1Jesús chaimanda llujshishpaca, Judea llactaman, Jordán yacuta chimbashpa indi llujshimujmanmi rirca. Ashtaca gentecuna Paipajman shamujpimi, imashna yachachij cashcashnallata yachachijurca.
2Chaipica, fariseocuna quimirishpami, imata tigrachijpipash juchachingapa yashpa:
“Huarmita, cusa jichushpa saquinaca ¿alichu imata?” nishpa tapunajurca.
3Shina tapujpimi Jesusca:
“Cangunataca Moisesca, ¿ima nishpata mandarca?” nirca.
4Paicunaca cashnami nirca:
“Moisesca: ‘quilcashca fangata cushpalla, huarmitaca, imamanda cashpapash jichunallami’ nijunmi” ninajurca.
5Shina nijpimi Jesusca, paicunataca cashna nirca:
“Canguna shinlli shungucuna cajpimi, chashna quilcashpa mandashca.
6Ashtahuangarin, tucuita churashpa callaripica, Taita Diosmi jaritapash huarmitapash churarca.
7Shinamandami jarica, taitatapash, mamatapash saquishpa, paipaj huarmihuan tandanajunga.
8Shina cashpami, ishcai cashpapash, shujlla aicha tucushpa causanga. Shinamandami, ña na ishcai cashpa, shujlla tucushpa causanga.
9Shina cashcamandaca, Taita Dios tandachishcataca, runaca napacha shicanyachingachu” nircami.
10Paipaj yachajujcunaca, huasipi cashpami cutin tigrashpa chaitallata tapunajurca.
11Shina ninajujpimi, paicunataca cashna nirca:
“Paipaj huarmita imamandapash jichushpa shujhuan cazarashpaca, huainayashpami causajun.
12Shinallata, maijan huarmipash, paipaj cusata imamandapash juchachishpa, jichushpa, shujhuan cazarashpaca, huainayashpami causajun” nijurcami.
Huahuacunata Jesús bendiciashcamanda(Mat. 19:13-15; Luc. 18:15-17)13Chai jipami, huahuacunapaj uma jahuapi maquita churachun nishpa, Jesuspajman apamunajurca. Ashtahuangarin, huahuacunata apamujcunatami, paipaj yachajujcunaca jarcashpa rimanajurca.
14Chaita ricushpami Jesusca fiñarishpa, paicunataca cashna nirca:
“Huahuacuna Ñucapajman shamunajujtaca, na jarcashpa saquichilla. Taita Dios mandajuj llactaca, cai huahuacunashna shamujcunapajllami.
15Na llullashpami cangunataca cashna nini: Taita Dios mandachun, shuj huahuagushna na chasquishpaca, Diospaj llactaman yaicuitaca napacha ushangachu” nircami.
16Shina nishpallami Jesusca, huahuacunata marcashpa, paicunapaj jahuapi maquita churashpa bendiciajurca.
Shuj ninan charij huambramanda(Mat. 19:16-30; Luc. 18:18-30)17Jesús chaimanda llujshishpa ñanda rijujpimi, shuj runaca calpashpa shamushpa, Paipaj ñaupajpi cungurirca. Paica:
“Causaita causagrinata charingapaca, ¿imatata rurana capani, ali Yachachij?” nishpami tapurca.
18Shina tapujpimi Jesusca:
“¿Imashpata Ñucataca: ‘Alimi cangui’ nihuangui? Pipash alica, na tiyanllu. Taita Diosllami, alica tiyan.
19Mandashca shimicunataca, canllata yachanguimi. Chaipica: ‘Cazarashca jahua ama shujhuan causanguichu, ama huañuchinguichu, ama shuhuanguichu, ama yangata chashnapachami nishpa villanguichu, ama umachinguichu, cambaj taitata, cambaj mamatapash alicachishpa cazungui’ nijunmi” nircami.
20Shina nijpimi chai runaca:
“Yachachij, tucui chaicunataca chairalla viñaimandapachami pactachijupani” nirca.
