1Josafat shuti runaca, ninan charijpash, ninanda alicachi tucushcapashmi carca. Paica, Acab shuti runapaj ayllupurami tucurca.
2Huaquin huata jipa, Acab runata ricungapa Samaria puebloman urai rijpimi, Acab runaca, Josafat runamambash, paihuan shamuj gentecunamambash, ashtaca llamacunata, huagracunata huañuchishpa, jatun micuita rurarca. Acab runaca, Josafat runataca Galaad llacta, Ramot pueblopi causajcunahuan macanajungapami pushangapa munarca.
3Israel llactata jatun mandaj Acab runaca, Judá llactata jatun mandaj Josafat runataca, cashnami nirca:
“¿Galaad llacta Ramot shuti pueblopi causajcunahuan macanajungapa ñucahuan risha ninguichu?” nircami.
Shina nijpimi Josafat runaca:
“Ñucaca, canhuanga shujllashnallami cani. Ñuca gentecunapash, cambaj gentecunashnami. Shina cashcamanda, macanajuiman canhuan rishunllami” nirca.
4Shina nishca jipapash Josafat runaca, Israel llactata jatun mandajtaca:
“Mandaj Dios ima nijta yachangapa tapupai” nircami.
5Shina nijpimi, Israel llactata jatun mandajca, chuscu patsaj profetacunata tandachishpa:
“¿Galaad llacta Ramot shuti pueblopi causajcunahuan macanajungapa rinachu canchi, nachu rina canchi?” nishpa tapurca.
Shina nijpimi paicunaca:
“Rinallami cangui. Taita Diosca, can jatun mandajpaj maquipimi churanga” ninajurca.
6Josafat runaca: “Dios ima nijta tapungapaca, ¿Mandaj Diospaj profeta runa maijambash caipi tiyanllu?” nircami.
7Shina nijpimi, Israel llactata jatun mandajca, Josafat runataca:
“Mandaj Dios ima nijta tapungapaca, shuj runa tiyanrami. Ashtahuangarin, ima alitapash na villashpa, na alitalla villajpimi, paitaca na ricunayan. Paica, Imla shuti runapaj churi Micaías runami” nirca.
Shina nijpimi, Josafat runaca:
“Jatun mandajlla, ama chashna rimaichu” nirca.
8Israel llactata jatun mandajca, paipajta ruraj runata cayashpami:
“Imla shuti runapaj churi Micaías shuti runata, ucha cayamugri” nirca.
9Israel llactata jatun mandajpash, Judá llactata jatun mandaj Josafat runapash, jatun mandajcuna churajunata churajushcami, mandangapa tiyarinapi tiyanajurca. Paicuna, Samaria puebloman yaicuna plazapi tiyanajujpimi, tucuilla profetacuna paicunapaj ñaupajpi villanajurca.
10Quenaana shuti runapaj churi Sedequías shuti runaca, jirru cachucunata rurashcami carca. Paica, cashnami nirca: “Mandaj Diosca, cashnami nin: ‘Siria llacta gentecunataca, cai cachucunahuan tupajshnami tucuchingui’ ninmi” nircami.
11Tucui profetacunapash, chashnallata villashpami cashna ninajurca: “Galaad llacta Ramot shuti pueblopi causajcunahuan macanajungapa rilla, paicunataca mishanguimi. Mandaj Diosmi, can jatun mandajpaj maquipi churanga” ninajurcami.
12Micaías runata cayangapa rishca runaca, cashnami nirca:
“Uyai, caishuj profetacunaca, tucuicunami jatun mandajmanga alitalla villanajun. Can villashpapash, paipurashnallata alitalla villapangui” nircami.
13Shina nijpimi Micaías runaca:
“Mandaj Diospash ricujunmi. Taita Dios ñucaman imata nishcatallami villasha” nishpami, jatun mandajpajman shamurca.
14Pai chayajpimi jatun mandajca:
“Micaías, ¿Galaad llacta Ramot shuti pueblopi causajcunahuan macanajungapa rinallachu canchi, nachu rina canchi?” nirca.
Shina nijpimi Micaías runaca:
“Rinallami cangui, mishanguichimi. Cangunapaj maquipimi churanga” nirca.
15Shina nijpimi, Jatun mandajca:
“¿Mashnacamanda candaca, Mandaj Dios ima nishcatapacha villahuai nijunalla cani?” nircami.
16Shina nijpimi Micaías runaca cashna nirca:
“Ñucami, Israelcunataca michij illaj llamacunashna, lomacunapi caita chaita purinajujta ricurcani. Chaimandami Mandaj Diosca, cashna nihuarca: ‘Paicunaca mandaj illajcunami, shina cashcamanda, macanajuiman na rishpa paicunapaj huasicunaman tigranallami’ nihuarcami” nirca.
17Shina nijpimi, Israel llactata jatun mandajca, Josafat runata cashna nirca:
“¿Nachu, cai runa chashnami nircani? ‘Paica, ima alitapash na villashpami, llaquicunatalla villanga’ nircanimi” nirca.
