DEUTERONOMIO 26 - Quichua Imbabura 2016

Punda fucushcatapash, chungamanda shujgutapash cunamanda

1Canda Mandaj Taita Dios carashca llactaman chayashpa, chai llactata japishpa, chaipi causajushpaca,

2Mandaj Taita Dios carashca alpapi punda fucushca tucui granocunataca tandachinami cangui. Chaicunataca, canda Mandaj Taita Dios, Paipaj shuti chaipi causachun agllashca pushtumanmi, shuj tazapi apana cangui.

3Chaiman chayashpami, chai punllacuna Diospajta rurajuj sacerdotepajman rishpa cashna nina cangui: ‘Mandaj Dios, Ñucanchi ñaupa taitacunaman carangapa juramentushca llactaman ñami chayamushcani’ nishpami Mandaj Diospaj ñaupajpi villana cangui.

4Chai jipami sacerdoteca, tazata cambaj maquimanda japishpa, canda Mandaj Taita Diospaj altar ñaupajpi churanga.

5Shina churajpimi, canda Mandaj Taita Diospaj ñaupajpi cashna nina cangui: ‘Ñuca taitaca, llaqui japijpi huañunalla arameo runami carca. Paica, Egiptoman urai rishpami, huaquin gentecunandi chaipi causajurca. Chaipi causashpami, shuj jatun llacta tucushpa, ninan shinlli, ashtacatapacha mirarcanchi.

6Egiptopi causajcunaca, ñucanchitaca ninandapachami llaquichinajurca. Shina rurashpami, ñucanchitaca shinlli ruranacunapi charirca.

7Chaimandami, ñucanchi taitacunata Mandaj Taita Diostaca caparishpa mañarcanchi. Shina mañajpimi Mandaj Diosca, ñucanchi llaquitapash, shinlli ruranacunata ruranajujtapash, ñucanchita imashna llaquichishpa charijtapash ricushpa uyarca.

8Chaimandami Mandaj Diosca, ninan ushaita charij Paipaj maquihuan Egiptomanda llujchimurca. Paipaj ushaihuanmi, ninan manllarinacunata cachamushpa, imatapash rurashpa ricuchishpa, pipash na rurai ushanallacunata rurashpa llujchimurca.

9Chaimanda caiman pushamushpami, lechepash, balun mishquipash ashtacapacha tiyaj cai llactata ñucanchiman cararca.

10¡Mandaj Dioslla! Chaimandami cunanga, Can carashca cai alpapi punda fucushca granocunata apamupani’ nishpa, canda Mandaj Taita Diospaj ñaupajpi churangui. Shina churashpaca, canda Mandaj Taita Diospaj ñaupajpi ninanda alicachingui.

11Shina rurashpami canmambash, cambaj huasi ucupuramambash, canda Mandaj Taita Dios alicunata carashcamanda cushijungui. Shinami cambash, levita runapash, shuj llactamanda shamushca cangunapurapi causaj runapash cushijunga.

12Quimsa huatapi, chungamanda shujguta cuna chayajpica, cambaj chagrapi fucushcamandaca, chaita cushpa pactachinami cangui. Shina cushca jipami levitamambash, shuj llactamanda shamushca runamambash, taita mama illajmambash, sapalla mamagumambash carana cangui. Shina carajpimi, can causajuj llactacunapica micuna tiyanga.

13Chai jipaca, canda Mandaj Taita Diospaj ñaupajpi, cashna ningui: ‘Canman cungapa shicanyachishcataca, ñami ñuca huasimanda llujchishpa apamupani. Chaitaca, can mandashcashnami, levitamambash, shuj llactamanda shamushcamambash, taita mama illajmambash, sapalla mamagumambash cararcani. Shina rurachun mandashcataca, na cungashpami tucuita pactachircani.

14Chaicunataca, huañui tiyajpi llaquilla cashpapash, imamanda mapayashca cashpapash na micurcanichu. Chaicunataca, huañushcacunamambash na cararcanichu. Ñucata Mandaj Taita Dios imatalla nishca shimicunata cazushpami, tucui mandashcashna pactachircani.

15Jahua pachapi jucha illaj Can Diospaj huasimanda ricushpa, Can agllashca Israelcunatapash bendiciapangui. Lechepash, balun mishquipash ashtacapacha tiyaj llactata, ñucanchi ñaupa taitacunaman juramentushca llactatapash bendiciapangui’ ningui.

16Canda Mandaj Taita Diosca, cunanga pactachinajuchun cushca tucui mandashca shimicunataca, cazushpa pactachijuchunmi mandajun. Chaicunataca tucui shunguhuan, tucui causaipimi pactachina cangui.

17Canllatami, tucuicunapaj ñaupajpi cashna nircangui: ‘Cunanga Mandaj Diosca, ñuca Taita Diosmi. Pai yachachishcatami cazushpa causasha. Shinallata, pactachinajuchun mandashca shimicunata, ali uyashpami cazushpa pactachisha’ nircanguimi.

18Shinalllata Mandaj Diosca: ‘Ñucapajlla cachun agllashca gentecunami canguichi’ nircami. Pai imashna nishcashna, tucui Pai mandashcacunata pactachinajuchunmi, chashna agllashca.

19Tucui shuj llactacunataca yali ashtahuan alicachi tucushca, ali rijsi tucushpa, jatun llacta cachunmi chashna agllashca. Mandaj Taita Diospajlla causaj gentecuna cachunmi, imashna Pai nishcashnalla cangunataca agllashca” nishpami tucuimanda yachachijurca.