj huasipica, verde olivo yurashnami cani.

Taita Dios ninanda juyajujtami, causaita causaicaman yarijuni.

9Chashna rurashcamandami, tucui causaipi Candaca alicachijushalla.

Cambajlla causajcunapaj ñaupajpi causanaca,

ali cashcamandami, Candalla shuyajusha.