1Jatun mandaj Nabucodonosor runaca, llactata ishcai huatata ña mandajushpami, muscuicunata charirca. Chaimandami, paillata napacha ali yuyaicunahuan cashpa, puñuitapash na ushajurca.
2Chai muscuicuna ima cajta villachunmi, jatun mandajca, yachajcunata, luzerocunata ricujcunata, brujucunata, cayachun cacharca. Paicuna shamushpaca, jatun mandajpaj ñaupajpimi shayarinajurca.
3Paicunamanmi, jatun mandajca cashna nirca:
“Ñucami shuj muscuita charishcani. Chaita ima cajta yachangapa munashpami, ñucallata imapash yuyaicunata maitapash yarijuni” nircami.
4Shina nijpimi, chai caldeo runacunaca jatun mandajtaca, arameo rimaipi cashna ninajurca:
“Jatun mandajlla, cambaj causaica causaita causaicaman cachun. Can muscushcata cambajta ruraj ñucanchiman villajpica, chai muscui ima cajtapash villashunllami” ninajurcami.
5Shina nijpimi jatun mandajca, chai caldeo runacunataca cashna nirca:
“Imata muscushcatapash cungashcanimi. Imashna muscushcatapash, chai muscui ima cajtapash na villashpaca, huañuchi tucunguichipachami. Cangunapaj huasicunapash, mapata shitana pushtucunami tucunga.
6Ashtahuangarin imashna ñuca muscushcata, chai muscui ima cajta villajpica, ashtaca alicunatami carasha. Cangunapaj ima ali canatapash, alicachi tucushpa causachumbashmi cusha. Shina cashpaca ñuca muscushcatapash, chai muscui ima cajtapash ucha villahuaichilla” nircami.
7Shina nijpica, cutinllatami cashna ninajurca:
“Jatun mandajlla, can muscushcata cambajta ruraj ñucanchiman villajpica, chai muscui ima cajtapash villashunllami” ninajurca.
8Chaimandami jatun mandajca cashna nirca: “Cangunaca, cangunata huañuchinapacha cajta yachashpami, imatapash juchachishpa na ucha villangapa munanguichi. Chaita yarinajujtaca, ñami yachani.
9Ñuca muscushcata na villashpaca, huañuchi tucunapachami canguichi. Cangunaca, llullashpa villangapa munashpami, na ucha villashpa jatun na alitapacha yarinajunguichi. Ñuca muscushca ima cajta villai ushanata yachangapaca, ñuca muscushcatara villahuaichi” nircami.
10Shina nijpimi caldeo runacunaca, jatun mandajtaca cashna ninajurca:
“Jatun mandaj tapushcata tigrachingapaca, cai pachapica pipash na tiyangachu. Ashtahuangarin yachajcunata, luzerocunata ricujcunata, caldeo gentecunataca, ninan ushaita charij, maijan jatun mandajpash, maijan cati mandajpash, can tapushcashnaca na tapushcachu.
11Can jatun mandaj tapushcata tigrachinaca yapa shinllimi capan. Can jatun mandajman chaita villaitaca, pipash na ushangachu. Dioscunallami chaitaca tigrachi ushanga. Paicunaca, na runacunahuan causanllu” ninajurcami.
12Chaita uyashpami jatun mandajca, ninanda fiñarishpa Babilonia llactapi causanajuj alipacha yachajushcacunataca, tucuillata huañuchinajuchun mandarca.
13Alipacha yachajushcacunata huañuchinajuchunga, quilcachishpami tucuicunaman villachun cacharca. Danieltapash, paipaj quimsa cumbacunatapashmi huañuchingapa mascanajurca.
14Paicunata japijpimi Danielca, jatun mandajta ricuj runacunata mandaj Arioc shuti runataca, ali yachaihuan yarishpa rimarca. Chai mandajmi, Babilonia llactapi causaj alipacha yachajushca runacunata huañuchingapa llujshishca carca.
15Danielca, jatun mandaj churashca Arioc shuti runatami, cashna nirca:
“Jatun mandajca, ¿imamandata chai quilcashcataca, ñapash tucuicunaman villachun mandashca?” nircami.
Shina nijpimi chai runaca, imamanda chashna rurashcatapash Danielman villarca.
16Danielca, jatun mandajpajman yaicushpami, jatun mandaj muscushcacuna ima cajta villangapa asha punllacunata shuyachun mañarca.
17Chai jipaca Danielca, paipaj huasiman rircallami. Shinallata Ananías, Misael, Azarías shuti paipaj cumbacuna yachachunmi, tucuita villajurca.
