NÚMEROS 19 - Quichua Imbabura 2016

Mapa illaj cangapa imatalla ruranamanda

1Mandaj Diosca Moisestapash, Aarondapash cashnami nijurca:

2“Mandaj Dios Ñucami, cai mandashcacunata cashna rurachun mandani: Israelcunaman cashna nishpa villangui: ‘Imapash nara tucushca tucui ali, nara yapushca, puca huarmi huagratami apamuna canguichi.

3Chai huagrataca, sacerdote Eleazarmanmi cuna canguichi. Paimi chai huagrataca, cangunapaj carpacunamanda caruman llujchishpa, paipaj ñaupajpillata cungata cuchushpa huañuchijuchun mandanga.

4Chai jipaca sacerdote Eleazarmi, chai yahuartaca paipaj maqui dedopi japishpa, Ñucahuan tuparina jatun carpa ñaupaman, canchiscaman tsirapachinga.

5Shinallata chai huagrataca, sacerdote ricujtami, caratapash, aichatapash, yahuartapash, huanundi rupachinajunga.

6Shina cajpimi sacerdoteca, cedro caspitapash, hisopo yuratapash, yana puca findutapash, huagra aicha rupajuj chaupipi shitanga.

7Chai jipami, sacerdoteca, paipaj churajunacunata tajshashpa, paipash armashpa, carpacunaman tigranga. Shina cashpapash, tutayangacamanmi paica mapallata saquiringa.

8Shinallata huagra aichata rupachijpash, paipaj churajunata tajshashpami paipash armanga. Shina cashpapash, tutayangacamanmi paipash mapallata saquiringa.

9Chai huagrata rupachishca uchufataca, mapa illaj shuj runa pallashpami, Israelcunapaj carpacunamanda caruman apashpa, mapa illaj pushtupi churagringa. Chai uchufataca, tandanajushca Israelcunami mapa illaj cangapa, armana yacupi chapungapa alichinajunga. Chaica, mapata anchuchingapami canga.

10Huagrata rupachishca uchufata pallaj runaca, paipaj churajunacunata tajshashpapash, tutayangacamanmi mapallata saquiringa. Cai mandashcacunaca, Israelcunapash, shuj llactamanda shamushpa paicunahuan causajcunapash, causaita causaicaman pactachingapami canga.

11Huañushcapi maijambash tacarishpaca, canchis punllacamanmi mapa canga.

12Huañushcata tacarishcamanda quimsa punlla tucujpimi, mapa illaj tucuna yacuhuan armashpa, canchis punllapipash cutin armashpa mapa illaj tucunga. Na chashna rurashpaca, canchis punllacamambash mapallatami saquiringa.

13Huañushcapi maijambash tacarishca cashpata, mapa illaj cangapa na armashpaca, Mandaj Dios Ñucapaj jatun carpatami mapayachin. Chai runaca, mapa illaj tucuna yacuhuan na tsirapachi tucushcamandami, Israelpuramandaca anchuchi tucunga. Chai runaca mapallatami saquirishca canga.

14Maijambash carpapi huañujpica, cashnatami rurachun mandashca: Chai carpaman maijan yaicujpash, chai ucupi tucui tiyajcunapash, canchis punllacamanmi mapa canga.

15Tucui mangacuna, na aliguta quilpashca cashpapash, mapami saquiringa.

16Espadahuan huañuchi tucushpa, pambapi sirijuj huañushcapi, na cashpaca yangata huañushca sirijujpi, na cashpaca gente tullupi, na cashpaca huañushcata pambashca utujupi, maijan cashpapash tacarishpaca, canchis punllacamanmi mapa canga.

17Mapayashca runata mapa illajta saquingapaca, juchamanda cushca chai huagrata rupachishca uchufata japishpami, ninanda rijuj yacuta tastapi japishpa chaipi churanga.

18Chai jipaca mapa illaj shuj runami, chai yacupi hisopo yurata mutiyachishpa, carpapipash, carpapi imalla tiyashcacunapipash, chaipi causajcunapaj jahuapipash tsirapachinga. Shinallata, gente tullupi, na cashpaca huañuchijpi huañushca sirijujpi, na cashpaca yangata huañushca sirijujpi, na cashpaca huañushcata pambashca utujupi tacarishca runapipashmi tsirapachinga.

19Mapa illaj runallatami, mapayashca runataca, quimsa punlla tucujpipash, canchis punlla tucujpipash, chai yacuhuan tsirapachinga. Canchis punllapi ña mapa illaj tucushpaca, paipaj churajunacunata tajshachun, paipash armachun. Shina rurashpami tutayajpica, mapa illaj canga.

20Maijambash mapayashca cashpata, na mapa illaj tucushpaca, tandanajushca Israelcunamandaca anchuchi tucungami. Paica, Mandaj Dios Ñucapajlla carpata mapayachishcamanda, mapa illaj tucuna yacuta na tsirapachi tucushcamandami, mapallata saquiringa.

21Chaica, cangunapaj tucui causaipi pactachinajuchun mandashca shimicunami. Shinallata, mapa illaj tucuchun yacuhuan tsirapachij runapash, paipaj churajunata tajshachun. Mapa illaj tucuna yacuta maijambash tacarishpaca, tutayangacamanmi mapa canga.

22Tucui ima tiyashcacunapi, chai mapayashca runa tacarijpica, mapami canga. Shinallata, imapash mapayashcapi maijan runapash tacarishpaca, tutayangacamanmi mapa canga’ nishpa villangui” nijurcami.