1Efraín ayllupaj miraicunaca, Gedeondaca:
“¿Imashpata ñucanchitaca cashna rurangui? Canga, ¿Madián llacta gentecunahuan macanajungapa rijushpaca, imashpata ñucanchitaca na cayachircangui?” nishpami shinllita rimanajurca.
2Shina ninajujpimi Gedeonga cashna nijurca:
“Ñuca rurashcahuan ricujpica,¿nachu Efrainbaj miraicuna rurashca ashtahuan ali? Ashatalla imata canguna rurashca cashpapash, ashtacata ñucanchi imata rurashca cashpapash, canguna rurashcami ashtahuan ali.
3Madián llactamanda Oreb shuti, Zeeb shuti mandajcunataca, Taita Diosmi ñucanchi maquipi churashca. Canguna rurashcahuan ricujpica, ñuca imatalla rurashcacunaca, imapash na canllu” nircami.
Gedeón runa chashna rimajpimi, Efraín ayllu runacunaca, fiñashca cashpapash ali tucunajurca.
4Gedeón runaca, paihuan pushamushca quimsa patsaj runacunandimi, Jordán yacuta chimbashpa rinajurca. Paicunaca shaijushca cashpapash, ashtahuan catishpa rinajurcallami.
5Shinamandami, Sucot pueblopi causajcunataca cashna nirca:
“Ñuca huashata shamunajuj gentecunaman, asha tandagutallapash carapaichi nipanimi. Paicunaca, ninanda shaijushcami shamunajun. Ñucaca, Madián llactamanda, Zeba shuti, Zalmuna shuti mandajcunata catishpami rijuni” nirca.
6Sucot shuti pueblota mandajcunaca cashnami ninajurca:
“Cambaj macanajuj runacunaman tandata carangapaca, Zeba shuti, Zalmuna shuti runacunatapash, ¿ñachu cambaj maquipi charijungui?” ninajurcami.
7Shina nijpimi Gedeonga, cashna nirca:
“Zeba shuti, Zalmuna shuti mandajcunata, Mandaj Dios ñuca maquipi churajpica, cashacunahuan, jichushca pambapi tiyaj racu cashacunahuanmi, cangunataca astingapa shamusha” nircami.
8Chai pueblomanda, Peniel shuti puebloman vichai rishpapash, chashnallatami nijurca. Peniel shuti pueblopi causajcunapash, Sucot shuti pueblomanda gentecunashnallatami ninajurca.
9Shina nijpimi Gedeonga, Peniel shuti pueblopi causajcunatapash:
“Macanajui tucurijpi tigramushpaca, cai torretami urmachisha” nirca.
10Zeba shuti, Zalmuna shuti mandajcunapash, chunga picha huarangashna macanajuj runacunahuanmi, Carcor shuti pambapi carca. Paicunaca, indi llujshimujman causaj macanajuj runacunamanda puchushcacunami carca. Espadahuan macanajunata ali yachaj, patsaj ishcai chunga huaranga runacunami huañushca carca.
11Gedeonga, Noba shuti, Jogbeha shuti pueblocunamandaca, indi llujshijman, carpacunata shayachishpa causanajuj gentecunapaj ñanda vichai rishpami, tucuita macashpa misharca. Chaicunapica, macanajuna ali yachaj runacunaca cungashcami tiyanajushca carca.
12Zeba shuti, Zalmuna shuti mandajcunapash pacajushpa calpanajujpi Gedeón catishpami, Madián shuti llactamanda Zeba shuti, Zalmuna shuti mandajcunata japishpa, macanajunata ali yachaj tucui runacunataca ninanda manllachijurca.
13Joás runapaj churi Gedeonga, nara punllayajpillatami, chai macanajuimandaca tigramurca.
14Chaimanda tigrajushpami, Sucot shuti pueblopi causajcunamanda chaira viñai shuj huambrata japishpa tucuita tapuchirca. Shina tapuchijpimi paica mandajcunapaj shutitapash, Sucot shuti pueblota mandaj rucucunapaj shutitapash, canchis chunga canchis shuticunata quilcashpa curca.
15Gedeonga, Sucot shuti pueblopi causajcunapajman yaicushpami cashna nirca:
“Zeba shuti, Zalmuna shuti mandajcunaca caipimi. Cangunaca: ‘Ninanda shaijushca cambaj runacunaman tandatallapash carangapaca, Zeba shuti, Zalmuna shuti runacunataca, ¿ñachu cambaj maquipi charijungui?’ nircanguichimi” nircami.
16Shina nishpami Gedeonga, chai pueblopi mandaj rucucunatapash, Sucot shuti pueblopi causajcunatapash, casha yuracunata, jichushca pambapi tiyaj racu cashacunata apamushpa astirca.
17Shinallata, Peniel pueblopi tiyaj torreta urmachishpami, chai pueblopi causajcunatapash huañuchirca.