18Shina nijpimi Micaías runaca, cashna nijurca:
“Mandaj Dios rimashca shimita uyaichi. Mandaj Diostaca, pai tiyarinapi tiyajujta, Paipaj alimambash, lluquimambash jahua pacha tucui angelcuna shayanajundami ricurcani.
19Chaipimi Mandaj Diosca, cashna nirca: ‘Galaad llactapi tiyajuj Ramot shuti pueblopi, macanajungapa vichai rishpa llaquita apachunga, ¿Israel llactata mandaj Acab runaman, pita panda yuyaita cugringuichi?’ nirca. Shina nijpimi, shujcunaca shuj yuyaita, caishujcunaca shuj yuyaita cunajurca.
20Chaipimi, Mandaj Diospaj ñaupajman shuj espíritu shamushpa: ‘Panda yuyaicunataca, ñuca cugrishallami’ nirca. Shina nijpimi, Mandaj Diosca: ‘¿Ima shinata ruragringui?’
21nijpimi chai espirituca, cashna nirca: ‘Ñuca rishpaca, paipaj tucui profetacunapaj shimipimi llullachij espíritu casha’ nirca. Shina nijpimi: ‘Canga, chaicunata rurashpa pandachi ushanguimi, cunanga rilla’ nirca.
22Mandaj Diosllatami cambaj tucui profetacunapaj shimipi, llullachij espirituta churashca. Mandaj Diosllatami, can llaquichi tucuchunga, ña chashna pactachun mandashca” nircami.
23Shina nijpimi, Quenaana shuti runapaj churi Sedequías runaca, Micaías runapaj ñavipi huactashpa cashna nirca:
“Mandaj Diospaj Espirituca, ¿ñucamandaca anchurishpachu, canmanra villangapa shamurca?” nircami.
24Shina nijpimi Micaías runaca:
“Canga, shuj ucumanda caishuj ucuman pacajushpa calpariyajushpami, chai pactashcataca yachangui” nircami.
25Shina nijpimi Israel llactata jatun mandaj runaca, cashna nirca:
“Cai Micaías runataca, pueblota mandaj Amón runapajman, jatun mandaj ñuca churi Joaspajmambash apaichi.
26Paicunamanga cashna nigrichi: ‘Jatun mandajca: Cai Micaías runataca, prezuna huasipi churashpa, micunatapash, yacutapash, ashatalla carashpa, llaquichishpa, ñuca ali tigramungacaman charinguichi’ ninmi nigrichi” nircami.
27Shina nijpimi Micaías runaca, cashna nirca:
“Ima llaquitapash na apashpa ali tigramushpaca, Mandaj Diosca na ñucaman villashcatami yachangui” nircami.
Shinallata:
“Caitaca, tucui gentecunami uyana canguichi” nirca.
28Israel llactata jatun mandajpash, Judá llactata jatun mandaj Josafatpashmi, Galaad llactapi tiyaj Ramot shuti puebloman vichai rinajurca.
29Israel llactata jatun mandajca, Josafat runataca cashnami nirca:
“Macanajungapaca, na rijsinalla churajunata churajushpami rigrini. Canga, cambaj churajunata churajushpa rilla” nircami.
Israel llactata jatun mandajca, na rijsinalla churajunata churajushpami, macanajungapa rirca.
30Ashtahuangarin Siria llactata jatun mandajca, carretacunapi purishpa macanajuj runacunata mandaj, quimsa chunga ishcai runacunataca, cashna nishpami cachashca carca: “Cangunaca shujcunahuanga na macanajunachu canguichi. Ashtahuangarin Israel llactata jatun mandajhuanllami macanajuna canguichi” nishcami carca.
31Carretacunapi purishpa, macanajujcunaca, Josafat runata ricushpami: “Paica, Israel llactata jatun mandajpachami” yashpa, paihuan macanajungapa chaupipi churanajurca. Ashtahuangarin, Jatun Mandaj Josafat runaca ninanda caparishpa Mandaj Diosta mañajpimi, Taita Diosca paita yanapashpa quishpichirca.
32Chaita uyashpami, carretapi purishpa macanajuj runacunata mandajcunaca, na Israel llactata jatun mandaj cashcata ricushpa, saquishpa anchurinajurca.
33Ashtahuangarin, shuj runa arcohuan flechata yangata cacharishpami, Israel llactata jatun mandajtaca, macanajungapa churajushca jirru churajuna chaupita yalichishpa chugrichirca. Chaimandami Acab runaca, paipaj carretata purichij runataca:
“Chugrishcami cani. Caimanda tigrashpa, ucha pushahuai” nirca.
34Chai punllapica, macanajuica ashtahuanmi shinlliyarca. Shinallata, Israel llactata jatun mandajpash, Siria llacta gentecunapaj chimbapurapimi, paipaj carretapi shayanman chisharca. Paica, ña indi huashajushca chishipimi huañurca.
Who We AreWhat We EelieveWhat We Do
2025 by iamachristian.org,Inc All rights reserved.
