HECHOS 27 - Quichua Imbabura 2016

Roma pueblomanmi Pablota cachashca

1Ñucanchita Italia llactaman barcopi cachangapa rimarinajushpaca, Pablotapash, shuj prezu tiyajcunatapash, patsaj macanajuj runacunata mandaj Julioman cushpami cacharca. Chai patsaj macanajuj runacunaca, “Augusta” nishpa shutichi tucushcami carca.

2Adramitio shuti pueblomandaca, barcopimi rircanchi. Chai barcoca, Asia llactapi tiyaj pueblo manñacunapi shayarishpandi yalinami carca. Macedonia llactapi tiyaj, Tesalónica pueblomanda Aristarco shuti runapash, ñucanchihuanmi rijurca.

3Chai cayandimi, Sidón shuti puebloman chayarcanchi. Chai mandaj Julioca, Pablota ninanda llaquishpami, paipaj cumbacunapajman rijpi, imagutapash ricushpa paiman caranajuchun cacharcalla.

4Chai pueblomanda llujshishpa barcopi rinajujpimi, huaira ninanda tuparimurca, chaimandami Chipre llactata muyushpa yalircanchi.

5Cilicia, Panfilia llactacunaca, mama cucha chimbaman cajpimi rinajurcanchi. Shina rishpaca, Licia llactapi tiyaj Mira pueblomanmi chayarcanchi.

6Chaipimi, patsaj macanajuj runacunata mandaj runaca, Alejandría pueblomanda, Italia llactaman rijuj barcota japishpa, ñucanchitapash chaipi pusharca.

7Ninanda huaira tuparimujpimi, na ucha ri ushashpa, alimandalla rircanchi. Shina rinajushpami, Gnido shuti pueblo chimbapuraman atishpalla chayarcanchi. Huairajujpilla, na ri ushashpami, mama cucha chaupipi tiyajuj Creta llactata muyushpa, Salmón shuti rumi loma chimbapurata yalircanchi.

8Shinallata, na ucha ri ushashpami, manñatalla rishpa, Lasea shuti pueblo chayanallapi tiyaj, “Buenos puertos” nishca pushtuman chayarcanchi.

9Barcopi ringapaca, llaqui japinalla cajpimi, tauca punllacunata shuyashpa, na ucha ri usharcanchi. Judiocuna, na micushpa Diosta mañana punllacuna yalishca cajpimi, Pabloca paicunata shinllita rimashpa.

10Cashna nirca:

“Tucuilla cumbacuna. Cai punllacunapira rinajushpaca, ninan llaquicunata apanatami ricujuni. Cai barcopash, caipi imata apajushcapash, ñucanchipashmi yacupi chingaringa” nircami.

11Ashtahuangarin patsaj macanajuj runacunata mandajca, chai barcota purichij runahuan, barcota charij runahuan nishcatara uyashpami, Pablo imata nijushcataca na cazurca.

12Tamiana quillacunapica, barcocuna chaipi shayangapaca, na alichu carca. Shina cajpimi, mama cuchapi tiyajuj Creta shuti llactapillata tiyaj Fenice shuti pueblocaman ringapa, ashtacacuna munarca. Indi huashajunman chaimandallata ringapaca, uraimambash, janajmambash llujshinalla cajpimi, “tamia quillacunapica chaipi yaligrishun” ninajurca.

Mama cuchapimi, ninan huaira jatarishca

13Uramanda, vichaiman huairamujpi, ringapa ña ali cana cajpimi, barcota shayachij jirrucunataca, tandachishpa ri callarirca. Shina rishpaca, mama cucha chaupipi tiyajuj Creta llacta manñatami rinajurca.

14Ña ashata rijushca jipaca, “Euroclidón” nishca ninan huaira ñapash tuparimushpami, barcota ninanda cuyuchirca.

15Barcota huaira apajujpica, na imatapash rurai ushashpami, huaira apachun saquircanchilla.

16Mama cucha chaupipi tiyajuj Cauda shuti uchilla llacta huashata rijujpimi, na yapa huaira tuparirca. Shina cajpimi, uchilla canoataca, ninanda shaijushpa jahuaman churarcanchi.

17Chai jipaca, barco ama faquirichun nishpami, ninanda huatanajurca. Sirte shuti pushtu yacu ucupi t'iyu alpa lomayashcaman rishpa, pambarinatami ninanda manllarca. Chaimandami, “huaira maimambash apachun” nishpa, jatun facha huatashcacunataca pascanajurca.

18Chai cayandi punllapash, ninanda huairashpa, shinllitapacha tamiajujpimi, barcopi imatalla apajushcatapash, yacupi shitai callarirca.

19Quimsa punllacaman chashnalla cajpimi, barcota purichingapa imata charishcatapash, ñucanchi maquihuambacha shitarcanchi.

20Tauca punllacamanmi indipash, luzerocunapash na ricurirca. Ninan huairahuan, tamia ashtahuan shinlliyashpa catijujpimi, “ñana ashtahuan causaringachu” yanajurcanchi.