18Jahua pachapi causajuj Taita Dios llaquishpa, pipash na yachai ushashcata ricuchijuchunmi, Danielpash, paipaj cumbacunapash, Babilonia llactamanda alipacha yachajushca runacunahuan ama huañungapa, chashna mañachun villarca.
19Chashna mañajpimi pipash na yachashcataca, tuta muscuipi Danielman ricuchirca. Chaimandami Danielca, jahua pachapi causaj Taita Diostaca, ninanda alicachijurca.
20Danielca cashnami nijurca:
“Taita Diospaj shutica,
causaita causaicaman alicachi tucushca cachun.
Ninan ushaipash, ali yachaipash, Paipajmari.
21Paimi punllacunatapash, huatacunatapash, shujman tigrachin.
Paimi, jatun mandajcunatapash churan, Paillatami anchuchin.
Paimi, alipacha yachajushca runacunamambash ali yachaita cun,
ali yuyaita charijcunamambash alipacha yachajushca canatami cun.
22Imapash pacallapacha tiyajtapash, yana tutapi pacalla tiyajtapash, Paica yachanllami.
Michaca, Paihuanmi tiyan.
23Ñuca ñaupa taitacunapaj Taita Dioslla,
Candami pashi nishpa alicachijuni.
Canmi ali yachaitapash, ushaitapash carahuashcangui.
Ñucanchi mañashcata uyashpami,
Jatun mandaj muscushca ima cajtapash ñucanchiman villashcangui” nijurcami.
24Chai jipami Danielca, Arioc shuti runapajman rirca. Chai runatami, jatun mandajca Babilonia llactamanda alipacha yachajushca runacunata huañuchijuchun mandashca carca. Paitami Danielca, cashna nirca:
“Babilonia llactapi causanajuj alipacha yachajushca runacunataca, ama huañuchipaichu. Jatun mandajpaj ñaupajmanga ñucata pushahuailla. Pai muscushcacuna ima cajtaca, ñucami villashalla” nircami.
25Shina nijpimi Arioc shuti runaca, Danieltaca jatun mandajpajman ucha pushashpa, cashna nirca:
“Judá llactamanda prezu apamushca runapurapimi, shuj runata tarircani. Paimi, can jatun mandaj muscushcacuna ima cajtaca villanga” nircami.
26Shina nijpimi jatun mandajca, Beltsasar shuti Danieltaca:
“Ñuca muscushcata, chai muscushcacuna ima cajtaca, ¿canllu villai ushagringui?” nirca.
27Shina nijpimi Danielca, jatun mandajtaca, cashna nirca:
“Jatun mandajlla, pipash na yachai ushashcata can tapushcataca, alipacha yachajushca runacunapash, luzerocunata ricujcunapash, yachajcunapash, yumbucunapash, can jatun mandajman villaitaca na ushanllu.
28Shina cajpipash jahua pachapimi, pipash na yachai ushashcacunata ricuchij Taita Dios tiyan. Paimi tucurimui punllacunapi ima tucunatapash, can jatun mandaj Nabucodonosorman ricuchishca. Ricui, cashnatami muscushcangui: Can puñujushpaca, cashnatami muscuipi ricushcangui:
29Jatun mandajlla, canga cambaj camapi sirijushpami, jipa punllacuna ima tucunata yachangapa munajurcangui. Chaimandami, pipash na yachai ushashcacunata ricuchijca, jipa punllacuna ima tucunata canman ricuchishca.
30Pipash na yachai ushashcataca, ñucamanmi ricuchihuarca. Tucui cai pachapi causajcunata, yali yachajushca cashcamandaca, na ricuchihuarcachu. Ashtahuangarin can jatun mandaj muscushcacuna ima cajta canman villachun, cambaj shungupi yarijushcacunata can yachai ushachunmi ricuchihuarca.
31Can jatun mandajca, shuj jatun runaman rijchajtami, cambaj ñaupajpi shayarijta muscurcangui. Chai runaman rijchajca, ninan jatun, ñavipash manllanayaita ricujujmi carca.
32Chai runaman rijchajpaj umaca, ashtahuan ali curimi carca. Cungamanda vijsacamambash, rigracunapash culquimi carca. Vijsamanda uraica, broncemi carca.
33Changacunaca, jirrumi carca. Chaquipash, ashaca jirru, ashaca cusashca turuhuan chapumi carca.
34Chaita ricujujpillatami shuj rumica, pipash na faquijpillata faquirishpa urmamunda ricurcangui. Chai rumica, jirruhuan, cusashca turuhuan chapushpa rurashca, chai runaman rijchajpaj chaquitami faquishpa ñuturca.