18Chai jipami Gedeonga, Zeba shuti, Zalmuna shuti mandajcunataca cashna nirca:
“Tabor shuti urcupi canguna huañuchishca runacunaca, ¿imashna runacunata carca?” nircami.
Shina nijpimi paicunaca, cashna ninajurca:
“Canshnallami carca. Paicunaca, jatun mandajpaj churicunashnallami carca” ninajurcami.
19Shina nijpimi Gedeonga, cashna nirca:
“Paicunaca, ñuca huauquicunami carca. Ñuca mamapaj churicunami carca. ¡Mandaj Diospash ricujujpimi nini, canguna na huañuchishca cajpica, ñucapash cangunataca na huañuchimanllu carcani” nircami.
20Shina nishpami Gedeonga, Jeter shuti paipaj punda churitaca:
“Cai runacunata huañuchi” nishpa mandarca.
Ashtahuangarin chaira viñai huambraguca, manllashpa, espadata na llujchi usharcachu.
21Shina cajpimi, Zeba shuti, Zalmuna shuti mandajcunaca, Gedeondaca cashna ninajurca:
“Ñucanchitaca, canllata huañuchiyari. Shina rurajpimi, shinlli runa cajtapash yachai ushashun” ninajurcami.
Shina nijpimi, Gedeonga jatarishpa, Zeba shuti, Zalmuna shuti mandajcunata huañuchirca. Chai jipami, camellocunapaj cungapi juyailla huarcushcacunatapash japirca.
22Israelcunaca, Gedeondaca cashnami ninajurca:
“Madián shuti llacta runacunapaj maquimandaca canmi quishpichircangui. Shina cashcamandaca, cambash, cambaj churipash, cambaj churipaj churicunapash, ñucanchita mandaj tucupaichilla” ninajurcami.
23Ashtahuangarin Gedeonga, cashnami nirca:
“Ñucapash, ñuca churipash, cangunataca na mandangachu. Mandaj Diosllami cangunataca mandanga” nircami.
24Gedeonga cashnatapashmi nirca:
“Caitallami mañani: Chai runacunata quichumushca zarcillocunatalla, tucuicuna ñucaman cuhuaichi” nircami.
(Paicunaca, ismaelitacuna cashpami, curi zarcillocunata churajushca carca).
25Shina mañajpimi paicunaca:
“Ñucanchica, tucui munaihuan cupashunllami” nishpa shuj fachata mandashpa, quichumushca zarcillocunataca tucuicunallata chaipi churanajurca.
26Pai mañashca curi zarcillocunaca, chunga ishcai kilo chaupitashnami pezarca. Shinallata, curita rurashca planchacunatapash, juyailla tucui ima rurashcacunatapash, Madián shuti llactata jatun mandajcuna apamushca yana puca juyailla churajunacunatapash, camellocunapaj cungapi huatashca juyaillacunatapash na pezarcachu.
27Gedeón runaca, chai curihuanga efod churajunata rurachishpami, pai causajuj Ofra shuti pueblopillata alichirca. Chai pueblopi tucui Israel gentecunaca, chai efod churajunatara jatumbi churashpami juchata ruranajurca. Chai efod churajunaca, Gedeonbajpash, paipaj huasi ucupurapajpash, nitijachinshna pandachijmi carca.
28Shinami Madián llacta gentecunaca, Israelcuna mandajpi, chai punllamandapacha, na ashtahuan macanajungapa jatarishpa, llaquichi tucushpa causanajurca. Gedeón runa causajui punllacunapica, chuscu chunga huatatami chai llactaca cungashca ali causanajurca.
29Joás shuti runapaj churi Jerobaal runaca, tigrashpami paipaj huasipi causagrirca.
30Gedeonga, canchis chunga churicunatami charirca. Paica, tauca huarmicunata charishpami, paimanda miraicunataca ashtacata saquirca.
31Siquem shuti pueblopi caishuj huarmihuan charishca shuj churitaca, Abimelec shutitami shutichirca.
32Joás runapaj churi Gedeonga, ña rucugupacha cashpami huañurca. Pai huañujpica, Ofra shuti pueblopi, paipaj taita Joás runata pambashcapimi pambarca. Chai pueblopica, Abiezer shuti runapaj miraicunami causanajurca.
33Ashtahuangarin, Gedeón huañushca jipaca, Israelcunaca, cutinmi Baal shuti dioscunata catishpa juchata ruranajurca. Paicunaca, Baal-berit shuti diostami catinajurca.
34Israelcunaca, paicunapaj muyundi llactacunapi causanajuj, paicunata fiñajcunapaj maquimanda cacharichij Mandaj Taita Diostaca napacha yarinajurcachu.
35Shinallata, Israel gentecunaman tucui alita rurashcamanda, Jerobaal nishpa rijsishca Gedeonbaj huasi ucupuratapash na yarishpa, na pashi ninajurcachu.
Who We AreWhat We EelieveWhat We Do
2025 by iamachristian.org,Inc All rights reserved.
