1Mandaj Diosca, cashnami nihuarca:
2“Huañuna aichayuj runa, Israel llactapi lomacunata vichai ricushpami, llaquichina punllacuna chayamujujta villana cangui.
3Paicunataca cashna ningui: ‘Israel lomacunapi causajcunaca, Mandaj Dios rimajujtami uyana canguichi. Mandaj Diosca, urcucunatapash, lomacunatapash, chaipi yacucunatapash, pugru pambacunatapash cashnami nin: Ñucallatami cangunata llaquichijuchun macanajuita cachamushpa, lomacunapi tiyaj cangunapaj altarcunatapash tucuchisha.
4Cangunapaj altarcunatapash, ñutushpami tucuchisha. Indiman rijchaj, rurashcalla dioscunatapashmi tucuchisha. Rurashcalla dioscunapaj ñaupajpimi, cangunatapash huañuchishpa tucuchisha.
5Israelcuna huañushcataca, rurashcalla dioscunapaj ñaupajpimi tandachishca canga. Paicunapaj tullucunaca, altar muyundipimi, shitashca siringa.
6Canguna causanajushca pueblocunapash, lomacunapi altarcunapash, tucuillami chinganga. Indiman rijchaj rurashcalla dioscunapash, tucuillami ñuturishpa tucuringa. Canguna imatalla rurashpa charishcapash, tucuillami tucuringa.
7Tucuicuna huañushca sirinajujta ricushpami, Ñucataca Mandaj Dios cajta yachanguichi.
8Jatun macanajuipi na huañushpa puchushcacunaca, caru llactacunaman rishpami casunajunga. Paicunataca, Ñuca calpachijpimi, caita chaita rishpa causanajunga.
9Cangunapuramanda pacajushpa quishpirishcacunaca, shuj llactacunapi prezu causashpami, ñucata yarinajunga. Paicuna, Ñucata saquishpa rurashcalla dioscunatara catijpimi, ninanda llaquirircani. Chashna na alicunata rurashcata yarishpami, ninanda pingai tucunajunga.
10Ñucataca, Mandaj Dios cajtami yachanajunga. Shinallata, llaquichishami nishcataca, pactachijpacha cashcatami yachanga’ nishpa villai” nihuarcami.
11Mandaj Jatun Diosca, cashnatapashmi nihuarca: “Maquitapash huactarishpa, chaquihuambash tushurishpa cashna nishpa villangui: ‘Israel gentecuna chai juchacunata rurashcamandaca, ¡aij imachari tucunga!’ Paicunaca, jatun macanajuipi, ninan yarjaihuan, millai ungüicunahuanmi huañunga, ningui.
12Caru llactapi causajcunaca, millai ungüihuanmi huañunga. Llactapillita causajcunaca, macanajuipimi huañunga. Pacajushpa quishpirishcacunaca, nina yarjaihuanmi huañunga. Chashna llaquichishpami, Ñuca fiñarishcataca yalichisha.
13Paicuna huañushpaca, rurashcalla dioscunapaj ñaupajpi, altar muyundicunapi, lomacunapi, urcucunapi, fanga junda yura ucucunapi, encina quiru ucucunapimi, sirinajunga. Chaita ricushpami Ñucataca, Mandaj Dios cajta yachanguichi. Chai pushtucunapimi, rurashcalla dioscunaman inciensota cushnichinajurca.
14Paicunataca, Ñucapaj ninan ushaihuanmi llaquichisha. Paicuna maipi causanajujpipash, Diblat shuti puebloman rina ñambi tiyajuj, jichushca pambatapash yali jichushcatami saquisha. Shina llaquichijpimi, Ñucataca, Mandaj Dios cajta yachanajunga” nihuarcami.
Who We AreWhat We EelieveWhat We Do
2025 by iamachristian.org,Inc All rights reserved.
