JEREMÍAS 1 - Quichua Imbabura 2016

Jeremiasta, agllashpa villachun cachashcamanda

1Hilcías shuti runapaj churi Jeremías villashca shimicunami. Hilcías shuti runaca, Benjamín ayllupaj llactapi tiyaj, Anatot shuti pueblopi causanajushca sacerdotepurami carca.

2Amón shuti runapaj churi jatun mandaj Josiasca, Judá llactataca chunga quimsa huatatami mandajurca. Chai punllacunapimi Mandaj Diosca, Jeremiasman cai shimicunata villarca.

3Josías runapaj churi, Judá llactata jatun mandaj Joacim runa mandajui huatacunapipashmi villarca. Josías runapajllata churi, Judá llactata jatun mandaj Sedequías runa mandajui chunga shuj huatacamanmi, Jeremiasmanga villajurca. Chai huatapaj picha quillapi, Jerusalenbi causajcunata prezu apangacamanmi villajurca.

4Mandaj Diosca, cashna nishpami villahuarca:

5“Candaca, cambaj mamapaj vijsapi nara tiyajpillatami, ña agllarcani.

Nara huacharijpillatami candaca, Ñucapajlla causachun shicanyachircani.

Candaca, llactacunapi profeta cachunmi churarcani” nihuarcami.

6Shina nijpimi: “¡Mandaj Jatun Dioslla!

Ñucaca chairalla huambrami capani, rimanatapash nara ali yachanichu” nircani.

7Ashtahuangarin Mandaj Diosca, cashnami nihuarca:

“Ama: ‘Chairalla huambrami cani’ nijuichu.

Maiman Ñuca cachajpipash, rinallami cangui.

Ñuca imata villachun mandajpipash, villagrinallami cangui.

8Imatapash na manllanachu cangui.

Ñucami, ima llaquimanda quishpichingapapash ricuriajusha.

Mandaj Dios Ñucami chashna nini” nihuarcami.

9Shina nishpallami Mandaj Diosca, Paipaj maquihuan ñuca shimipi tacarishpa, cashna nihuarca:

“Cunanga, Ñuca ima nishcata villachunmi, cambaj shimipi churani.

10Cunan punllami candaca, shuj llactacunapi causajcuna,

llactacunata jatun mandajcuna ima tucunata villachun churani.

Shinamandami, tucuilla urmachishpa tucuchina ushaitapash,

shinallata, cutin tigrashpa alichina ushaitapash canman cugrini” nihuarcami.

11Mandaj Diosca cashna nishpami tapuhuarca:

“Jeremías, canga ¿imatata ricujungui?” nijpimi:

“Almendro yura malquitami ricujuni” nircani.

12Shina nijpimi Mandaj Diosca: “Alipachami ricushcangui.

Ñuca imata villashcataca, uchami pactachigrini” nihuarca.

13Mandaj Diosca, cutinmi cashna tapuhuarca:

“¿Imatata canga ricujungui?” nijpimi: “Shuj manga timbushpa uraiman talirimujujtami ricujuni” nircani.

14Shina nijpimi Mandaj Diosca, cashna nihuarca:

“Vichai llactamandami, tucui cai llactapi causajcunapajman, jatun llaqui cachamugrijun.

15Mandaj Dios Ñucami, vichai llactacunapi causanajuj tucui ayllucuna jatun mandajcuna tandanajuchun cayagrini.

Paicuna shamushpami, Jerusalen pungu ñaupacunapi, tucui pirca muyundicunapi, carpacunata shayachinajunga.

Shinallata Judá llacta tucui pueblo muyundicunapipashmi carpacunata shayachinajunga.

16Chai tucui na alicunata rurashpa, paicunallata Ñucata fiñachishcamandami, chashna ninanda llaquichigrini.

Paicunaca, rurashcalla dioscunamanmi, inciensota carashpa cushnichinajurca.

Paicunapaj maquihuanllata rurashca dioscunatami, ninanda alicachinajurca.

17Canga, alipacha shinlli tucushpa shayarishpami,

paicunaman, Ñuca imata rimachun mandashcataca rimana cangui.

Paicunapaj ñaupajpi shayarinataca, na manllanachu cangui.

Paicunapaj ñaupajpi Ñuca, candalla saquishpa, ama llaquichijuchunmi, chashna shayarina cangui.

18Cunan punllallatami, muyundi jatun pircata charij puebloshna, jirru pilarshna, bronce patashna cachun candaca churani.

Judá llactapi causajcunapaj, jatun mandajcunapaj, cati mandajcunapaj, sacerdotecunapaj, ñaupajpi shinlli shayarichunmi candaca churani.

19Canhuan macanajushpapash, candaca napacha mishangachu.

Canda quishpichingapaca, Ñucami canhuan cani” nihuarcami Mandaj Diosca.