1Canman causaita cuj Diostaca, chairalla viñai cashpallatami yarina cangui. Narapash llaqui punllacuna chayamujpillatami, yarina cangui. Ña rucuyashpaca: “Cai causaipica, na cushijuita charinichu” nijunguiman.
2Indipash nara huashajujpillata, narapash tutayajpillata, lunapash, luzerocunapash nara ricurijpillata, tamia fuyupash nara shamujpillatami, Diostaca yarina cangui.
3Huasita ricuj shinlli runacunapash manllarishpami chujchunajunga. Juchu quirucunapash huaquinlla saquirijpimi, na micui ushanajunga. Ñavicunapash amsayashpami na ricui ushanajunga.
4Na micui ushajpimi, shimipash vicharinga. Alasyu animalcuna huacanajujpash na uyarijpimi, candashcacunapash na uyaringa.
5Vichai ritapash, ñangunapi puritapash na ushangachu. Uma ajchapash almendro sisascashnami yurajyanga. Langosta jurushnami na puri ushashpa aisarijungui. Micuna munaipash chingangami. Runaca, causai tucurishpa huañujpimi, llaquirishpa huacajcunalla muyunajunga.
6Culqui cadena nara fitirijpillata, curi plato nara faquirishpa ñuturijpillata, pugyuman chayanapi fundu nara faquirijpillata, allashca jatun utujumanda yacuta aisana cabiapash nara faquirishpa urmajpillatami, Diostaca yarina cangui.
7Runaca, alpamanda rurashca cashpami, alpamanllata tigranga. Causaita cuj samaipash, Taita Dios carashca cashpami, Diospajmanllata tigranga.
8Yachachij runaca, imapash yangallata cashcamandami, tucuimi yangallata nishpa villarca.
Runacuna, caita pactachina cashcamanda9Yachachij runaca, alipacha yachajushca cashpami, gentecunamanga ashtahuan yachachijurca. Paica, aliguta uyashpa imashna cajta ricunajuchunmi, yarichij shimicunataca, ashtacata quilcajurca.
10Yachachij runaca, alipacha shimicunahuan, na llullashpa rimashcatami quilcajurca.
11Aligutapacha yachajushca runacuna rimashca shimicunaca aujahuan tujsijshnami yarichin. Tandanajuicunapi yachachijcuna yachachishca shimicunaca, ali tacashca clavocunashnami. Chai shimicunataca, shujlla jatun Michijmi paicunaman curca.
12Ñuca huahualla, cai yuyaitaca canmanmi cuni. Cai shimicunata quilcanaca, na tucuringachu. Ninanda yachajunaca, ninandami shaijuchinga.
13Cai tucui yachachishca shimicunaca cashnami tucurin: Taita Diostami manllana cangui. Pai mandashcatapash pactachinami cangui. Runacunapaca, chaita ruranami tucuita yali ashtahuan ali.
14Taita Diosca, ñucanchi tucui imatalla ruranajushcataca ricuchingami. Imatapash pacalla rurashcacunandimi, ali cajpipash, na ali cajpipash ricuchinga.
Who We AreWhat We EelieveWhat We Do
2025 by iamachristian.org,Inc All rights reserved.
