2 SAMUEL 16 - Quichua Imbabura 2016

1Davidca, Olivo lomata yalishpa rijujpimi, Mefi-boset runapajta ruraj Siba shuti runaca tuparimurca. Paica, ishcai patsaj tandata, patsaj chaquichishca uva malquicunata, higota chaquichishpa rurashca patsaj tandata, shuj cara muchila vinota, ishcai burrupi apachishcami tuparimurca.

2Shina cajpimi, jatun mandaj Davidca, Siba shuti runataca:

“¿Caica imatayari?” nishpa tapujpi, Siba shuti runaca:

“Burrucunaca, can jatun mandajpaj huasi ucupuracuna tiyarinami. Tandacunaca, chaquichishca uvacunaca, cambajta rurajcuna micunami. Vinoca, jichushca pambata rinajushpa shaijushca cashpa ufianami” nirca.

3Shina nijpimi, jatun mandajca:

“¿Mefi-boset shuti runaca maipita?” nirca.

Shina nijpimi Siba shuti runaca:

“Paica: ‘Ñuca taitapaj taita Saúl mandajushcataca, cunan punllami Israel ayllucunaca ñucaman tigrachinga’ nishpami, Jerusalenbi saquirirca” nirca.

4Shina nijpimi jatun mandajca, Siba shuti runataca:

“Mefi-boset shuti runa tucui imatalla charishcapash, cambajmi canga” nirca.

Shina nijpimi, Siba shuti runaca urai cumurishpa:

“Jatun mandajlla, cambaj ñaupajpi ali ricurishpami, ali capaiman” nirca.

5Jatun mandaj Davidca, Bahurim shuti llactamanmi chayarca. Chaiman chayajpimi, Saulpaj huasi ucupuramanda, Gera shuti runapaj churi Simei runaca, 'candaca ima llaquipash japishpami ali canman' nishpa llujshimurca.

6Jatun mandaj Davidtapash, paihuan pacta rinajuj gentecunatapashmi rumicunahuan shitajurca. Ashtahuangarin, gentecunapash, shinlli runacunapashmi muyundi jarcashpa rinajurca.

7Shina cajpipash Simei shuti runaca:

“¡Huañuchij, jatun na ali runami cangui. Caimanda anchuri! nishpami, na alicachishpa rimajurca

8Saulpaj huasi ucupurata huañuchishpa yahuarta jichashcamandami, Mandaj Diosca candapash llaquichijun. Canga, Saulpaj randimi mandajurcangui. Cunanga, can mandanataca cambaj churi Absalonmanmi, Mandaj Diosca cushca. Can na alita rurashpa huañuchishpa, yahuarta jichashcamandami llaquita apajungui” nijurcami.

9Shina rimajujpimi, Sarvia shuti huarmipaj churi Abisai runaca, jatun mandajtaca cashna nirca:

“Na imata rurai ushaj cai runaca, ñucata jatun mandajtaca, ¿imashpata ima llaquipash japishpami ali canman nijunyari? Cungata muchushpa huañuchingapa richun saquihuai” nijurcami.

10Shina nijpimi jatun mandajca, cashna nirca:

“Sarvia shuti huarmipaj churicuna, ¿cangunaca imatapash na ricunachu canguichi? Pai chashna ninanda na alicachishpa rimajushpaca, Mandaj Diosllata Davidta na alicachishpa rimai nishca cajpimi, chashna rimajunga. Shina cashpaca, pita paitaca: ‘¿Imapata chashna nijungui?’ ningayari” nirca.

11Chai jipami Davidca, Abisai shuti runatapash, paipajta rurajcunatapash cashna nirca:

“Cunanga, ñuca churipachamari, ñucataca huañuchisha nijun. Benjaminbaj miraicunacarin, ¿Imashpata na chashna rurangayari? Chashna na alicachishpa rimajuchun saquichilla. Mandaj Diosllatami chashna mandashca canga.

12Chashna llaquihuan cajta Mandaj Dios ricushpaca, cashna ninanda na alicachi tucushcamandaca, Mandaj Diosllata ima alitapash carahuangapashchari” nircami.

13Davidpash, tucuilla paihuan rijcunapash ñanda rinajujpimi, Simei shuti runaca loma manñata ñaupashpa rijurca. Paica, “candaca ima llaquipash japishpami ali canman” nishpami, rumicunahuan, alpahuan shitashpa, Davidta ñaupashpa rijurca.

14Jatun mandajpash, paihuan rinajuj tucuilla gentecunapash ninanda shaijushca cashpami, shuj pushtupi samanajurca.

15Shinallata, Absalonbash, paihuan tandanajushca tucuilla Israel runacunapash, Ahitofel shuti runapashmi Jerusalenman yaicurca.

16Chai jipaca: Davidpaj ali cumba, arquitapura Husai shuti runa, Absalonhuan tuparingapa shamushpaca:

“¡Jatun mandajlla! ¡Jatun mandajlla!” nishpami caparijurca.

17Chashna nijujpimi Absalón runaca, Husai shuti runataca cashna nirca:

“¿Cambaj cumba alita rurashcamandaca, cashnachu rurangui? ¿Imashpata na cambaj cumbahuan rircangui?” nirca.

18Shina nijpimi Husai shuti runaca, Absalondaca cashna nirca:

“Na rishachu. Ashtahuangarin, Mandaj Diospash, cai gentecunapash, tucuilla Israel runacunapash, maijandami mandachun agllashpa churashca, paihuanmi saquirisha.

19¿Pita ñucata mandaj canga? ¿Nachu paipaj churipajta rurana cani? Imashnami cambaj taitapajta rurashpa causarcani, shinallatami canbajtapash rurashpa causasha” nirca.

20Chai jipami Absalón runaca, Ahitofel shuti runataca:

“Cunanga, ñucanchi imata rurangapapash yuyaita cuhuaichiyari” nirca.

21Shina nijpimi Ahitofel shuti runaca, Absalondaca cashna nirca:

“Cambaj taitapaj huarmicunahuan pacta puñui. Chai huarmicunataca, pai mandajushca huasita ricuchunmi saquirca. Can chashna rurashcata Israelcuna uyashpami, cambaj taitata na ricunayachishcataca yachanga. Shinami canhuan tandanajushca runacunaca, ashtahuan canda catinga” nirca.

22Shina nishpami, huasi jahua patiopi, shuj carpata Absalonman churanajurca. Chaipimi Absalonga, tucui Israelcuna ricujta, paipaj taitapaj huarmicunahuan pacta puñurca.

23Ahitofel shuti runa cushca yuyaicunaca, chai punllacunapica, Taita Dios rimashca shimita uyangapa tapushcashnami carca. Shinami, Ahitofel runa cushca yuyaicunaca, Davidpajpash, Absalonbajpash ali uyarirca.