1Mandaj Diosmi ñucataca ricuriajun.
¿Imashpata ñucataca, alasyu animaltashna: “Urcupi pacajugri” nihuangui?
2Na ali gentecunaca arcota chutashcallami shuyanajun.
Arcopi flechatapash ña churashcallami charinajun.
Alitalla rurajcunata flechahuan pacalla huañuchingapami, chashna charinajun.
3Imatalla alita yarijushcata tucuchijpica,
alitalla ruraj runaca, ¿imatashi rurai ushanman?
4Mandaj Diosca, Paipajlla shicanyachishca huasipimi causajun.
Mandaj Diosca jahua pachapimi, pai mandashpa tiyarinataca charin.
Huañuna aichayuj runacuna imashna cajtaca, paipaj ñavihuanmi ricujun.
5Mandaj Diosca, alitalla ruraj runataca, imashna cajta ricuriajunmi.
Ashtahuangarin na alita ruraj runatapash, llaquichingapalla munaj runatapash, tucui shunguhuanmi na ricunayachin.
6Mandaj Diosca, na ali gentecunamanga, llaquicunatallami cachamunga.
Paicunataca, ninahuan, azufrehuan, ima tiyashcata tucuchij huairahuanmi llaquichinga.
7Mandaj Diosca, alitalla ruraj cashpami,
ali cashcatapacha ruranata juyan.
Paitaca, aligutalla ruraj runami ricui ushanga.
Who We AreWhat We EelieveWhat We Do
2025 by iamachristian.org,Inc All rights reserved.