21Shina nijpimi Jesusca, juyaihuan paita ricushpa cashna nirca:
“Cashnata pactachinarami cangui: Can tucui charishcata jatushpa, imagutapash na charijcunaman caragrilla. Chashna carashpaca, jahua pachapimi ninan charij cangui. Chai jipaca, cruzta aparijshna Ñucata catihuailla” nircami.
22Jesús chashna nijpica, paica tucuita charij cashcamandami, ninanda llaquirishpa rirca.
23Shinamandami Jesusca, muyundita ricujushpa, Paipaj yachajujcunataca:
“¡Ninan charijcunapajca, Taita Dios mandajuj llactaman yaicungapaca, shinllipachami!” nirca.
24Chai shimicunata nijpimi Paipaj yachajujcunaca, ninanda manllarirca. Ashtahuangarin Jesusca, paicunataca cashnatapashmi nirca:
“Ñuca huahuacunalla. Imata ninanda charishpapash, chaitalla yariashpa causajcunapajca, Taita Dios mandajuj llactaman yaicungapaca, ninan shinllipachami.
25Taita Dios mandajuj llactaman, ninan charij runa yaicuitaca na fangalla ushangachu, chaipaj randica, camellorapashmi, auja utujuta fangalla yalinman” nircami.
26Shina nijpicarin Paipaj yachajujcunaca, ashtahuan manllarishpami, paicunapura cashna ninajurca:
“Shinaca, ¿pita quishpiri ushangayari?” ninajurcami.
27Shina ninajujpimi Jesusca, paicunata ricushpa cashna nirca:
“Gentecunapaca napacha ushanallachu. Ashtahuangarin Taita Diospaca, na chashnachu. Taita Diosca tucuita rurai ushanllami” nircami.
28Shina nijpimi Pedroca, cashna nirca:
“Ñucanchica tucuita saquishpamari, Candaca catinajunchi” nircami.
29Shina nijpimi Jesusca cashna nirca:
“Na llullashpami cangunataca cashna nini: Paipaj huasita, huauquicunata, panicunata, taitata, mamata, huarmita, huahuacunata, alpacunata saquishpa, Ñucata catishpa, ali villanata villajushpaca,
30patsajta mirachishcatami cunan punllapillata japinga. Ñucata catijushcamanda llaquichi tucushpapash, huasicunata, huauquicunata, panicunata, mamata, huahuacunata, alpacunata saquishpallami, jipa causaipicarin Dioshuan causaita causagringa.
31Ashtahuangarin, ashtacacunami, pundapi churai tucushcacunaca, huashaman churai tucunga. Shinallata, huashaman churai tucushcacunaca, pundapimi churai tucunga” nijurcami.
Jesusca, Pai huañunatami cutin villashca(Mat. 20:17-19; Luc. 18:31-34)32Jerusalenman vichai rinajushpami, Jesusta catishpa rinajujcunaca, ninanda manllarishca rinajurca. Shinamandami Jesusca, chunga ishcaicunatalla cayachishpa, Paita imata ruranatapash cashna villajurca:
33“Jerusalenmanmi vichai rinajunchi. Chaipimi, Runa Aichayuj tucushca Ñucataca, sacerdotecunata mandajcunaman, mandashca Shimita yachachijcunaman japichinga. Ñucataca: ‘Huañunapachami cangui’ nishpami, na Israelcunaman cunajunga.
34Paicunami, Ñucataca pujllashpa asinajunga. Shinallata, astishpa, t'ucashpa saquishca jipaca, huañuchihuangami. Ashtahuangarin, quimsa punllahuanga causarishallami” nijurcami.
Santiagopash, Juanbash mañashcamanda(Mat. 20:20-28)35Chai jipami, Zebedeopaj churi Jacobo, Juanbash, Jesuspajman quimirimurca. Paicunami:
“Yachachij, ñucanchi mañashcaguta rurachunmi munapanchi” ninajurca.
