1 SAMUEL 14 - Quichua Imbabura 2016

1Shuj punllami Saulpaj churi Jonatanga, paipajta ruraj runataca: “Chimbapi macanajungapa tiyanajuj filisteocunapajman chimbashun” nirca. Chaitaca taitamanga na villarcachu.

2Saulca, Gabaa shuti pueblo canllapi, Migrón shuti pushtupi, granada yura ucupimi tiyajurca. Paica, sujta patsaj runacunahuanmi tandanajushca carca.

3Ahitob shuti sacerdotepaj churi Ahías runami, efod churajunataca apaj carca. Ahitob runaca, Icabod shuti runapaj huauquimi carca. Ahitob runaca, Finees shuti runapaj churimi carca. Finees shuti runaca, sacerdote Elipaj churimi carca. Elí runaca, Silo shuti pueblopimi, Mandaj Diospajta ruraj sacerdote carca. Jonatán rishcataca pipash na yacharcachu.

4Ashtahuangarin, macanajunata yachaj filisteocuna shuyanajuj pushtuman chayangapaca, Boses shuti, Sene shuti, jatun filu rumi jaca chaupitami, Jonatanga yalina carca.

5Jahuaman tiyajuj jatun filu jaca rumica, Micmas shuti pueblomanmi ricurijurca. Chaishuj jatun filu jaca rumica, Gabaa pueblomanshna uraimanmi ricurijurca.

6Jonatanga, paipajta ruraj runataca: “Circuncisionda na rurashca runacuna macanajungapa shuyanajuj pushtuman, chimbashun. Mandaj Diosca, ñucanchita yanapangapashchari. Mandaj Diospaca, imallapash na shinlli cajpimi, ashtaca cajpipash, ñucanchica ashalla cashpapash, paicunataca mishashunlla” nircami.

7Shina nijpimi, paipajta ruraj runaca cashna nirca: “Cambaj shungupi imata yarijushcata rurailla. Ñucapash, can imata rurajujpi yanapangapa, caipimi cani” nircami.

8Shina nijpimi Jonatanga: “Chai runacunapajman chimbashpa jacu ricurishun.

9Paicuna ricushpa: ‘Ñucanchi cangunapajman urai shamungacaman shuyaichi’ nijpica, paicunapajman na vichai rishpa shuyashunllami.

10Ashtahuangarin: ‘Ñucanchipajman vichai shamuichilla’ nijpica, vichai rishunllami. Paicunara vichai shamuichi nishpaca, Mandaj Dios, ñucanchi maquipi churashcatami ricuchinga” nijurcami.

11Chai jipami, macanajunata yachaj filisteo runacunapaj ñaupajpi ishcandi ricurirca. Chaita ricushpami filisteocunaca: “Ricuichi, chai hebreocunaca, paicuna pacajushca jatun utujucunamanda ñami llujshinajun” ninajurca.

12Chai jipami, macanajunata yachaj filisteocunaca, Jonatandapash, paipajta ruraj runatapash, cashna ninajurca: “Caiman, vichai shamuichilla. Cangunaman shuj villanatami charinchi” ninajurca. Chashna ninajujpimi Jonatanga, paipajta ruraj runataca: “Canga ñuca huashata vichai catimungui. Mandaj Diosmi, Israelcunapaj maquipimi churashca” nirca.

13Shina nishpallami Jonatanga, maquihuanbash, chaquihuambash huarcurishpalla vichai rijurca. Shinallata, paipajta ruraj runapash, paipaj huashatami vichai catijurca. Filisteocunahuan macanajushpa, Jonatán shitajpica, paipajta ruraj runami huañuchishpa catijurca.

14Chashnami, cai punda macanajuipica Jonatanhuan, paipajta ruraj runahuanga, ishcai chungashna filisteocunataca, ashalla alpapi huañuchirca.

15Chaimandami carpacunapi tiyajcunapash, canllaman shayajcunapash, tucuilla macanajunata yachaj runacunaca ninanda manllarinajurca. Shinallata, pacalla chapangapa rij runacunapashmi ninanda manllarinajurca. Alpa mamapash chujchujpimi, imata ruraitapash na ushanajurca.

16Saúl chapachun churashca macanajunata yachaj runacunaca, Benjamín llactapi tiyaj Gabaa pueblomandami ricunajurca. Chai ashtaca gentecunaca, imata ruraitapash na ushashpa, caiman chaiman calpariyanajujtami ricunajurca.

17Shinamandami Saulca, paihuan chaipi tiyanajuj macanajunata yachaj runacunataca: “Ali ricuichi, ñucanchipuramandaca maijanda rishca” nirca. Shina nijpi, tucuillacunata ali ricujpica, Jonatanhuan, paipajta ruraj runahuanlla illajtami ricurca.

18Shina cajpimi Saulca, sacerdote Ahiastaca: “Taita Diospaj arcata caiman apamui” nirca. Chai punllacunapica, Taita Diospaj arcataca Israelcunami charinajurca.

