1Ezequiel, canga Israel llactata mandajcunamandami ninanda llaquirishpa huacana cangui.
2“Cashna ningui: ‘¡Cambaj mamaca leonshna cashpami,
leongunapaj chaupipi causarca!
Huahua leongunapaj chaupipimi, huahuacunatapash viñachirca.
3Paipaj huahuacunamanda shujtallami ashtahuan ali viñachirca.
Paica, jatun león tucushpami,
shuj animalcunata huañuchi callarirca,
Shinallatami, runacunatapash huañuchi callarirca.
4Shuj llactacunapipash, pai imashna cajtami yacharca.
Shinamandami, paicunapaj tugllapi japishpa urmachirca.
Chai jipaca, cadenacunahuan huatashpami, Egipto llactaman aparca.
5Paipaj mamaca, unai huatacunatami shuyajurca.
Ña na tigramungachu yashpami, paipaj huahuacunamanda shujta japishpa,
león cachun chaipi churarca.
6Paica, jatun leongunapaj chaupipimi purijurca.
Paica jatun león tucushpami shuj animalcunata huañuchi callarirca.
Shinallata, runacunatapashmi huañuchi callarirca.
7Mandana huasicunaman yaicushpami shuhuarca.
Tucuilla pueblocunatapashmi tucuchirca.
Shinallata, cai alpapi tucui imalla tiyashcacunatapashmi tucuchirca.
Pai huacashcapash, shinllitapacha culun nijushcashnami uyarirca.
8Muyundi llactacunapi causajcunami llaquichingapa jatarirca.
Paita japingapami linllita shitanajurca.
Chashna japishpami paitaca, jatun utujupi churarca.
9Cadenacunahuan huatashpami, Babilonia llactata jatun mandajpajman apanajurca.
Israel llactapi tiyaj urcucunapi, pai huacashca ama uyarichunmi,
shinlli torrecunapi vichashpa saquinajurca.
10Cambaj mamaca, uva chagra chaupipi shuj uva yurashnami carca.
Paica, yacu manñapi tarpushcashnami carca.
Chashna cashpami, paica ninanda malquishpa fucurca.
11Paipaj malquicunaca, mandangapa charina caspicunami tucushca.
Chai uva chagra chaupipica tucuita yalishpami viñarca.
Chashna ninanda viñashpa malquicuna junda cajpimi, tucuicuna ricurca.
12Ashtahuangarin ninanda fiñarishpami, paitaca fitishpa alpapi shitarca.
Ninan rupai shamushpami, fucushcacunataca chaquichirca.
Paipaj shinlli malquicunapash faquirishpami, chaquirca.
Chashna chaquijpimi tucuilla rupachirca.
13Cunanga, jichushca alpapimi tarpushca.
Chaquishca, imapash illaj alpapimi tarpushca.
14Chai yurapaj malquimandallatami, nina llujshirca.
Shina llujshishpami, chaipi fucushca granocunatapash rupachirca.
Chashna rupashpami, mandangapa charijuna caspita rurangapa,
shuj malquillapash na saquirirca’ ningui” nihuarcami.
Cai shimicunaca, llaquirishpa huacashca shimicunami. Chashna llaquirishpa huacana shimicunami canga.
Who We AreWhat We EelieveWhat We Do
2025 by iamachristian.org,Inc All rights reserved.
