LEVÍTICO 25 - Quichua Imbabura 2016

Alpata samachinamandapash, tucui imacunata cacharichinamandapash

1Mandaj Diosca, Sinaí urcupimi Moisestaca cashna nijurca:

2“Israelcunaman cashna nishpa villangui: ‘Cangunaman, Ñuca carashca llactaman yaicushpaca, Mandaj Dios Ñucata alicachingapami, alpacunapi na tarpushpa samachina cangui.

3Sucta huatacamanmi, cambaj alpapi tarpushpa, uva malquicunatapash fitishpa, uva fucushcatapash pallana cangui.

4Ashtahuangarin canchis huatapica, cambaj alpataca, Mandaj Dios Ñucapaj samana cashcamandami, chai huatapica, na tarpuna cangui. Uva malquicunatapash na fitinachu cangui.

5Uvata tandachishca alpapi paimanda fucushcatapash na tandachinachu cangui. Alpata samachina huata cajpimi, cambaj uva chagrapi fucushcataca, na pallajuna cangui.

6Ashtahuangarin, alpacunata samachijui huatapi fucushcacunaca, cambash, cambajta ruraj jaripash, huarmipash, culquipaj imatalla rurajpash, shuj llactamanda shamushpa cambaj llactapi causajuj runapash micungapami canga.

7Cambaj alpapi fucushca tucui granocunaca, cambaj animalcunapash, cambaj llactapi tiyaj shuj animalcunapash micuchunmi canga.

8Canchis huatacunataca, canchiscaman yupajpimi, chuscu chunga iscun huatacunaca pactanga.

9Chai huatapimi, canchis quillapaj chunga punllapica, trompetata shinllita huacachishpa uyachijuchun mandana cangui. Juchamanda Diosman cuna punllapimi, cangunapaj tucui llactapi chashna trompetata huacachijuchun mandana cangui.

10Ña picha chunga huata tucujpimi, chai huatataca Diospajlla cachun shicanyachina cangui. Shinallata, Israel llactapi causajcunapajca, “tucui imamandapash cacharirina huatami” nishpami, villana cangui. Chai huatapica, cutin tigrachina huata cajpimi, tucuicuna cangunapaj alpacunaman, paicunapaj ayllucunapajman tigranajunga.

11Picha chunga huatapica, cutin tigrachina huatami canga. Chai huatapica, imatapash na tarpunachu canguichi. Paimanda fucushca granocunatapash, na tandachinachu canguichi. Cangunapaj uvatapash na pallajunachu canguichi.

12Chai huataca, cutin tigrachina huata cajpi, Diospajlla shicanyachishca cajpimi, pambapi paimanda fucushcacunatalla micunguichi.

13Tigrachina huata cajpimi, cangunapaj alpacunataca tucuicuna tigra japinguichi.

14Piman, imata jatushpapash, imata randishpapash, pitapash na umachinachu canguichi.

15Tigrachina huata yalishca jipamanda mashna huata cajpipash, chaita ricushpami randina cangui. Shinallata jatuj runapash, mashna huatata tarpuna cajpipash, chaita ricushpami jatuna canga.

16Tauca huatata tarpuna cajpica, ashtaca culquita mañangui. Ashalla huatata tarpuna cajpica, ashalla culquita mañangui. Mashna huatata granota tandachina cajpipash ricushpami, jatuj runapash canman jatunga.

17Cangunaca pitapash na umachinachu canguichi. Ashtahuangarin, cangunapaj Taita Diostami manllashpa causana canguichi. Ñucami, cangunata Mandaj Taita Dios cani.

18Ñuca mandashca shimicunataca pactachishpami causana canguichi. Shina rurashpami, chai llactapica imatapash na manllashpa aliguta causanguichi.

19Pambacunapi granocuna fucushcataca, na munangacaman micushpami, chai llactapica imatapash na manllashpa, aliguta causanguichi.

