ÉXODO 13 - Quichua Imbabura 2016

Punda huacharishcacunata, Diosman shicanyachishcamanda

1Mandaj Diosca, Moisestaca cashnami nirca:

2“Punda huacharishca jari huahuacunataca, Ñucapajlla cachunmi shicanyachina canguichi. Israelpuracunapi, punda huacharishca jari huahuapash, punda huacharishca jari animalpash Ñucapajmi canga” nircami.

3Shina nijpimi Moisesca, Israelcunataca cashna nijurca: “Egipto llactapi gañan causanajushcamanda llujshishca punllataca yarinami canguichi. Caimandaca, Mandaj Diosmi ninan ushaihuan llujchirca. Shinamandami, levadurahuan rurashca tandataca na micuna canguichi.

4Cunanga, Abib shuti quillapimi caimandaca llujshinajunguichi.

5Cananeo, heteo, amorreo, heveo, jebuseo gentecuna causanajuj llactamanmi, Mandaj Diosca chayachinga. Cambaj ñaupa taitacunamanmi, lechepash, balun mishquipash tiyaj llactata carashapachami nishpa juramenturca. Chaitaca, cai quillapimi cushijushpa yarina canguichi.

6Canchis punllacamanmi levadura illaj tandata micuna cangui. Canchis punllapica, Mandaj Diosta yarishpa cushijuna punllami canga.

7Canchis punllacamanmi levadura illaj tandata micuna canguichi. Ima micunatallapash, levadurahuan rurashcataca na micunachu canguichi. Tucui cambaj llactapica, ima levadurapash napacha tiyanachu.

8Chai punllami cambaj huahuacunamambash cashna nishpa villana cangui: ‘Mandaj Diosmi Egipto llactamanda llujchimurca. Chaita yarishpami cashna rurajuni.

9Cai ruranaca, cambaj maquipipash, cambaj frentepipash, shuj ricuchinata churashcashnami canga. Mandaj Dios mandashca shimicunata yarishpa rimanajuchunmi chashna canga. Mandaj Diospaj ninan ushaihuan Egiptomanda llujchishcamandami chashna canga.

10Shina cashcamanda, imashna rurachun mandashcataca, ima punlla, ima quilla rurana cashcashna, huatan huatan rurashpa pactachingui’ nishpa villangui.

11Shinallata Mandaj Diosca, canmambash, cambaj ñaupa taitacunamambash, cananeocuna causanajuj llactata carashapachami nishpa juramentushcashnami, chai llactaman chayachinga. Shina chayachijpica,

12punda huacharishca jari huahuacunataca, Mandaj Diosmanmi cuna cangui. Shinallata, punda huacharij tucuilla jari animalcunaca, Mandaj Diospajmi canga.

13Ashtahuangarin, punda huacharishca huahua burrupaj randica, shuj llamagutami cuna cangui. Chaita rurangapa na munashpaca, burrupaj cunga tullutami faquina cangui. Cambaj punda churipaj randipash shinallatami apamuna cangui.

14Jipa punllacunapi cambaj huahuacuna: ‘¿Imashpata chashna rurangui?’ nishpa tapujpica cashna ningui: ‘Mandaj Diosca, paipaj ninan ushaihuanmi, Egipto llactapi gañan causanajujpi llujchimurca.

15Ñucanchi llujshichun ama saquingapami, Faraonga shinlli shungu tucurca. Chaimandami Mandaj Diosca, Egipto llactapica, punda huacharishca jari huahuacunamanda callarishpa, punda huacharishca jari animalcunatapash huañuchirca. Chaimandami, punda huacharishca jari animalcunataca, Mandaj Diosman cushpa huañuchijuni. Shinallata, ñucapaj punda churipaj randimi cai llamagutaca cujuni.

16Cai ruranaca, cambaj maquipipash, cambaj frentepipash, shuj ricuchinata churashcashnami canga. Mandaj Diospaj ninan ushaita charij maquihuan, Egiptomanda llujchimushcamandami chashna canga’ ningui” nijurcami.

Fuyupash, ninapash ricurishpa pushajushcamanda

17Israelcunata, Faraón richun saquishca jipaca, Taita Diosca filisteocunapaj llactata yalishpa ashtahuan ñapash chayanalla cajpipash, chai ñandaca na pusharcachu. Taita Diosca: Macanajui tiyajta ricushpa, ama Egiptoman tigranata yarichun yashpami, chai ñandaca na pusharca.

18Ashtahuangarin Taita Diosca, Israelcunataca, Puca Cuchaman rina ñandami, chaquishca pambata muyuchishpa pusharca. Israelcunaca, Egiptomandaca macanajunacunahuan alichirishcallami vichai rinajurca.

19Moisesca, Josepaj tullucunatapashmi apajurca. Josemi, Israelcunataca cashna nishpa juramentuchishca carca: “Taita Diosca, cangunata ricuj shamungapachami. Shina shamujpica, ñuca tullucunatapash apashpa vichai ripanguichilla” nishcami carca.

20Israelcunaca, Sucot shuti pueblomanda llujshishpaca, chaquishca pambaman yaicunalla Etam shuti pambapimi, carpacunata shayachishpa tiyanajurca.

21Mandaj Diosca, paicunata ñaupashpami, punllapica pilarshnalla fuyuhuan pushashpa rijurca. Tutaca, pilarshnalla ninahuanmi, punchayachishpa pushajurca. Punllapash, tutapash rinajuchunmi chashnaca pushajurca.

22Israelcunapaj ñaupajmandaca, punllapi pilarshnalla fuyupash, tutapi pilarshnalla ninapash napacha anchurircachu.