DANIEL 3 - Quichua Imbabura 2016

Rupajuj hornomandami quishpichishca

1Jatun mandaj Nabucodonosor runaca, shuj jatun runaman rijchajtami, curihuan rurachun mandarca. Chaica, ishcai chunga canchis metro jatun, ishcai metro canchis chunga centímetro anchomi carca. Chaitaca, Babilonia marcapi tiyaj Dura shuti pambapimi shayachirca.

2Chai jipaca, jatun mandaj Nabucodonosor runaca, sátrapa cati mandajcunata, shuj mandajcunata, macanajuj runacunata mandajcunata, uyajcunata, culquita alichijcunata, ali yuyaita cujcunata, juezcunata, tucui marcacunapi mandajcunatami tandachimuchun mandarca. Paicunataca, runaman rijchajta rurachishcata tucuchishpa cushijuita rurangapami, chashna tandachirca.

3Chaipica satrapacuna, mandajcuna, macanajuj runacunata mandajcuna, uyajcuna, culquita alichijcuna, ali yuyaita cujcuna, juezcuna, tucui marcacunapi mandajcunapashmi tandanajurca. Paicunaca, Jatun mandaj Nabucodonosor runa chai runaman rijchajta rurachishpa tucuchishcata ricushpa cushijuita rurangapami, chaipi carca.

4Chaipi shayanajujpimi, shuj villaj runaca shinllita caparishpa, cashna nirca: “Tucui llactacunamanda, pueblocunamanda, shuj shuj rimaipi rimaj tucui gentecuna, cangunataca caitami mandajun.

5Cangunaca: ‘bocinata, gaitata, tamborilta, arpata, salteriota, zampoñata, tucui shuj taquinacuna uyarijpica, Jatun mandaj Nabucodonosor runa, curihuan runaman rijchajta rurachishcata cungurishpa ninanda alicachinguichi.

6Maijambash chaita alicachingapa na cungurishpaca, nina rupajuj hornopimi shitai tucunga’ nishpami mandajun” nircami.

7Shina nijpimi, bocinata, gaitata, tamborilta, arpata, salteriota, zampoñata, tucui shuj taquinacunata tucui gentecuna uyashpaca, cungurishpa alicachinajurca. Tucui llactacunamanda, pueblocunamanda, shuj shuj rimaipi rimaj tucui gentecunami, Jatun mandaj Nabucodonosor, curihuan rurashca runaman rijchajta rurachishcataca cungurishpa ninanda alicachinajurca.

8Chai punllacunapillatami, caldeopuramanda huaquingunaca, mandajpajman shamushpa, Judá llactamanda runacunataca, juchachishpa rimanajurca.

9Jatun mandaj Nabucodonosor runataca, cashnami ninajurca:

“Jatun mandajlla, canga unaicaman causajupailla.

10Jatun mandajlla, canga tucui runacunamanmi, shuj mandashcata curcangui. Paicunataca, bocinata, gaitata, tamborilta, arpata, salteriota, zampoñata, tucui shuj taquinacunata uyashpaca, curihuan rurashpa runaman rijchajta rurashca ñaupajpi cungurishpa, ninanda alicachinajuchunmi mandarcangui.

11Maijambash chaita alicachingapa na cungurishpaca, nina rupajuj hornopi shitai tucuchun nircanguimi.

12Cai Babilonia llactapi imatapash ricushpa mandachun, can churashca Sadrac, Mesac, Abed-nego shuti, Judá llactamanda runacunami, candaca napacha cazunajun. Jatun mandajlla, chai runacunaca, cambaj dioscunatapash, curihuan rurashpa runaman rijchajta rurachishcatapash, napacha alicachinajunllu” ninajurcami.

13Chaita villajpimi Nabucodonosor runaca ninanda fiñarishpa, Sadrac, Mesac, Abed-nego shuti runacunata pushamuchun cacharca. Shina cachajpimi, chai runacunataca, mandajpaj ñaupajman ucha pushamunajurca.

14Paicunataca, Nabucodonosor runaca cashnami nijurca:

“Sadrac, Mesac, Abed-nego. Cangunataca, ñuca diosta napacha alicachinajunllu nijtami uyani. Curihuan rurashpa runaman rijchajta rurachishcatapash, na alicachinajunllu nijtami uyani. Chaica, ¿shinachu canga?

15Cunanga bocinata, gaitata, tamborilta, arpata, salteriota, zampoñata, tucui shuj taquinacunapashmi uyaringa. Shina cajpimi, chai runaman rijchajta ñuca rurachishcapa ñaupajpi cungurishpa, alicachina canguichi ¿chaitaca pactachinachu canguichi? Canguna napacha alicachishpaca, cunanllatami nina rupajuj hornopi shitai tucunguichi. ¿Maijan diosta ñuca maquimandaca cacharichi ushanga?” nijurcami.