36Shina nijpimi:
“Cangunaca, ¿imatata rurachun munanguichi?” nishpa, Jesusca tapurca.
37Shina tapujpimi, paicunaca cashna ninajurca:
“Punchapamba tiyarinapi can tiyajushpaca, shujtaca ali maquiman, shujtaca lluqui maquiman tiyachihuangui nipanchimi” ninajurca.
38Shina nijpimi Jesusca, cashna nirca:
“Na yachaimandami chashna mañanajunguichi. ¿Cangunaca, Ñuca ufiana vasomanda ufiai ushanachu canguichi? ¿Ñuca bautizarijshna bautizaritapash ushanachu canguichi?” nirca.
39Shina nijpimi paicunaca:
“Ari ushapashunllami” ninajurca.
Shina nijpimi Jesusca cashna nirca:
“Ñuca ufiana vasomanda ufianguichipachami. Ñuca bautizarijshna bautizaritapash ushanguichimi.
40Shina cajpipash, Ñuca ali maquiman, lluqui maquiman tiyarinataca, na Ñuca cunachu cani. Ashtahuangarin, maijanda Dios agllashcallami chaipica tiyaringa” nircami.
41Chaita uyashpami, chungapura yachajujcunaca Jacobotapash, Juandapash ninanda fiñarirca.
42Ashtahuangarin Jesusca, paicunata cayashpami cashna nirca:
“Llactacunata mandajcunallami, shuj llactapi causajcunataca ninanda mandashpa charin. Shinallata, ashtahuan mandai ushajllami, caishujcunatapash mandanajun. Chaitaca, cangunallata yachanguichimi.
43Ashtahuangarin, cangunapurapica, na chashna cangachu. Cangunapurapi maijambash mandaj tucungapa munashpaca, cangunapajta rurashpa causachun ninimi.
44Cangunapurapi punda cangapa munashpaca, tucuicunapajta rurashpa causachun ninimi.
45Runa Aichayuj tucushca Ñucapash, shujcuna Ñucaman ruranajuchunga na shamurcanichu. Ashtahuangarin, Ñuca shujcunaman rurashpa, shujcunamanda huañushpa, ashtacacunata quishpichingapami shamurcani” nijurcami.
Bartimeo shuti ñausa runatami alichishca(Mat. 20:29-34; Luc. 18:35-43)46Chai jipaca, Jericó pueblomanmi shamunajurca. Jesuspash, Paipaj yachajujcunapash, ashtaca gentecunandi, Jericó pueblomanda llujshishpa rinajujpimi, Timeo shuti runapaj churi Bartimeo shuti ñausa runaguca, ñan manñapi mañashpa tiyajurca.
47“Nazaret pueblomanda Jesusmi shamujun” nijta uyashpami:
“¡Davidpaj Churi Jesús, ñucataca llaquihuayari!” nishpa capari callarirca.
48Shina caparijujpimi upallayachun, ashtacacuna jarcanajurca.
Shina jarcajpipash:
“¡Taita Davidpaj Churi, ñucataca llaquihuayari!” nishpami, ashtahuan shinllita caparirca.
49Shina caparijujpi, Jesús shayarishpami, chai runata pushamuchun mandarca.
Chai ñausa runaguta pushamungapa rishpaca:
“Ama manllashpa jatari, candaca cayajunmari” ninajurcami.
50Shina nijpica, jahualla churajushcatapash shitashpa jatarishpami, chai runaguca Jesuspajman chayamurca.
51Shina chayamujpimi:
“¿Imatata rurachun munangui?” nishpa, Jesusca tapurca.
Shina tapujpimi chai ñausa runaguca:
“Yachachij, Ñuca ñavigu ricuchun alichihuai” nirca.
52Shina nijpimi Jesusca:
“Can crishcamandami, ña ali tucushcangui, cunanga rilla” nirca.
Shina nijhuanga, ñapash ricushpami, chai ñandallata Jesusta catishpa rirca.
Who We AreWhat We EelieveWhat We Do
2025 by iamachristian.org,Inc All rights reserved.