19Sacerdote Ahiashuan, Saulhuan parlanajujpillatami cashna tucurca: Filisteocunapaj carpacunapica, ashtahuan ninandapacha caparinajujmi uyarirca. Chaimandami Saulca, chai sacerdotetaca: “Shuyailla, ama apamuichu” nirca.

20Saulca, paipaj tucuilla macanajunata yachaj runacunata tandachishpami, macanajuna pambaman chayagrirca. Chaipimi, filisteocunaca ninandapacha musparishpa, tucuicuna paipurallata espadahuan huañuchirinajurca.

21Shinallata, huaquin hebreocunaca, pundamandapacha filisteocunahuan causashpami, paicunapash tandanajushpa llujshimushca carca. Ashtahuangarin, paicunapash, macanajunata yachaj, Saulpaj, Jonatanbaj, Israel runacunahuanmi tandanajurca.

22Shinallata Efraín shuti urcu alpacunapi pacajushca tiyanajuj Israelcunaca, filisteocuna pacajushpa calpanajujta uyashpami, paicunapash catishpa macanajungapa rinajurca.

23Chashnami Mandaj Diosca, chai punllapica Israelcunataca quishpichirca. Bet-avén shuti pueblocamanmi, macanajushpaca chayagrirca.

24Ashtahuangarin chai punllapica, Israel runacunaca shuj llaquipimi urmarca. Saulca, tucui gentecunatami cashna nishpa juramentuchishca carca: “Nara tutayajpillata, ñucata fiñajcunata, ñucanchita llaquichishcashna, paicunatapash nara llaquichishpaca, maijan cashpapash imatapash na micunachu canga” nishcami carca. Shina nishcamandami, tucuicuna imatallapash na micunajurca.

25Chai jipami, ashtaca quirucuna shayanajuj pambaman chayagrirca. Chaipica, tucui pambapimi balun mishqui tiyarca.

26Quirucuna shayanajuj chai pambaman tucuicuna yaicushpami, balun mishquica ashtacapacha tiyajta ricunajurca. Shina ricushpapash, na micunachu nishpa juramentuchishcata manllashpami, ashatallapash na micunajurca.

27Ashtahuangarin Jonatanga, tucuicunata paipaj taita juramentuchishcataca, na yachashcachu carca. Chaimandami pai charijushca caspi pundataca, chai mishqui shinlliyashcapi mutiyachishpa malirca. Shina malishpami, shinlli tucurca.

28Chashna rurajpimi paicunapuramanda shuj runaca, cashna nirca: “Cambaj taitami, macanajunata yachaj runacunataca cashna nishpa juramentuchirca: ‘Maijan cashpapash, imatallapash micushpaca, llaquichi tucungapachami’ nirca. Chaimandami, tucuillacuna ña huañunalla tucunajunchi” nircami.

29Shina nijpimi Jonatanga, cashna nirca: “Ñuca taitaca, chashna nishpaca, tucui Israelcunata pandachishcami. Ricuichi, cai balun mishquita ashaguta malishpaca shinlli tucushcanimi.

30Paicunata fiñajcunata imatalla quichumushcacunata micushpacarin, ¿nachu filisteocunataca ashtahuan llaquichinchiman carca?” nircami.

31Chai punllapica, Micmas shuti pueblomanda Ajalón shuti pueblocaman catishpami, filisteocunataca huañuchinajurca. Ashtahuangarin, tucuicuna ninandapacha shaijushcacunami carca.

32Chaimandami macanajuj runacunaca, chai quichumushcacunata japingapa calpanajurca. Paicunaca llamacunata, huagracunata, shicucunata japishpa alpapi shitashpami, cungata cuchushpa huañuchishpa, yahuarndi micunajurca.

33Chaita ricushpami: “Gentecunaca, aichata yahuarndi micushpami, Mandaj Diosta na cazushpa juchata ruranajun” nishpa Saulman villanajurca. Shina villajpimi paica cashna nirca: “Cangunaca, yachashpatami na cazushcanguichi. Shuj jatun rumita t'angashpa caiman apamuichi” nircami.

34Paica, Saulmanga cashnatapashmi nirca: “Caita chaita rishpa, cashna nishpa villaichi: ‘Tucuicuna, cangunapaj huagrata, llamata caiman apamushpa, cungata cuchushpa huañuchishpa micuichi. Mandaj Diosta na cazushpa, aichata yahuarndi micushpaca, juchata na ruranachu canguichi nijunmi’ nigrichi” nircami. Shina nijpimi tucui gentecunaca, chai tutallata paicunapaj huagrata apamushpa, cungata cuchushpa huañuchinajurca.

35Shinallata Saulca, Mandaj Diosmanmi shuj altarta shayachirca. Paica chai altartami, Mandaj Diosman rurashpa punda callarirca.

