DEUTERONOMIO 17 - Quichua Imbabura 2016

1Cangunata Mandaj Taita Diosman carashpa huañuchingapaca, huagrata cashpapash, maltun llamata cashpapash, tucui alitami cuna canguichi. Cangunata Mandaj Taita Diosca, imapash na ali cajpica napacha chasquingachu.

2Canda Mandaj Taita Dios carashca maijan pueblopipash, cangunapaj chaupipi, jari cashpa, huarmi cashpapash na alita rurashpami causanajunga. Paicunaca, Mandaj Taita Dioshuan ari nishcatami yangapi churashpa causanajushca canga.

3Shinallata paicunaca, shuj dioscunata alicachingapa rishpami, chaicunatara cungurishca canga. Indita cashpa, lunata cashpa, jahua pachapi tiyaj luzerotapashmi cungurishca canga. Chaicunataca Ñucami: ‘Na chashna ruranachu canguichi’ nishpa mandarcani.

4Chashna ruranajujta canman villajpica, shina cajta, na shina cajtapash alipacha tapuchishpami yachana cangui. Shina tapuchishpaca, Israelpurapica, millanayaicunata rurashcapacha cajtami yachaj chayangui.

5Shina na alita rurashcata yachashpaca, jari cajpi, huarmi cajpipash, puebloman yaicuna punguman llujchingui. Chaipi rumicunahuan huañuchijpimi, chai na alita rurajcunaca, jari cashpa, huarmi cashpapash huañunga.

6Chai huañuchi tucuna runataca, ishcai cashpa, quimsa cashpapash ricushpa villajpillami, huañuchina cangui. Shujlla villaj tiyajpica na huañuchinachu cangui.

7Chai runataca, ricushcata villajcunarami rumicunahuan huañuchi callaringa. Chaipaj jipami, tucuilla gentecunapash rumihuan huañuchinajunga. Chashna rurashpami, cangunapurapi tiyaj na alitaca anchuchinguichi.

8Huañuchishcamanda, fiñanajushcamanda, macanajushcamanda, ashtahuan imapash shuj llaquicuna pueblopi tiyajpi, ali cajta, na ali cajta ricushpa alichingapa na ushanalla cajpica, canda Mandaj Dios maijan pushtuta agllashca cajpipash, chaimanmi rina cangui.

9Chaipimi, chai punllacuna Diospajta ruraj levitacunapajman, juezpajman shamushpa tapugringui. Paicunami ali cajta, na ali cajtapash ricushpa canman villanga.

10Mandaj Dios agllashca pushtupi, ali cajta, na ali cajtapash villashcatami rurashpa tucuitapacha pactachina cangui.

11Chai mandashca shimipi ima nijujta, juezcuna imata rurachun nishcatami pactachina cangui. Alimambash, lluquimambash na rishpami, chai mandashcataca pactachina cangui.

12Mandaj Taita Diospajta ruraj sacerdoteta cashpa, juezta cashpapash na cazushpa jariyaj runataca huañuchinguilla. Chashna rurashpami, Israelpurapi na alita ruranataca anchuchingui.

13Shina rurashcata tucui Israelcuna uyashpami, manllarishpa na ashtahuan jariyanajunga.

Jatun mandajta imashna churanamanda

14Canda Mandaj Taita Dios canman carashca llactaman chayashpa, chai llactata japishpa chaipi causajushpaca cashnami ningui: ‘Ñuca llacta muyundipi tiyaj tucui llactacunapi causajcunashnallata, ñucapash shuj jatun mandajta churangapami munani’ ninguimi.

15Shina nishpaca, canda Mandaj Taita Dios agllashca runatapachami, jatun mandaj cachun churana cangui. Cambaj jatun mandaj cachunga, shuj llactamanda shamushca runataca na churashpami, cambaj huauquipuratami churana cangui.

16Chai mandaj runaca, caballocunata na paipajlla mirachingachu. Caballocunata mirachinatalla munashpaca, gentecunataca na Egiptoman cachangachu. Mandaj Diosllatami: ‘Chai ñandaca, ima punllapash cutinga napacha tigranachu canguichi’ nirca.

17Diosmanda paipaj shungu ama anchurichunga, chai mandaj runaca ashtaca huarmicunatapash na charingachu. Culquitapash, curitapash na ashtacata mirachingachu.

18Mandangapa tiyarinapi jatun mandaj tiyarishpaca, sacerdote levitacuna huacaichishpa charinajuj mandashca librotami, mushujta quilcachishpa pai charijuna canga.

19Chai quilcashcata pai charijushpaca, paita Mandaj Taita Diosta manllanata yachajungapami, paipaj tucui causaipi, punllandi quilca catishpa causanga. Tucui mandashca cai shimicunata cazushpa pactachingapami, chashna causanga.

20Shinallata, paipaj huauquipuracunata yalimi cani yashpa, paipaj shungupica na jariyangachu. Shinami cai mandashcamandaca, lluquimambash, alimambash na anchurishpa, paipash, paipaj miraicunapash, Israelcunata mandanamandaca na anchuchi tucushpa causanajunga.