JEREMÍAS 2 - Quichua Imbabura 2016

Israelcuna, Mandaj Diosta na cazushpa pandashcamanda

1Mandaj Diosca, cashna nishpami villahuarca:

2“Jerusalenbi causajcuna uyachun, cashna nishpa villagri:

Mandaj Diosca, cashnami nin:

‘Candaca, chairalla viñai cuitsa cashpaca, Ñucata aliguta cazushpa causashcatami yarini.

Ñucahuan chairalla cazarashca cashpaca, Ñucataca ninandami juyahuarcangui.

Chaimandami, ima tarpushcapash na tiyaj, jichushca pambapipash, Ñucahuan pacta purircangui.

3Israel gentecunaca, Mandaj Dios Ñucapajlla shicanyachishcami carca.

Chagrapi punda fucushca granoshnami carca.

Paicunata llaquichijcunataca, Ñucami randi llaquichij carcani.

Jatun llaquicunata cachamushpami llaquichij carcani’ ninmi Mandaj Diosca nigri” nihuarcami.

4Jacobpaj mirai Israel ayllucunalla,

Mandaj Dios imata nijujtapash uyaichiyari.

5Mandaj Diosca, cashnami nirca:

“Cangunapaj ñaupa taitacunaca, Ñucamanda anchuringapaca, ¿Ima na alitata ricushcanga?

Paicunaca, rurashcalla dioscunata catishpami, ninanda pandarinajurca.

6Paicunaca, Egipto llactamanda llujchimuj Mandaj Diostaca, yaritapash na yarircachu.

Shinallata, jichushca, pipash na causaj pambacunata, huañui japinalla pushtucunata, chaquishca pambacunata,

pipash na purishca, pipash na causashca llactacunata, ricuchishpa pushamuj Diostaca, napacha yarircachu.

7Cangunataca, tucui imapash ashtacapacha tiyaj llactaman,

granocunapash ninanda fucujpi micushpa ali causanajuchunmi, pushamurcani.

Ashtahuangarin canguna yaicumushpami, Ñuca llactataca mapayachircanguichi.

Ñuca carashca alpatapash, huaglichishpami saquircanguichi.

8Sacerdotecunapash, Mandaj Dios Ñucataca na mascarcachu.

Ñuca mandashca shimita yachachijcunapash, Ñucataca na rijsihuarcachu.

Pushajcunapash, Ñucataca na cazurcachu.

Profetacunapash, Baal shuti diospaj shutipimi villanajurca.

Chashna cashpami, rurashcalla yanga dioscunatara catinajurca” nircami.

9Mandaj Diosca, cangunataca fiñarishpami llaquichigrini.

Cangunapaj miraicunapaj huahuacunatapashmi chashnallata llaquichigrini nircami.

10Yacu manñapi tiyaj Quitim shuti llactaman cangunallata rishpa ricuichiyari.

Cedar shuti llactamambash, alita ricushpa tigramuchun cachaichiyari.

Maipipash cangunashnachu causanajun, chaita ali ricuichiyari.

11Shuj llactapi causajcunaca, rurashca dioscunata catinajushcata saquishcachu?

Ashtahuangarin Ñuca agllashca gentecunaca, paicunata ruraj Diosta saquishpami, rurashcalla dioscunata catinajurca.

12Chaita ricushpaca, jahua pachapi ima tiyajcunapash ninandapachami manllarina canguichi.

Ninandapachami manllarina canguichi, ninmi Mandaj Diosca.

13Ñuca agllashca gentecunaca, ishcai jatun na alitami ruranajurca:

Pundaca, causaita caraj yacu llujshijuj pugyushnalla, Ñucatami jichuhuarca.

Chai jipaca, yacuta tandachingapa utujuta allajpipash, chijtarishca cashpami yacuca na tandanajurca.

14Israelcunaca, ¿shujcunapajta rurajcunachu? na cashpaca

¿gañangunachu? Shina cashpaca, ¿imamandashi prezu apai tucurca?

15Huahua leongunashna huacashpami, canda llaquichingapaca shamurca.

Paicunami, cai alpapica tucuchishpa chushajta saquirca.

Pueblocunatapash rupachijpimi, shujllapash na saquirirca.

16Menfis shuti, Tafnes shuti pueblocunapi causajcunapashmi,

cangunapaj umata faquingapa shamurca.

17Cai llaquicunaca, cangunata Mandaj Diosta na cazushpa causashcamandami, chashna shamurca.

18Cunanga, Nilo shuti jatun yacumanda ufiangapa, Egipto llactaman rishpaca, ¿imatashi taringui?

Shinallata ¿Éufrates jatun yacumanda ufiangapa

Asiria llactaman rishpapash imatashi taringui?

19Cangunapaj juchallatami llaquichinga.

Ñucata na cazushca juchallatami, cangunataca ninanda llaquichinga.

Cangunata Mandaj Dios Ñucata na cazushpa causanaca napacha ali cajtaca yachanami canguichi.

Ñucata manllashpa causanaca cangunapica napacha tiyanllu.

Chaitapash, tucuita Mandaj Jatun Dios Ñucallatami, chashna nini.

20Cangunaca, pundamandapachami Ñucata cazushpa causanataca saquishcanguichi.