16Shina nijpimi, Sadrac, Mesac, Abed-nego shuti runacunaca, Jatun mandaj Nabucodonosor runataca, cashna ninajurca:

“Can chaita nishcamandaca, imatapash na tigrachi ushanachu capanchi.

17Ñucanchi Taita Diosca, paipajta ruraj ñucanchitaca, nina rupajuj hornomandapash llujchingallami. Jatun mandajlla, cambaj maquimandapash cacharichingami.

18Pai na quishpichijpipash, jatun mandajlla, ñucanchica cambaj dioscunataca na alicachishunllu. Can rurachishca runaman rijchajtapash napacha alicachishunllu. Chaitallami nipanchi” ninajurcami.

19Shina nijpimi Nabucodonosor runaca, Sadrac, Mesac, Abed-nego shuti runacunahuan ninandapacha fiñarishpa, paipaj ñavipash shujpacha tucurca. Shina fiñarishpami, hornotaca canchiscaman ashtahuan yalita rupayachinajuchun mandarca.

20Chai jipaca, paipaj macanajuj runapuramanda ashtahuan shinlli runacunatami, Sadrac, Mesac, Abed-nego shuti runacunata huatashpa, nina rupajuj hornoman shitachun mandarca.

21Shinamandami chai runacunaca, paicunapaj churajunacunandi, chaquipi churajushcacunandi, turbantecunandi, jahualla churajunacunandi huatai tucurca. Chai jipami, ninandapacha rupajuj hornopi shitai tucurca.

22Jatun mandaj runa, hornota ashtahuan rupayachijuchun mandashcamandami, ninandapacha rupayachishca carca. Shinamandami chai ninaca, Sadrac, Mesac, Abed-nego shuti runacunata hornoman shitajcunatapash, rupachirca.

23Sadrac, Mesac, Abed-nego shuti quimsa runacunapash, huatai tucushcami nina rupajuj hornoman shitai tucurca.

24Shina cajpimi, jatun mandaj Nabucodonosor runaca, ninanda manllarishpa uchalla jatarishpaca, paiman ali yuyaita cujcunata cashna nishpa tapurca:

“Nina rupajuj ucumanga, ¿nachu quimsa runacunatalla huatashpa shitarca?” nijpimi, paicunaca:

“Ari jatun mandajlla, shinapachami carca” ninajurca.

25Shina nijpimi mandaj runaca cashna nirca:

“Ñucaca chuscu runacunatami, nina chaupipi imapash na tucushpa, cacharishca purinajujta ricuni. Chai chuscumandaca shujca, dioscunapaj churiman rijchajmi” nircami.

26Shina nishpami Nabucodonosor runaca, rupajuj horno ñaupajman quimirishpa cashna nirca:

“Jahua pachapi causajuj Taita Diospajta ruraj Sadrac, Mesac, Abed-nego shuti runacunaca, chai ucumanda llujshishpa shamuichi” nircami.

Shina nijpimi Sadrac, Mesac, Abed-nego shuti runacunapash, nina chaupimanda llujshirca.

27Ña llujshijpica, satrapa cati mandajcuna, llactacunata mandajcuna, macanajuj runacunata mandajcuna, jatun mandajman ali yuyaita cujcunapashmi, chai runacunata ricungapa shamunajurca. Chaipica, ninapash na rupachishcata, shuj ajchatallapash na rupashcata, paicunapaj churajunapash na yanayashcata, cushnillapash na chayashcatami ricunajurca.

28Chaimandami Nabucodonosor runaca, cashna nijurca: “Sadrac, Mesac, Abed-nego shuti runacunapaj Taita Diosca, ninanda alicachi tucushca cachun. Paica, Paita yariashpa, Paipajta rurajcunata quishpichingapami, paipaj angelta cachamushca. Paicunaca, ñucataca jatun mandaj cajpipash, ñuca mandashcataca na cazurcachu. Paicunapaj Taita Diosta na mañashpa, shuj diosman rurashpa alicachingapa randica, paicunapaj cuerpota rupachinajuchun saquircallami.

29Shinamanda cunanga, caitami mandani: ‘Sadrac, Mesac, Abed-nego shuti runacunapaj Taita Diosta maijambash fiñashpa na alicachijtaca, causajtallata changatapash, rigratapash fitichun. Paicunapaj huasipash, mapata shitana pushtu tucuchun’ ninimi. Cashna llaquimanda quishpichij Dioshuan chimbapurangapaca, maijan shuj diospash na tiyanllu” nijurcami.

30Chai jipami, Babilonia llactapi jatun mandajca, Sadrac, Mesac, Abed-nego shuti runacunataca ashtahuan jatumbi churarca.