TITO 1 - Quichua Imbabura 2016

“Alillachu capangui” nishcami

1Taita Diospajta ruraj, Jesucristopaj apóstol Pablomi cani. Taita Dios agllashcacuna ali crishpa, na llullaj Shimita villajpi yachajushpa, Diosta yarishpa causachun villangapa cachamushcami cani.

2Na llullaj Taita Diosmi, cai pachata nara rurashpallata, causaita causagrinataca carashapachami nijushca. Chaita shuyashpa causachunmi villajuni.

3Chaitaca, punllacuna pactajpimi ricuchimushca. Chaita villashpami, ñucanchita Quishpichij Taita Dios mandashpa mingashcata pactachijuni.

4Caitaca, crishcamanda ñuca huahuashnapacha cajpimi, canman quilcamuni. Taita Diospash, ñucanchita Quishpichij Jesucristopash, ninan juyaita, ninanda llaquinata, ali causaiguta, can Titoman carachunmi munani.

Crijcunata ricushpa pushaj ancianocuna imashna canamanda

5Tucuita ricushpa pactachijuchunmi candaca, mama cucha chaupipi tiyajuj Creta llactapi saquircani. Chai llactapi tiyaj pueblocunapi ñuca mandashcashnallata, ancianocunata churachumbashmi saquircani.

6Paicunaca, pipash na juchachijpi, shujlla huarmihuan cazarashcami cana. Paipaj huahuacunapash tucuipi cazushpa, na juchachi tucushca, ali crijcunami cana.

7Crijcunata ricushpa pushajcunaca, Taita Dios mingashcata rurashpa, na juchachi tucushpami, aligutapacha causana. Shinallata, na jariyaj, na ñapash fiñarij, na machaj, na pihuambash fiñanajuj, culquimandalla ima na alitapash na ruraj cachun ninimi.

8Shinallata, huasipipash mingachij, imatapash alitalla ruraj, aliguta causaj, alitalla ruraj, Diospajlla causaj, tucuipi ali yuyaihuan causaj cachun ninimi.

9Diospaj Shimi na llullaj cajta, paiman imashna yachachishcataca, pactachishpa causajmi cana. Shina causajcunami, “na chashnachu” nishpa rimajcunataca mishashpa, ali shimiguta yachachishpa, aliguta yarichi ushanga.

10Na cazunayachishpa, yanga parlocunatalla parlashpa, umachishpa purijcunaca, ashtacacuna tiyanrami. Ashtahuambachaca, circuncisionda rurashcapuracunapimi chashnacunaca tiyanra.

11Paicunataca, upallayajta rimashpa tigrachingui ninimi. Chashnacunaca, huasi ucupuratapash pandachishpami, culquimandalla imatapash na alicunatalla yachachishpa pandachinajun.

12Paicunapuramanda shuj profetaca cashnami nishca: “Creta llactapi causajcunaca, llullacuna, millai animalcunashna, micunatalla yariyajcuna, yanga yanga causajcunami” nishcami.

13Cai villashcacunaca napacha llullachu. Shina cashcamandami, paicunataca, alipacha crishpa catichun, shinllitapacha rimashpa yachachina cangui.

14Judiocunapaj yanga parlocunataca, uyaitapash na uyanachu cangui. Shinallata, na llullashpa villajuj Shimicunata catijushcata pandachina cajpimi, runacunalla mandashca shimicunataca na uyana cangui.

15Mandashcacunata pactachijcunapajca tucuimi ali. Ashtahuangarin na crishpa, na alita rurajcunapajca, tucui imapash na alichu. Paicunapaj shungupash, yuyaipash huaglitallami yarinajun.

16“Taita Diosta rijsinchimi” nishpapash, na alitalla rurashpami, Taita Diosta na crij cashcataca ricuchinajun. Chashnacunaca, na cazushpa na alitalla rurajcuna cashpami, ima alita rurangapa munashpapash, na ushashpa causanajun.