Shina rurashpami: “Candaca, napacha cazushunllu” nircanguichi.

Shina rurashca jahuami lomacunapi, fanga junda quiru ucucunapi, culquimanda huainayaj huarmishna causarcanguichi.

21Cangunataca, alipacha agllashca uva yuratashnami, tarpurcani.

¿Imashpata cangunaca, sacha uva yurashna tucurcanguichi?

22Uchufa yacuhuan armajpipash,

ashtaca jabongunahuan armajpipash,

cangunapaj mapaca, Ñuca ñaupajmandaca napacha anchuringachu.

Ñuca ñavipica, cangunapaj juchaca ricurijungallami.

Mandaj Jatun Dios Ñucallatami, chashna nini.

23¿Imashpata cangunaca?: “Imahuambash na mapayashcachu canchi.

Baal shuti dioscunatapash, na mañashpami causarcanchi” ninguichi.

Pugru pambapi canguna imatalla rurashcatapash yarichiyari.

Imatalla rurashcatapash, ali yarichiyari.

Cangunaca, ñanmanda llujshishpa maitapash calpaj dromedaria huarmi animalshnami canguichi.

24Jichushca urcupi causajuj huarmi burru,

jarita mascashpa, huairata mutijishpa maitapash calpanshnami canguichi.

Chai huarmi burru shina calpariyajujtaca, ¿pita chari ushanga?

Jari burrucunaca, chashna calpariyajun huarmi burrutaca ñapash taringallami.

25“Lluchu chaqui purinapash,

yacunayachishca cunga chaquishca purinapash na ali cajtaca yachanami canguichi” nircanimi.

Ashtahuangarin cangunaca: “Napacha saqui usharingachu.

Ñucanchica shuj dioscunatami juyanchi, paicunatami catishpa rishun” nircanguichimi.

26Chai juchamandaca, shuhua japi tucushpa pingai tucushcashnami Israelcunaca saquiringuichi.

Paicunapash, paicunata jatun mandajcunapash,

paicuna churashca mandajcunapash, sacerdotecunapash, profetacunapashmi pingai tucunajunga.

27Paicunaca yamda caspitarami: “Canmi, ñucanchi taita cangui” ninajun.

Shinallata rumitarami: “Canmi, ñucanchi mama cangui” ninajun.

Paicunaca, Ñucata ricungapa randica, huashamanmi ricunajun.

Jatun llaqui japijpillami: “Quishpichihuayari” nishpa mañanajuhuan.

28¿Canguna rurashca dioscunaca maipitayari?

Judá llactapi causajcunalla.

Cangunapaj pueblocuna mashna tiyashcashnallatami, cangunapaj dioscunapash tiyan.

Llaqui punllacuna cangunata japijpica, paicuna quishpichi ushashpaca, quishpichingallami.

29¿Imashpata Ñucataca imatapash juchachihuanguichi?

Cangunaca, tucuicunami yachashpata na cazushpa, Ñucata fiñarcanguichi.

Mandaj Dios Ñucallatami, chashna nini.

30Cangunapaj huahuacunataca, yangallatami llaquichishcani.

Chashna llaquichijpipash, napacha ali tucunajurcachu.

Cangunaman villaj profetacunatapash espadacunahuanmi, millai leonshna huañuchircanguichi.

31¡Cunan miraicunalla!, Mandaj Dios Ñuca rimashcata ali uyaichi:

¿Ñucaca, Israelcunapaca jichushca pambashna,

na cashpaca, micha illaj llactashnachu carcani?

¿Imamandata Ñuca agllashca gentecunaca: “Cunanga cacharirishcami canchi.

Candaca cutinga napacha catishunllu” nircanguichi?

32¿Chairalla viñai cuitsaca, juyaillaguta churajunacunataca cunganllu?

¿Cazarangapa ña ari nishca cuitsapash, juyaillaguta alichirinataca cunganllu?

Ashtahuangarin Ñuca agllashca gentecunaca,

ña unai punllacunatami Ñucataca cungashpa causanajun.

33Cangunapaj juyashcahuan tuparingapaca,

¿imashpata juyaillaguta alichiringuichi?

Cangunaca chashnami, na ali huarmicunatapash na alita yachachishcanguichi.

34Cangunapaj churajunapash, imagutapash na charijcunapaj yahuarhuan,

ima na alitapash na rurajcunapaj yahuarhuan javirishcami.

Paicunataca, ima na alita rurashcatapash na tarircanguichu.

Shina cashpapash, cashnami ninguichi:

35“Ñucanchica, ima na alitapash na rurashpami causanchi. Diosca, ñucanchihuanga na fiñarircachu” ninguichimi.

Canguna: “Ima juchatapash, na rurashpami causarcanchi” nijujpipash,

Ñucami cangunataca imata rurashcatapash ricushpa llaquichisha.

36¿Imapata cangunaca, imatapash caita chaita rurashpa causanguichi?

Cangunataca, imashnami Asiria llacta na yanapashpa pingaichirca,

chashnallatami Egipto llactapash pingaichinga.

37Egipto llactamandapash, maquihuan umata llapirishpami tigramunguichi.

Mandaj Dios Ñucallatami, canguna yanapangami yashpa purishca llactacunataca tucuchircani.

Chaimandami paicunamandaca, ima alitapash na japinguichi.