DANIEL 5 - Quichua Imbabura 2016

Pircapi quilcashcata ricushcamanda

1Jatun mandaj Belsasarmi, paita cati huaranga mandajcunaman, jatun micuita rurarca. Chai huaranga mandajcunapaj ñaupajpimi, paica vinota ufiajurca.

2Belsasar runaca, cushijushpa vinota ufiajushpami, paipaj taita Nabucodonosor, Jerusalenbi Diospaj huasimanda, curi copata, culqui copata apamushcata, apamuchun cacharca. Chai copacunapi, paipaj cati mandajcunapash, paipaj huarmicunapash, cati huarmicunapash ufianajuchunmi, apachun cacharca.

3Jerusalenbi tiyajushca Diospaj huasimanda apamushca, curi copacunatami apamurca. Chai copacunapimi, jatun mandajpash, paipaj cati mandajcunapash, paihuan causaj huarmicunapash ufianajurca.

4Vinota ufiashpami, curita, culquita, bronceta, jirruta, caspita, rumita rurashca dioscunata alicachinajurca.

5Chashna ruranajujpimi, candelero ñaupajpica, calhuan yurajyachishca mandashpa tiyajuna huasi pircapi, gentepaj maquihuan quilcajuj ricurirca. Chai quilcajuj maquitaca, jatun mandajmi ricurca

6Chaita ricushpaca, jatun mandajca ninanda manllarishpami, ñavicunapash huañungashna yurajyarca. Shina ninanda manllarishpami, ushai illaj tucushpa, cunguricunapash paipura huajtarijurca.

7Chaimandami jatun mandajca, yachajcunata, caldeo runacunata, yumbucunata pushamuichi nishpa, ninanda caparijurca. Babilonia llactapi causaj yachajcuna, chayamujpimi cashna nijurca:

“Chai pircapi quilcashca tiyajujta quilca catishpa, maijambash ima cajta villai ushajpica, yana puca churajunatami churachisha. Cungapipash, curi cadenatami churachisha. Ñuca mandajuj llactapipash, ishcaipaj jipa mandaj cachunmi churasha” nirca.

8Tucui yachajcuna, jatun mandajpaj ñaupajman shamushpapash, chai quilcashcataca na quilca cati usharcachu. Chai quilcashca ima nijujtapash, na villai usharcachu.

9Chaimandami jatun mandaj Belsasarca, ninanda manllarishpa ñavipash huañungashna tucurca. Paipaj cati mandajcunapash, ninanda manllarishpami, imata ruraitapash na ushanajurca.

10Jatun mandajpash, cati mandajcunapash ninanda rimarinajujta uyashpami, Jatun mandaj huarmica, jatun micui ucuman yaicushpa cashna nijurca:

“Jatun mandajlla, canga unaitami causangui. Ama yapata manllarishpa, ñavicunapash huañungashna tucuichu.

11Can mandajuj cai llactapica, shuj runapimi jucha illaj Diospaj espíritu causajun. Cambaj taita causajui punllacunapica, paimi michashna punchayachijuj, tucuita ali yachachijpash carca. Paitami, cambaj taita jatun mandaj Nabucodonosorca, tucui yachajcunata, luzerocunata ricushpa yachajcunata, caldeo runacunata, yumbucunata, mandachun churarca.

12Chai runaca Danielmi. Paitami, jatun mandajca, Beltsasar shutita shutichirca. Paitami, alipacha yachaj cajta, tucuita imatapash ali yachajushca cajta, na yachanallacunata yachaj cajta, muscushcacuna ima cajtapash yachashpa villajlla cajta ricurca. Cunanga, Danielta cayajpimi, chai quilcashca ima nijujtapash villanga” nijurcami.

13Shina nijpimi Danieltaca, jatun mandajpaj ñaupajman pushamunajurca. Chaipimi jatun mandajca, Danieltaca cashna nijurca:

“¿Canllu Judea llactamanda ñuca taita prezu apamushca, Judá llactamanda Daniel cangui?

14Ñucaca, jucha illaj Diospaj espíritu cambi tiyajujtami yachani. Tucuicunata yali ali yachaj cajtapash, michashna punchayachij cajtapash, tucuita alipacha yachajushca cajtapashmi yachani.

15Cunanga, cai quilcashcata quilca catishpa, ima nijujta ñucaman villachunmi, alipacha yachajushcacunata, luzerocunata ricushpa yachajcunata, ñuca ñaupajman pushamuchun cacharcani. Ashtahuangarin cai quilcashca ima nijujtaca, pipash na villai usharcachu.

