ESDRAS 9 - Quichua Imbabura 2016

Esdrasca, Juchacunata villashpa Diosta mañashcamanda

1Chai tucuicunata tucuchishca jipami, Israelcunata mandajcunaca, ñucapajman shamushpa cashna nihuarca: “Israel gentecuna, sacerdotecuna, levitacunaca, cai llactapi causanajuj, cananeo, heteo, ferezeo, jebuseo, amonita, moabita, amorreo, Egipto llactapi causajcunamandaca na shicanyarishpami, paicunashnallata na alitapacha rurashpa causanajun.

2Chashna cashpami, paicunapajpash, paicunapaj churicunapajpash, chai gentecunapaj ushicunata japinajurca. Jucha illaj gentecunapaj miraicunami, shuj llacta gentecunahuan chapurishca. Shina juchata ruranataca, cati mandajcuna, llactata mandajcunarami callarishca” nishpami villanajuhuarca.

3Chashna na alita ruranajujta uyashpami, ñuca churajushcatapash, jahualla churajushcatapash liquircani. Ñuca uma ajchatapash, barbastapash anchuchishpami, ninandapacha llaquirishpa tiyajurcani.

4Chashna tiyajujpica, prezu apai tucushcamanda tigramushcacuna juchata ruranajujpimi, Israelcunapaj Taita Dios villashca shimicunata manllajcunaca, ñucahuan tandanajungapa shamurca. Ashtahuangarin, chishipi animalta Diosman cushpa rupachi callaringacamanmi, ninanda llaquirishpa tiyajurcani.

5Chishipi animalta Diosman cushpa huañuchi callarijpimi, llaquilla tiyajushcamandaca jatarircani. Ñuca churajushcatapash, jahualla churajushcatapash liquishca jipaca, cungurishpami, ñucata Mandaj Diospajman maquita vichai churashpa,

6cashna nishpa mañarcani: “Ñuca Taita Dioslla, Canda vichai ricushpa mañangapapash ninandami pinganayan. Ñuca Taita Dioslla, ñucanchi na alita rurashcacunaca, umacaman quilpajshnami ninanda mirashca. Ñucanchi juchacunapash ninanda mirashpami, jahua pachacaman chayashca.

7Ñucanchi ñaupa taitacuna causanajui punllamandapacha cunan punllacamanmi, jatun juchacunata rurashpa causashcanchi. Chaimandami, ñucanchipash, ñucanchita jatun mandajcunapash, ñucanchi sacerdotecunapash, shuj llactacunata jatun mandajcunapaj maquipi churai tucushcanchi. Espadahuan huañuchi tucushpa, prezu apai tucushpa, imatalla charishcatapash quichui tucushpami, jatun pingaihuan ñavita quilpashcashna, cunan punllacaman causanchi.

8Shina cajpipash cunanga, huaquinllapash chai llaquicunamanda cacharichi tucuchunmi, ñucanchita Mandaj Diosca, asha punllatallapash llaquishcangui. Imatapash na manllashpa, Cambaj huasipi aliguta causanata cungapami chashna llaquishcangui. Ñucanchi Taita Dioslla, ñucanchitaca shujcunapaj gañan tucushpa causanajushcamanda ashatallapash samachishpa, ñucanchi ñavita punchayachingapami, chashna llaquishcangui.

9Ñucanchica gañangunami canchi. Ashtahuangarin gañanguna cajpipash, ñucanchi Taita Diosca na jichushpa saquishcanguichu. Persia llactata jatun mandajcunamambash, ñucanchita llaquishpa causajta saquina yuyaitami cushcangui. Ñucanchi Taita Diospaj huasita urmachishcata cutin shayachinajuchunmi, Canllata ñucanchita ricushpa charingapa, cai Judá llactapi tiyajuj Jerusalenman pushamushcangui.

10Ashtahuangarin cunanga, ñucanchi Taita Dioslla, caita rurashca jipaca, ¿imatata ni ushapashunyari? Ñucanchillatami, Can mandashca Shimicunataca saquishcanchi.

11Chaicunataca, Cambajta ruraj profetacunahuanmi, cashna nishpa villashcangui: ‘Cangunapaj cachun japina llactaca, chai llactapi causaj gentecuna ninan na alita rurashpa causashcamandami, tucui cai alpataca mapayachishca.

12Chaimandami, cangunapaj ushicunata, paicunapaj churicunahuan, paicunapaj ushicunata, cangunapaj churicunahuanga napacha cazarachina canguichi. Paicunahuan pacta, imatapash rurashpa aliguta causanatapash napacha munanachu canguichi. Canguna shinlli tucushpa causangapa, chai llactapi fucushca ali micunacunata micushpa causangapa, alpacunatapash, cangunapaj mirai huahuacunaman tucui causaipaj saquingapami, chashnaca causana canguichi’ nishpami villaparcangui.

13Ashtahuangarin, ñucanchi na alicunata rurashpa causashcamanda, ñucanchi jatun juchamandami, cai tucui llaquicunaca shamushca. Shina cajpipash, ñucanchi Taita Dioslla, ñucanchi na alita rurashcashnaca na llaquichishpami, cai huaquinllatapash ñucanchihuan pushamushcangui.

14¿Ñucanchica, Can mandashcacunata cutin na cazushpachu, chashna na alicunata ruranajujpipash, paicunahuan tandanajushpa causashun? Chashna rurajpica, ¿nachu ñucanchita ninanda fiñashpa, cai huaquinlla puchushcacunatapash, shujllatapash na saquishpa tucuillata tucuchinguiman?

15Israelcunata Mandaj Dioslla. Canga, ali cashcatalla ruraj Diosmi cangui. Ñucanchica pacajushpa, cai huaquingunalla puchushcacunami, cunan punllacaman causanajunchi. Cambaj ñaupajpimi, ñucanchi juchacunapillata causanajunchi. Chaimandami ñucanchica, cambaj ñaupajpi ricuritaca na ushapanchi” nishpami, Diosta mañarcani.