36Chai jipami, Saulca cashna nirca: “Filisteocunahuan macanajungapaca, tuta urai rishpami, pacaringacaman tucuillata huañuchishpa, paicuna imatalla charishcatapash quichumushunchi” nircami. Shina nijpimi paicunaca: “Cambi ima ali cana cajpipash, chaita rurailla” ninajurca. Chashna ninajujpimi, shuj sacerdoteca: “Taita Diospajman quimirishpa, caipillata tapushunchi” nirca.

37Shina nijpimi Saulca, Taita Diosta cashna nirca: “¿Filisteocunata catishpa, urai rinallachu capanchi? ¿Paicunataca, ñucanchi Israelcunapaj maquipi churagringuichu?” nishpami tapurca. Shina tapujpipash chai punllapica, Mandaj Diosca imatallapash na tigrachircachu.

38Chaimandami Saulca, cashna nirca: “Macanajuj runacunata tucui mandajcuna, caiman tandanajumuichi. Maijan ima juchata cunan rurashcatapash, tapuchishpa yachaichi.

39Israelcunata quishpichij Mandaj Diosca ricujunmi. Ñuca churi Jonatán na alita rurashca cashpapash, huañungapachami ninimi” nircami. Shina nijpica, chai tucui gentecunamandaca, maijanllapash na imatapash nircachu.

40Chaimandami Saulca, tucui Israelcunata cashna nirca: “Cangunaca, caiman shayarichi. Ñucahuan, ñuca churi Jonatanhuanga, chaiman shayarishun” nijpimi gentecunaca, Saultaca: “Cambi ima ali cana cajpipash, chaita rurailla” ninajurca.

41Shina nijpimi Saulca, Mandaj Taita Diostaca cashna nirca: “Maijan na alita rurashca cajtapash ricuchihuailla” nijpimi, paipajllata, paipaj churi Jonatanllata na alita rurashca ricurirca. Shina cajpimi gentecunaca, ima llaquita apanapash illaj saquirirca.

42Chai jipami, Saulca: “Maijan na alita rurashcata ricungapaca, ñucahuan, ñuca churi Jonatanhuan, pipaj urmajta ricungapa ruraichi” nirca. Shina rurajpimi Jonatanbaj urmarca.

43Chaimandami Saulca, Jonatandaca: “¿Imatata rurarcangui? Villahuai” nirca. Shina nijpimi Jonatanga, cashna nirca: “Ari, ñuca apamushca caspi pundahuanmi, balun mishquita ashaguta malircani. ¿Chaimandallachu huañuna capani?” nircami.

44Shina nijpimi Saulca, cashna nirca: “Jonatán, canga huañunapachami cangui. Chaita na pactachijpica, Taita Diosca, ashtahuan ninanda llaquichihuachun” nircami.

45Shina nijpimi Saultaca, gentecunaca cashna ninajurca: “¿Cashna jatun quishpirinata Israelcunaman rurashca Jonatanga huañungachu? Napacha chashna cangachu. Mandaj Diospash ricujunmi. Paipaj umamandaca, shuj ajchallapash na alpapi urmangachu. Paica, Taita Diospaj ushaihuanmi, macanajuitaca chashna misharca” nishpami, Jonatanda huañuchinataca saquichinajurca.

46Chaimandami Saulca, filisteocunata catishpa rinataca saquirca. Filisteocunapash, paicunapaj llactamanmi tigranajurca.

47Israel llactapaj jatun mandaj tucushca jipami Saulca, muyundi llactacunapi causaj tucuilla paita fiñajcunahuan macanajurca. Moab, Amón, Edom shuti llactacunapi causajcunatapash, Soba llactata jatun mandajcunatapash, filisteocunatapashmi misharca. Maiman rishpapash, paica mishajujllami carca.

48Shinallata, macanajunata yachaj ashtaca runacunata tandachishpami, amalec gentecunatapash misharca. Chashnami, Israelcunata llaquichishpa causajcunamandaca quishpichirca.

49Saulpaj churicunaca: Jonatán, Isúi, Malquisúa shuticunami carca. Shinallata paipaj ishcai ushicunaca, punda ushica Merab shuti, jipa ushica Mical shutimi carca.

50Saulpaj huarmica, Ahimaas shuti runapaj ushi, Ahinoam shutimi carca. Macanajuj runacunata mandajca, Abner shutimi carca. Paica, Ner shuti runapaj churimi carca. Ner shuti runaca, Saulpaj taitapaj huauquimi carca.

51Saulpaj taita Cis shuti runapash, Abner shuti runapaj taita Ner shuti runapash, Abiel runapaj churicunami carca.

52Saulca pai causajui huatacunapimi filisteocunahuanga, ninandapacha macanajushpa causanajurca. Chaimandami Saulca, ninan shinlli, macanajunata ali yachaj runacuna cajta ricushpaca, paipaj macanajuj runacunahuan tandachijlla carca.