2 TIMOTEO 4 - Quichua Imbabura 2016

Diospaj Shimita villangui nishcami

1Cai ninan pactachinataca, Taita Diospaj ñaupajpi, causajcunatapash, huañushcacunatapash mandangapa shamuna Apunchi Jesucristopaj ñaupajpimi mingani.

2Diospaj Shimita villangui ninimi. Uyanayachijpi, na uyanayachijpipash, villajunguilla ninimi. Aliguta yarichishpa, jarcashpa rimashpa, shinlli tacurishpa, ama fiñarishpa, Diosmandaca yachachingui ninimi.

3Diospaj shimitaca, na uyanayachina punllacunami chayamunga. Shina cashpami, paicuna munashcatalla uyangapa munashpa, panda yachachijcunatara alicachishpa catinajunga.

4Na llullashpa villajuj Shimitaca na uyanayachishpami, yanga rimaicunatara uyashpa catinajunga.

5Ashtahuangarin canga, tucuipi aligutapacha yarishpa puringui. Llaqui shamujpipash mishashpa, quishpirinamanda villashpa, Diospajta rurashpa pactachingui ninimi.

6Ñucaca, ñami Diosman carashpa huañuchi tucunalla cani. Ñuca rina punllapash, ñami chayamujun.

7Alipacha jatun macanajuitami misharcani. Calpajshna rijunataca ñami tucuchircani. Alipacha crishpami catijurcani.

8Shinamandami, Diospajta rurashcamanda ñucaman carana coronaca alichishca tiyajun. Chaitaca, alitalla ruraj Apunchi Jesusmi chai punllapica, na ñucamanlla carashpa, ashtahuangarin, Pai shamunata juyashpa tucui shuyajcunamambash caranga.

Imaguta rurachumbash Timoteomanmi, Pabloca yachachishca

9Ñucata ricungapa uchalla shamupangui ninimi.

10Demasca, ñucata saquishpami cai pachapi imapash tiyajtalla juyashpa, Tesalónica puebloman rirca. Crescente runaca, Galacia llactamanmi rirca. Titopash, Dalmacia llactamanmi rirca.

11Lucasllami ñucahuan caipi. Marcosta pushashpa shamupangui. Paica, Diospajta ñucahuan rurangapa alimi capan.

12Tíquico huauquitaca, Éfeso pueblomanmi cacharcani.

13Troas pueblopi causajuj, Carpo shuti huauquipaj huasipimi, ruanata mingashpa shamurcani. Chaitaca librocunandi apamupangui. Quilcangapa alichishca pergaminocunatacarin, ama cungashpa apamupangui.

14Jirruta imamambash tigrachishpa ruraj Alejandro runami, ninandapacha llaquichihuarca. Chashna na alita rurashcashcamandaca, Apunchi Jesusmi llaquichinga.

15Chai runahuanga ama tandanajunguichu ninimi. Paica, ñucanchi villajujtaca na alicachishpami ninanda jarcajurca.

16Callaripica, cacharihuachun yashpami, mandajcunapaj ñaupajpi rimajurcani, ashtahuangarin chaipica tucuillami jichushpa saquihuarca. Chaitaca, Taita Diosca ama yaripachun ninimi.

17Ashtahuangarin, Apunchi Jesusmi ñucahuan carca. Paimi, Diospaj shimita villachun, ninan ushaita carahuarca. Chaimandami, na Israelcunapash tucuicuna uyachun villajurcani. Chashnami, leonbaj shimimandashna cacharichi tucurcani.

18Tucui ima na alita ama rurachunga, Pai mandashpa tiyajuj llactaman pushangacamanmi, Apunchi Jesusllata huacaichishpa charihuanga. Paitaca, causaita causaicaman ninanda alicachishunchi. Chashna cachun.

Aliguta causapanguichi nishpami bendiciashca

19Prisca shuti huarmitapash, Aquila shuti runatapash, Onesíforo shuti huauquipaj huasipi causajcunatapash, “alillachu capanguichi” nircami nipangui.

20Erasto shuti huauquica, Corinto pueblopimi saquirirca. Trófimo shuti huauquitaca huañujujtami, Mileto pueblopi saquishpa shamurcani.

21Tamia punllacuna nara chayajpillata, ucha shamupangui ninimi. Eubulo, Pudente, Lino, Claudia shuti crijcunapash, tucui crijcunapashmi, candaca “alillachu capangui” ninajun.

22Apunchi Jesucristoca, canhuan cachunmi munani. Diospaj ninan juyaipash, cangunahuan cachunmi munani. Chashna cachun.