20Cangunaca cashnami ninguichi: Imatapash na tarpushpa, ima granotapash na tandachishpaca, samana canchis huatapica, ¿imatashi micushun? ninguichimi.

21Sucta huatapica, Ñuca ninanda bendiciajpimi, granocunaca quimsa huatacaman pactanata fucunga.

22Ña pusaj huatapica tarpunallami canga, shina cashpapash, alichishca granotallatami, iscun huatacaman micuna canguichi. Chai tarpushca granocuna fucungacamanmi, chaitallata micuna canguichi.

23Alpaca Ñucapaj cashcamandami, na tucui causaipaj jatuna canguichi. Cangunaca, shuj llactamanda purij runashna, caru llactamanda shamushcashnami Ñucapaca canguichi.

24Shinamandami canguna randishca alpacunataca, chai jatuj runallata tigrashpa randichun saquina canguichi.

25Cambaj llactapurallatami, imagupash illaj saquirishca caimanda alpata jatunga. Shina jatujpica, chai jatuj runapaj huasi ucu ayllupurami, chai alpataca, culquita tigrachishpa japinga.

26Maijan cashpapash, chai jatushca alpamanda culquita tigrachishpa yanapaj aylluta na charishpami, chai alpamanda tigrachi pactanata culquita tandachinga.

27Shina cashpami, jatushca huatamandapacha cutin tigrachina huatacaman yupashpa, mashnata cuna cajpipash, chaitapacha cunga. Shina cushpami, paipaj alpataca tigra japinga.

28Ashtahuangarin, alpamanda culquita tigrachingapa na charijpica, alpata cutin tigrachina huata chayangacamanmi randijpajllata saquiringa. Cutin tigrachina huata chayajpimi, paipaj alpataca tigra japinga.

29Maijan cashpapash, muyundi pircashca pueblopi huasita jatushpaca, jatushca punllamanda shuj huatacamanllami chai huasimandaca, culquita tigrachishpa cutin japi ushana canga. Culquita cushpa cutin tigrachishpa japi ushanaca, shuj huatacamanllami canga.

30Ashtahuangarin, muyundi pircashca pueblopi charishca huasita jatuj runaca, shuj huata tucungacamambash, randij runaman culquita na tigrachi ushajpica, chai huasica randij runapaj, paipaj miraicunapajmi tucui causaipaj saquiringa. Cutin tigrachina huata pactajpipash, na tigrachingachu.

31Ashtahuangarin, muyundita na pircashca uchilla llactacunapi huasicunata jatushca cashpaca, chaicunaca alpacunata jatushcashnami canga. Chaimandami, cutin tigrachina huata chayajpica tigrachi ushanalla canga.

32Ashtahuangarin levitacunapaj pueblocunapica, paicuna jatushca huasicunataca ima punlla cashpapash cacharichi ushangallami.

33Levitacunapaj huasita randijca, cutin tigrachina huata chayajpica, chai huasimandapash, chai pueblomandapash llujshinapachami canga. Israelcuna causanajuj llactapica, levitacuna causachun cushca cajpimi, chashna llujshinapacha canga.

34Ashtahuangarin, levitacuna causanajuj pueblo muyundipi pambacunataca, paicunaman cushcapacha cajpimi, chaicunataca na jatui ushanga.

35Cambaj llactapurallata imagupash illaj tucushpa, cambajman mingaringapa shamujpica, juyashpami chasquina cangui. Paica, shuj llactamanda purij runashna, shuj llactamanda shamushca runashnami cambaj huasipi causanga.

36Culqui mañachishcamandaca na yapata mirachishpa japinachu cangui. Ashtahuangarin, cambaj Taita Diostami manllana cangui. Cambaj llactapura runaca, cambaj huasipimi causanga.

37Culquita mañachishpaca, na yapata mirachishpa japinachu cangui. Ima micunata carashpapash, na culquita mañanachu cangui.

