PROVERBIOS 27 - Quichua Imbabura 2016

1Caya punllami, caita chaita rurasha yashpaca ama jariyanguichu.

Caya punlla ima tucunatapash na yachanguichu.

2Shujcunami candaca alicachina.

Ama canllataca, alimi cani yajunguichu.

3Rumipash llashajmi.

T'iyu alpapash llashajmi.

Juizu illaj runa ninanda fiñarishcacarin,

chai ishcanditapash yali llashajmi.

4Ninandapacha fiñarishcapash, napacha alichu.

Fiñarishpaca, pitapash llaquichingallami.

Ashtahuangarin, shujcunapaj ima tiyashcata munashpa ricunamandaca

¿pita jarcari ushangayari?

5Juyaimandalla pacashpa na imatapash ningapa randica,

tucuicunapaj ñaupajpi rimanami ashtahuan ali.

6Juyashpa imagutapash shinllita tacurishcami ashtahuan ali.

Na ricunayachishpata alicachishpa rimajcunaca, napacha alichu.

7Na munangacaman micushca runaca,

balun mishquitapash na micunayachinllu.

Ashtahuangarin, yarjachijuj runapaca, ima jayaj micunapash mishquillami canga.

8Paipaj huasita saquishpa rijuj runaca,

tazinda shitashpa rijuj alasyu animalshnami.

9Aceitepash, mishquillagu ashnajun yacupash, shungutami cushichin.

Ali yuyaicunata cushca shimicunacarin, tucuicunatami cushichin.

10Cambaj ali cumbatapash,

cambaj taitapaj ali cumbatapash ama saquinguichu.

Llaquihuan cashpapash, cambaj huauquipaj huasimanga ama ringuichu.

Carupi causaj huauquipaj randica,

cambaj quimiriapi causajcunami ashtahuan ali.

11Ñuca huahualla,

aliguta yachajushca cashpami, ñucataca cushichihuangui.

Shina cajpimi, ñucata fiñashpa rimaj runataca tigrachi ushasha.

12Ali yuyaihuan causaj runaca,

ima llaqui japinamandapash jarcarinmi.

Ashtahuangarin, yuyai illaj runaca,

llaqui japinata yachashpapash imatapash na ruranllu.

13Na rijsishca runa culquita mañajpi, paipaj randi shayarij runataca,

pai ima charishcatapash mañanami cangui.

Na rijsishca huarmiman mañachishcamandapash, pai ima charishcatapash mañanami cangui.

14Pitapash, 'alillachu cangui' nishpa, tutamandata caparinaca na alichu.

Chashna rurashpaca, na alicachijushcatami ricuchingui.

15Tamiajujpi yacu shutujunlla huasipi causanapash,

imatapash nirijujlla huarmihuan causanapash, chashnallata llaquimi.

16Shina huarmita jarcangapa munanaca,

huairata jarcangapa munajshna,

aceiteta maquihuan japingapa munashcashnami.

17Jirrutaca, jirruhuanllatami filuyachina.

Shinallatami runatapash, paipaj cumballata ali yuyaita cushpa alichina.

18Higo yurata, ali ricuriashpa viñachij runaca, chai yuramandami micunga.

Mandaj runata cazuj runaca, alicachi tucungami.

19Imashnami yacupi ñucanchi ñavi ricurin,

shinallatami, runa imata yajushcatapash yachanalla.

20Seolpash, Abadonbash napacha shaijungachu.

Shinallatami runacunapaj ñavipash, napacha shaijun.

21Culquitaca pailapi, curitaca hornopi rupachishpami, ali cajta ricun.

Runa ali cajtaca, shujcuna parlajpimi yacharinga.

22Trigotaca cutana rumipimi,

cutin cutin cutashpa jacuta ruranchi.

Chashna cutanshna alichingapa munajpipash,

juizu illaj runaca napacha ali tucungachu.

23Cambaj llama corraltaca, aligutami ricuriana cangui.

Cambaj llama imashna cajtaca, aligutami ricuriana cangui.

24Imatalla charishcacunaca, na causaita causaicaman tiyangallachu.

Can imata juyailla charishcapash,

¿cambaj miraicunapaj saquiringa yanguichu?

25Jihuacuna viñashpa jundajpimi,

urcupipash jihuacunata cuchunajunga.

26Maltun llamacunaca, cambaj churajunata ahuangapami milmata cunga.

Cambaj maltun chivocunaca, alpata randingapami canga.

27Huarmi chivocunamandaca,

cambajpash, cambaj huasi ucupurapajpash ashtaca lechetami japingui.

Cambajta ruraj huarmicunapashmi lecheta ufianajunga.