PROVERBIOS 3 - Quichua Imbabura 2016

Diosta cazuchun aliguta yachachishcamanda

1Ñuca huahualla,

Ñuca mandashca shimicunataca ama cunganguichu.

Ñuca mandashca shimicunataca, cambaj shungupi alichingui.

2Shina rurashpami, unai huatacunata causangui.

Shinallata ali causaitapashmi charingui.

3Ninan juyaihuan alitalla rurashpa causanataca, amapacha saquinguichu.

Chaitaca, cungapi huatarishcashna,

shungupi quilcashcashnami charina cangui.

4Shina rurashpami Taita Diospaj ñaupajpipash,

runacunapaj ñaupajpipash, ali ricurishpa alicachi tucungui.

5Mandaj Diostallami, cambaj tucui shunguhuan crishpa causana cangui.

Ñucaca tucuitami yachani yashpaca na causanachu cangui.

6Cambaj tucui causaipimi, Diostaca yarina cangui.

Paimi, candaca huacaichishpa pushanga.

7Alipachami yachani yashpaca, na causanachu cangui.

Mandaj Diosta manllashpami, tucui na alimanda anchurina cangui.

8Shina rurajpica, cambaj aichapajpash jambishnami canga.

Cambaj tullucunatapash samachingami.

9Can imatalla charishcacunata carashpami,

Mandaj Diostaca alicachina cangui.

Punda fucushca granocunatapash carashpami alicachina cangui.

10Shina rurajpimi, granocunata alichina ucucunapipash ninanda jundanga.

Uvacunata cutana pushtucunapipash, llullu vinoca ninandami tiyanga.

11Ñuca huahualla,

Mandaj Dios llaquichishpa yachachishcataca, ama yangapi churanguichu.

Ali tucuchun llaquichijpipash, ama fiñaringuichu.

12Mandaj Diosca juyashpami, pita cashpapash llaquichishpa yachachin.

Ninanda juyaj taita, paipaj churita llaquichijshnami llaquichin.

13Ali yachajunata tarij, ali yuyaita charij runaca ninandami cushijunga.

14Culquita mirachishcatapash ashtahuan yali alimi.

Cai ali yachanamanda japinaca, ashtahuan ali curitapash yalimi.

15Juyailla rumicunatapash ashtahuan yali alimi.

Tucui ima munashcahuambash na chimbapurai ushanallami.

16Ali maquipica, unai causaitami charin.

Lluqui maquipica, charij tucunata, alicachi tucunatami charin.

17Paipaj ñangunaca, cushijushpa purina ñangunami.

Diospaj ñangunaca, ali causaiman pushaj ñangunami.

18Cai yachajunata chasquijcunapajca, causaita cuj yurashnami.

Cai ali yachanata chasquijcunaca, ninandami cushijun.

19Mandaj Diosca, Paipaj ninan yachaihuanmi, cai pachataca churarca.

Paipaj ali yachaihuanmi, jahua pachatapash shinllitapacha churarca.

20Tucuita yachaj cashpami, manllanayai ucucunatapash shicanyachirca.

Jahua pachamandami tamiatapash cachamujun.

21Ñuca huahualla,

cai mandashcacunataca yarishpami causana cangui.

Mandashca shimicunatapash, na cunganachu cangui.

22Chaicunami, canmanga causaita cunga.

Cambaj cungapi juyaillaguta huatarishcashnami canga.

23Shina cajpimi, imatapash na manllashpa causangui.

Cambaj chaquipash napacha nitijangachu.

24Samangapa siririshpapash, na manllanguichu.

Ashtahuangarin, aliguta puñushpami samaringui.

25Cungashcapi ima llaquicuna japinatapash, na manllanguichu.

Diosta na manllajcunata llaquicuna japijpipash, canga na manllanguichu.

26Mandaj Diosmi canmanga, ali causaita cunga.

Ima llaquipi japinamandapash, Paimi huacaichinga.

27Maijambash llaquipi cajpica, yanapanami cangui.

Yanapai ushashpaca, yanapanallami cangui.

28Cambaj cumba imata mañajpipash, uchami yanapana cangui.

Cambaj maquipi cajpica, yanapanallami cangui.

29Pitapash na alita ruranataca, na yarinachu cangui.

Canda llaquishpa causaj runagutaca, na llaquichinachu cangui.

30Na pihuambash yangamandaca fiñarinachu cangui.

Pitapash na yangamanda llaquichinachu cangui.

31Na ali gentecuna imata charijtapash na munashpa ricunachu cangui.

Paicuna imashna causanajujtapash, na catinachu cangui.

32Mandaj Diosca, na alita rurajcunataca na ricunayachinllu.

Ashtahuangarin, alitalla rurashpa causajcunatami ninanda juyan.

33Na ali gentecunataca, Mandaj Diosca llaquichingami.

Ashtahuangarin, alitalla rurajcunataca bendiciangami.

34Na cazushpa asijcunataca, Mandaj Diospash asingami.

Ashtahuangarin, na jariyashpa causajcunatami alicachinga.

35Alipacha yachajushcacunami, alicachi tucunga.

Ashtahuangarin, juizu illajcunaca, ninandami pingai tucunga.