21Tauca punllacunatami na micushca carcanchi. Shina cajpimi, Pabloca, tucuicunapaj chaupipi shayarishpa cashna nijurca:

“Caipi rinajuj cumbacuna. Ñuca nishcata uyashpa, mama cucha chaupipi tiyajuj Creta llactamanda na llujshishpaca, na cashna llaquita apanajunchimanllu carca.

22Ashtahuangarin cunanga, ‘cushillami cana canguichi’ ninimi. Cangunapuramandaca, shujllapash na chingajpimi, cai barcolla chinganga.

23Cunan tutami, Taita Diospaj angelca villahuarca. Diospaj cashpami, Paipajta rurashca causani.

24Chai angelmi, cashna nihuarca: ‘Pablo, ama manllaichu, canga Cesarpajpi ricurinapachami cangui. Canda juyaimandami, cai barcopi rinajuj runacunataca, Taita Diosca tucuillata quishpichinga’ nihuarcami.

25Chashnata yachashpami, cangunaca cushijuna canguichi. Taita Dios ñucaman villashcata pactachinataca crinipachami.

26Shina cashpapash, mama cuchapi chaupipi tiyaj maijan llactamambash chayanapachami canchi” nijurcami.

27Ña chunga chuscu tutapi, huaira caiman chaiman apashpa rijujpimi, Adriático shuti mama cuchaman chayarcanchi. Ña chaupi tutapimi, barcota purichijcunaca, “ñami alpaman chayagrinchi” yanajurca.

28Yacu junduta yachangapa, cabiapi jirruta huatashpa cacharijpica, quimsa chunga sucta metrotami charirca. Chaimanda ashata rishpa, cutin ricujpica, ishcai chunga canchis metrotami charirca.

29Rumipi huajtarinata manllashpami, barco shayarichun, chuscu jirrucunata huashaman cacharirca. Shina cacharishpaca, “ucha punllayashcanman” yashpami shuyanajurca.

30Nara punllayajpillatami barcota purichijcunaca, saquishpa ringapa munanajurca. Shina munashpami, ñaupajmambash, jirrucunata cacharishun nij tucushpalla, uchilla canoataca uriajuchi callarirca.

31Shina ruranajujpimi, patsaj macanajuj runacunata mandajtapash, chaipi rinajuj macanajuj runacunatapash, Pabloca cashna nirca:

“Caicuna barcota saquishpa rijpica, huañunguichimi” nircami.

32Chashna nijpimi macanajuj runacunaca, chai uchilla canoata huatashcataca fitishpa, yacupi chingagrichun saquirca.

33Ña punllayajujpimi Pabloca, tucuicuna micuchun yashpa, cashna nirca:

“Ña chunga chuscu punllatami, puñuitapash na puñushpa, imatapash na micushpa, yarjai shamunguichi.

34Ama ungüi japichunga, imagutapash micunami canguichi. Cangunapajca, shuj ajchallapash na chingangachu” nircami.

35Cashna nishpallami Pabloca, tandata japishpa, tucuicunapaj ñaupajpi Taita Diosta pashi nishpa, chaupishpa micui callarirca.

36Shina micujta ricushpaca, paicunapash cushijushpami tucuicuna micunajurca.

37Chai barcopica, ishcai patsaj canchis chunga suctapuracunami rinajurcanchi.

38Ali micushca jipaca, “barco fangallayachun” nishpami, trigotaca yacuman shitanajurca.

Barco yacupi huashajushcamanda

39Ña punllayajpimi, barcota purichijcunaca, chai llactata na rijsishpapash, shuj cucha manña pambata ricurca. Chaipica, barcota shayachingapa alishnalla ricurijpimi, chaipi shayachingapa munanajurca.

40Yacu ucuman cacharishca jirrucunata charijuj huascacunata fitishpami, mama cuchaman shitanajurca. Barcota purichij caspicunata huatashcatapashmi pascanajurca. Yacu manñaman barcota huaira apachunmi jatun fachatapash huatanajurca.

41Chaipica, ishcandimanda rijuj yacu tuparishpami t'iyu alpata lomayachishca tiyarca. Barco ñaupaj ñapash pambarijpimi na llujshi usharca. Shina cajpimi, mama cucha ninanda shitarimushpa, barco huashata faquirca.

42Shina faquirijpimi, “prezu apamujushca runacuna ama shujllapash yacupi huambushpa llujshichun” nishpa, macanajuj runacunaca “huañuchishunlla” ninajurca.

43Ashtahuangarin patsaj macanajuj runacunata mandajca, Pablo huañuchun na munashpami, cashna nirca: “Yacupi huambunata yachajcunara, yacuman punda shitarishpa, manñaman llujshigrichi.

44Shujcunaca tablacunapi, barco faquirishca caspicunapi, huambushpa llujshigrichi” nircami. Chashna cashpami, na llaqui apashpa, tucuilla pambaman llujshishpa quishpirircanchi.