35Chai rumi huajtajpica jirrutapash, cusashca turutapash, broncetapash, culquitapash, curitapash ñutujpimi, trillashca ñutu jupashna tucurca. Chaitaca, huaira shamushpami, imatapash na saquishpa tucuillata aparca. Ashtahuangarin runaman rijchajta ñutuj chai rumica, tucuilla cai llacta junda, jatun urcumi tucurca.
36Can jatun mandajca chashnatami muscurcangui. Chai muscui ima cajtami villagrinchi.
37Jatun mandajlla, canga jatun mandajcunata jatun mandajmi cangui. Llactacunata mandanata, ninan ushaita, ninan shinlli canata, mandana ushaitaca, jahua pachapi causajuj Taita Diosmi canman cushca.
38Huañuna aichayuj runacuna maipilla causanajujta, sacha animalcunata, jahuata rij alasyu animalcunataca, tucuitami cambaj maquipi churarca. Tucuitami can mandachun curca. Chai curi umaca, canllatami cangui.
39Cambaj jipaca, shuj jatun mandajmi mandanga. Paica, na can jatun mandajshna ushaita charingachu. Ishcaipaj catipashmi, shuj llacta mandangapa jataringa. Chaica, bronceshnami canga. Chaimi, tucui cai pachata mandanga.
40Quimsapaj cati mandajuj shuj llactaca, jirrushna shinllimi canga. Imashnami jirruca faquishpa ñutushpa tucuchin, chashnallatami paica tucuillata ñutushpa tucuchinga.
41Shinallata chaquipi, dedocunapica, ashataca alpahuan rurajcuna cusashca turuhuan, ashataca jirruhuan rurashcatami ricurcangui. Chaica, ishcaipi shicanyarishca shuj llacta mandajujtami ricuchijun. Ashtahuangarin imashnami ashataca jirruhuan, ashataca cusashca turuhuan ricurcangui, chashnallatami chai llactapipash jirrushna shinlli mandajunga.
42Chaqui dedocunapash, ashaca jirru, ashaca cusashca turutami ricurcangui. Chashnallatami, ishcaipi shicanyarishca llactaca, chaupica shinlli, chaupica urmanalla llacta canga.
43Jirruhuan, turuhuan chapushpa rurashcata can ricushcashnami, runapuralla ari ninajushpa tandanajunga. Ashtahuangarin jirruca, turuhuanga na chapurinchu. Shinallatami paicunapash, caishujmanda chaishujmanda na tandanajunga.
44Chai jatun mandajcuna mandajui punllacunapimi, jahua pachapi causajuj Taita Diosca, ima punllapash na tucuchi tucuna mandana llactata churanga. Chai mandana llactataca, na runacunamanlla cungachu. Chai Jatun mandajca, cai tucuilla mandana llactacunatami ñutushpa tucuchinga. Ashtahuangarin paica, causaita causaicaman mandajungallami.
45Pipash na faquijpita, shuj rumi faquirishpa urcumanda shamushpaca, jirruta, bronceta, turuta, culquita, curitapash ñutujtami ricurcangui. Chaitaca, jipa punllacunapi chashna tucunatami Jatun Taita Diosca, can jatun mandajman ricuchishca. Chai muscuica, napacha llulla cajpimi, chai muscui ima cajta villajuni” nijurcami.
46Shina villajpimi, jatun mandaj Nabucodonosor runaca, Danielpaj ñaupajpi cungurishpa, alpaman chayajta urai cumurirca. Ofrendatapash cushpami, inciensota cushnichinajuchun mandarca.
47Jatun mandajca, Danieltaca cashnami nirca:
“Cangunapaj Taita Diosca, tucui dioscunapaj Taita Diosmi, jatun mandajcunatapash Mandajmi. Pipash na yachai ushashcacunata ricuchij Diosmi. Chaimandami, pipash na yachai ushashcataca, ñucaman villai ushashcangui” nircami.
48Shina nishpami jatun mandajca, Danieltaca, ninanda alicachi tucuna pushtupi churashpa, ashtaca caranacunata cararca. Paitaca, tucui Babilonia llactata cati mandaj cachunmi churarca. Shinallata Babiloniapi causanajuj tucuilla alipacha yachajushcacunata mandaj cachumbashmi churarca.
49Jatun mandajta Daniel mañajpimi, Sadrac, Mesac, Abed-nego shuti paipaj cumbacunatapash, Babilonia llactapi imatapash ricushpa mandanajuchun churarca. Danielca, jatun mandaj mandashpa tiyajuj ucupimi saquirirca.
Who We AreWhat We EelieveWhat We Do
2025 by iamachristian.org,Inc All rights reserved.
