1 SAMUEL 4 - Quichua Imbabura 2016

Diospaj arcata filisteocuna apashcamanda

1Samuelca tucuilla Israelcunamanmi villarca. Chai punllacunallatami Israelcunaca, filisteocunahuan macanajungapa rishpa, Eben-ezer puebloman chayana pambapi carpacunata shayachishpa tiyanajurca. Shinallata filisteocunapash, Afec shuti pambapimi, carpacunata shayachishpa tiyanajurca.

2Filisteocunaca, chai jatun macanajuipi ninanda macanajushpami Israelcunataca misharca. Chai macanajui pambapimi, filisteocunaca chuscu huarangatashna Israelcunataca huañuchirca.

3Israelcuna paicunapaj carpacunaman tigrajpica, mandaj rucucunaca cashnami nirca: “¿Imashpashi Mandaj Diosca, filisteocunapaj maquipi mishai tucuchun saquirca? Cunanga, Mandaj Dioshuan ari nirishpa quilcashcata alichishca arcata, Silo shuti puebloman apamugrishunchi. Chaita apamushpami, Mandaj Dios ñucanchihuan cajpi, ñucanchita fiñajcunataca mishai ushashunchi” ninajurcami.

4Shina nijpimi Israelcunaca, tucuita Mandaj Dioshuan ari nirishpa quilcashcata, querubín angelcunapaj chaupipi alichishca tiyajuj arcata, Silo shuti pueblomanda apamuchun cacharca. Chaipimi, Ofni shuti, Finees shuti, Elipaj ishcandi churicunapash arcata ricushpa causanajurca.

5Mandaj Dioshuan ari ninajushpa quilcashcata alichishca arcahuan, carpacunata shayachishca pambaman chayajpica, tucui Israelcunami, alpapash chujchujta, ninandapacha shinllita caparirca.

6Chashna caparinajujta filisteocuna uyashpami: “Hebreocuna carpacunata shayachishca pambapica, ¿ima nishpashi chashna ninanda caparinajun?” ninajurca. Paicunaca, Israelcunapaj carpacunaman Mandaj Diospaj arcata apamushcatami yachanajurca.

7Chaimandami filisteocunaca, ninanda manllarishpa cashna ninajurca: “Taita Diosmari, carpacunata shayachishca pambaman chayamushca” ninajushpami, cashnatapash ninajurca: “¡Aij ñucanchilla! Cunangamanga, nara chashna tucushcachu.

8¡Aij ñucanchilla! Chai ninan ushaita charij Diospaj maquimandaca, ¿pita cacharichingayari? Chai Diosmi Egiptopi causajcunataca, jatun llaquicunahuan jichushca pambapi llaquichirca.

9Cunanga filisteo runacuna, shinlli shayarishpa macanajushunlla. Hebreocuna, ñucanchipaj gañan causashcashna, ama ñucanchipash gañan tucungapa, shinlli shayarishpa macanajushunchilla” ninajurcami.

10Filisteocuna shinllita macanajushpa, Israelcunata mishajpimi, paicunapaj carpacunaman pacajushpa calpanajurca. Chaipica, ninandapacha huañuchijpimi, macanajunata ali yachaj quimsa chunga huaranga Israelcuna huañurca.

11Shinallata Ofni shuti, Finees shuti, Elipaj ishcandi churicunatapash huañuchishpami filisteocunaca, Taita Diospaj arcataca quichushpa apanajurca.

12Shina cajpimi, Benjamín ayllupuramanda shuj runa chai macanajuimanda calpashpaca, chai punllallata Silo shuti puebloman chayarca. Paica, churajushcapash liquirishca, paipaj umapash alpallami carca.

13Pai chayashpaca, sacerdote Elitaca, ñan manñapi, shuj tiyarinapi chapashca tiyajujtami ricurca. Paica, Taita Diospaj arcata yarishpami, ninandapacha llaquirishpa tiyajurca. Chai runa chayashpa, Silo shuti pueblopi causajcunaman tucuita villajujpimi, gentecunaca ninanda manllarishpa caparinajurca.

14Chashna ninandapacha caparinajujta Elí uyashpami: “¿Imashpata chashna caparinajun?” nishpa tapurca. Villangapa shamuj runaca, Elipajman calpashpa shamushpami, tucuita villajurca.

15Elí runaca, ña iscun chunga pusaj huatatami charirca. Chaimandami, paipaj ñavipash amsayajpi, na ricui ushajurca.

16Chai runaca, Elitaca cashnami nirca: “Ñucaca, chai jatun macanajuimanda, quishpirishpa, pacajushpami shamuni” nircami Shina nijpimi Elí runaca: “Ñuca huahualla, ¿imata tucurcayari?” nirca.

17Shina nijpimi chai villaj runaca, cashna nirca: “Filisteocuna, mishashpami, Israelcuna pacajushpa calpanajujpi ashtacatapacha huañuchirca. Ofni shuti, Finees shuti, cambaj ishcandi churicunatapash huañuchishpami, Taita Diospaj arcatapash quichushpa filisteocunaca aparca” nircami.

18“Taita Diospaj arcata apashcami” nishpa villajpimi, Elí runaca, pai tiyajushcamandaca, huashaman urmashpa cunga tullu faquirijpi huañurca. Paica, ña rucugu cashcamandami, llasha llasha carca. Paica Israelcunataca, chuscu chunga huatatami mandajurca.

19Chai punllacunapimi, Finees shuti runapaj huarmi, Elipaj jachunga, vijsayu cashpa ña ungunalla carca. Taita Diospaj arcata quichushpa apashcata, paipaj cusapaj taitapash, paipaj cusapash huañushcata yachashpami, ñapash nanai japijpi ungurca.

20Nanaihuan ña huañunalla sirijujpimi, paita ricunajuj huarmicunaca: “Ama manllarichu, jari huahuagutami ungushcangui” ninajurca. Shina nijpipash, imatapash na nishpa, upalla uyajurcallami.

21Paica: “Taita Diospaj arcata quichushpa apashcamanda, paipaj cusapaj taitapash, paipaj cusapash huañushcamanda, Israelcunaca ushai illaj saquirishca” nishpami, chai huahuataca, Icabod shutita shutichirca.

22“Taita Diospaj arcata quichushpa apashcamandami, Israelcunaca ushai illaj saquirishca” nishcami carca.