38Cangunata Mandaj Taita Dios Ñucami, Canaán llactata cangunaman carangapa, Egipto llactamanda llujchimurcani. Cangunapaj Taita Dios cangapami llujchimurcani.

39Cambaj llactapurallata canhuan causajushpa, imagupash illaj tucushpa canman jaturijpica, ama gañandashna charinguichu.

40Paitaca, culquipaj imatapash ruraj runatashna, shuj llactamanda shamushca runatashna charingui. Paica, cacharina huata chayangacamanmi cambajta rurashpa causajunga.

41Chai jipaca, cambaj huasimandaca llujshishpa ringallami. Paipash, paipaj huahuacunapashmi, paipaj ayllucunapajman tigranga. Paipaj taitapaj alpatallata cutin japishpami, chaipi causagringa.

42Paicunaca, Ñucapajta rurajcunami. Paicunatami, Egipto llactamandaca llujchimurcani. Chaimandami, paicunaca gañanshnaca na jaturinga.

43Paicunataca na ninanda llaquichishpa, mandashpa charinachu cangui. Ashtahuangarin, cambaj Taita Diostami manllana cangui.

44Shina cashpami, cangunapaj llacta muyundipi causajcunataca, cambaj gañan cachunga, jarita cashpa, huarmita cashpapash randinalla cangui.

45Shinallata, shuj llactamanda shamushpa cangunahuan causajcunapaj huahuacunatapashmi, gañan cachunga randi ushanguichi. Cangunapaj llactapi huacharishca, paicunapaj ayllucunatapash randinguichilla. Paicunatami, cangunapaj cachun randi ushanguichi.

46Paicunataca, cangunapaj huahuacunamambash, paicunapaj cachun carashcatashna saqui ushanguichimi. Paicunataca, tucui causaipimi tucuita rurachishpa chari ushanguichi. Ashtahuangarin, cangunapaj llactapurallata Israelcunataca, pitapash na ninanda llaquichishpa, mandashpa charinachu canguichi.

47Shuj llactamanda purij runa, na cashpaca, shuj llactamanda shamushpa chaipi causajuj runacunarami charij tucunga. Shina cajpi, cambaj llactapuramanda, maijan cashpapash imagupash illajmi tucunga. Shina cashpami, shuj llactamanda purij runaman, na cashpaca shuj llactamanda shamushpa causajuj runaman, na cashpaca chai runapaj aylluman jaturinga.

48Shina jaturishca cajpipash, paipaj ayllupurallatami culquita cushpa cacharichi ushanga.

49Taitapaj huauqui cashpa, taitapaj huauquipaj churi cashpa, paipaj ayllupurallata maijan cashpapash, cacharichi ushanmi. Shinallata, paillata culquita tigrachi ushashpaca, paillata cachariri ushanmi.

50Randij runahuanga, jaturishca punllamandapachami cacharina huata chayangacaman, mashna huata cajpipash, chaimanda culquita cunataca yachanga. Culquita cujpi imatapash ruraj runaman, mashna culquita cuna cashcashnami, mashna huata cajpipash chashnallata cuna canga.

51Jaturij runa cachariringapa, ashtaca huatata tiyajpica, randij runamanga, chai randishca tucuilla culquitallatami tigrachinga.

52Cacharina huata chayangapa ashalla tiyajpica, chai huatacunamandalla mashnata tigrachina cajpipash, chaita ricushpallami tigrachinga.

53Huatacaman imatapash rurajpi culquita cuna runatashnami, paitaca charina. Cambaj ñaupajpica, na ninanda llaquichishpa mandanachu canga.

54Chai huatacunapillata culquita na tigrachi ushashpa, na cacharichijpica, cacharina huata chayajpimi paipash, paipaj huahuacunapash llujshinga.

55Israelcunaca, Ñucapajta rurajcuna cashcamandami, shina llujshinga. Paicunaca, Egipto llactamanda llujchimushca, Ñucapajta rurajcunami. Ñucami, cangunata Mandaj Taita Dios cani.