16Shina cajpipash candaca, muscushcacuna ima cajtapash villaj cajta, ima na ushanallatapash yachaj cajtami uyani. Cunan cai quilcashcata ricushpa, chai quilcashca ima nijujtapash villajpica, yana puca juyailla churajunatami churachisha. Cambaj cungapipash, curi cadenatami churachisha. Ñuca mandajuj llactapipash, ishcaipaj cati mandaj cachunmi churasha” nijurcami.

17Shina nijpimi Danielca, jatun mandajtaca cashna nirca:

“Ñucaman ima alicunata carangapa munajushcataca, cambajllata cachun charijuilla. Ñucaman carangapa munashcataca shujcunaman carapanguilla. Chai quilcashtaca quilca catishpa, tucuita villashallami.

18Jatun mandajlla, cambaj taita Nabucodonosortaca, jahua pachapi causajuj Taita Diosmi, llactacunata mandashpa jatunyachi tucuchun, ninanda alicachi tucuchun churarca.

19Dios cushca ushaihuan mandajujpimi, tucui llactacunapi, pueblocunapi causajcunapash, shuj shimicunapi rimajcunapash, paipaj ñaupajpi manllaihuan cazunajurca. Pita huañuchingapa munashpapash huañuchinlla, pita causajta saquingapa munashpapash causajta saquinllami carca. Maijanda jatumbi churangapa munashpapash chaita pactachijlla, yangapi churangapa munashpapash chaita pactachinllami carca.

20Ashtahuangarin ninanda jariyashpa, rumi shungu tucushpa yapa na ali cashcamandami, pai mandashpa tiyajushpa alicachi tucunamandaca anchuchi tucushca.

21Chaimandami gentecunahuan causajushcamanda anchuchi tucurca. Paipaj shungupash, animalshna cashpami, sacha burrucunahuan causajurca. Paimanmi, huagramanshna jihuata caranajurca. Paipaj aichapipash, jamzi tamia shamushpami shutuchijurca. Runacuna mandana llactataca, jahua pachamanda Dios mandajuj cashcata, ali yachangacamanmi chashna rurajurca. Shinallata, Pai piman cungapa munashcaman, cujlla cashcata yachangacamanmi, chashna rurarca.

22Paipaj churi can Belsasarca, tucui chaicunata yachashpapash, cambaj shungupi jariyanataca na saquishcanguichu.

23Ashtahuangarin jahua pachapi causajuj Jatun Diosta na cazushpami, paipaj huasimanda apamushca copacunata apagrichun cacharcangui. Chai copacunapimi cambash, cambaj cati mandajcunapash, cambaj huarmicunapash, canhuan causaj cati huarmicunapash vinotaca ufianajurca. Shina rurashca jahuami, napash ricuj, napash uyajuj, imata na yachaj, culquita, curita, bronceta, jirruta, caspita, rumita rurashca dioscunatara alicachircangui. Ashtahuangarin cambaj causaita, paipaj maquipi charijuj Diostaca na yarircanguichu. Canmanga, Paimi causaita carashpa, tucuita ricujun.

24Shina Cajpimi, Paipaj Maquita cachamushpa, cai shimicunataca quilcashca.

25Chai quilcashcapica: MENE, MENE, TEKEL, UPARSIN quilcashcami tiyajun.

26Chaicunaca caitami villajun: ‘MENE’ nishpaca: ‘Diosmi, candaca cai punllacamanlla cai llactataca mandajungui, cunanga can mandashpa tiyanaca ñami tucurin’ nijunmi.

27Shinallata: ‘TEKEL’ nishpaca: ‘Balanzapi pezajpica, na pactashcanguichu’ nijunmi.

28Ashtahuan: ‘UPARSIN’ nishpaca: ‘Can mandana llactataca quichushpami, Media shuti, Persia shuti llacta runacuna mandachun ña curcani’ nijunmi” nijurcami.

29Shina nijpimi mandaj Belsasarca, yana puca juyailla churajunata, Danielman churachirca. Cungapipash, curi cadenatami churachirca. Shinallata llactata mandanatapash, ishcaipaj cati mandaj cachunmi churarca.

30Chai tutallatami, caldeo runacunata jatun mandaj Belsasarca huañurca.

31Pai huañujpica, Media shuti llactamanda Darío shuti runami, mandangapa tiyarirca. Paica, sucta chunga ishcai huatata charishpami mandai callarirca.