DANIEL 10 - Quichua Imbabura 2016

Danielca, yacu manñapi cashpa muscuipishna ricushcamanda

1Persia shuti llactata jatun mandaj Ciro shuti runaca, ñami quimsa huatata mandajurca. Chai huatapimi, Beltsasar shuti Danielca, llaquicuna chayamunata muscuipishna ricurca. Chai shimicunaca, chashnapacha cashpapash, na yachai ushanallami carca. Shina cajpipash Danielca, ali yachaita charishpami, muscuipishna ricushcataca yachai usharca.

2Chai punllacunapica, Daniel ñucaca, quimsa semanacamanmi llaquilla carcani.

3Quimsa semana yalingacamanmi, ima mishquilla micunatapash na micurcani. Aichatapash, vinotapash na malircanichu. Mishquilla ashnajun yacutapash, na churarircanichu.

4Huata callari quillapaj ishcai chunga chuscu punllapimi ñucaca, Tigris shuti jatun yacu manñapi shayajurcani.

5Chaipi shayajushpa vichai ricushpaca, lino churajunata churajushca runa shayajujtami ricurcani. Ufaz shuti llactamanda curita rurashca chumbihuan chumbilirishcami carca.

6Paica, berilo shuti rumishnalla juyaillagumi carca. Paipaj ñavica, punchapamba shitamujshnami carca. Michunda japichishcashnami ricujurca. Rigrapash, chaquipash llambulla bronceshna punchapambami carca. Pai rimashcapash, ashtaca gentecuna rimashcashnami uyarijurca.

7Chaitaca, Daniel ñucallami muscuipishna ricurcani, ñucahuan shayanajuj runacunapash na ricurcachu. Ashtahuangarin paicunataca, ninan manllai japijpimi, pacajungapa calpanajurca.

8Chaimandami ñucalla saquirishpa, cashna llaquicuna shamunata muscuipishna ricurcani. Chaipica, ushai illaj tucushpami, huañungashna tucushpa, imatapash na rurai usharcani.

9Shina cashpapash Pai rimashcata uyashpami, urai singa urmashpa chaipillata ninanda puñujurcani.

10Chai ángel ñucata yanapashpami, alpapi cungurichijpi maquihuan taunarircani.

11Chai jipaca, cashnami nihuarca: “Daniel, canga ninanda juyai tucushca runami cangui. Ñuca rimashcata uyangapa jatarishpa shayari. Cunanmi cambajman, ñucata cachamuhuarca” nihuarcami. Shina nijpimi, ninanda manllarishpa shayarircani.

12Chaipimi cashna nihuarca: “Daniel, ama manllaichu. Pipash na yachai ushanallacunata yachangapa munashpa, tucui shunguhuan Taita Diosta cumurishpa mañai callari punllamandapachami, Paica can mañashcata uyarca. Can mañashcata uyashpami shamurcani.

13Shina cajpipash Persia llactata mandajmi, ishcai chunga shuj punllacunata jarcahuarca. Chaimandami, angelcunata mandajpuramanda Miguel shuti ángel, ñucata yanapangapa shamurca. Persia llactata jatun mandajcunahuanmi chaipi saquirishca carcani.

14Ñucaca, tucurimui punllacunapi cambaj llactaman llaquicuna shamunata can yachachunmi, villangapa shamurcani. Muscuipishna can ricushcacunaca, chai punllacunapajmi” nihuarcami.

15Chai shimicunata pai chashna nijujpica, imatapash na rimai ushashpami, alpatalla ricushpa upashna saquirircani.

16Shina cajpimi, runaman rijchaj ricurishpa ñuca shimipi tacarirca. Chaimandami, ñuca ñaupajpi shayajuj runaman rijchajtaca cashna nircani: “Ñucata mandajlla, muscuipishna ricushcamanda, ninan llaquicuna japijpimi ushaipash illaj cani.

17Canbajta ruraj ñucaca, maitata ñuca mandajhuanga rimai ushashayari. Can rimajta uyashpaca, samai tucurijpimi ushaipash illaj carcani” nircanimi.

18Runaman rijchajca, cutin tacarishpami shinllichihuarca.

19Paica cashnami nihuarca: “Ama manllaichu, canga ninanda juyai tucushca runami cangui, shinlli tucushpa ushaita japilla” nihuarcami. Pai chashna nijpillatami, ushaita japishpa cashna nircani: “Cunanga, ñami ushaita carahuarcangui, rimahuailla ñucata mandajlla” nircanimi.

20Shina nijpimi Paica, cashna nihuarca: “¿Cambajman ñuca imashpa shamushcata yachanguichu? Cunanga, Persia llactata mandajhuan cutin macanajungapami tigrana cani. Paita mishashca jipaca, Grecia llactata mandajmi, macanajuj shamunga.

21Ashtahuangarin ñucaca, chashnapacha cajta quilcashcataca, canmanmi villagrini. Ñucataca, paicunahuan macanajuipica, pipash na yanapaj shamunllu. Cangunata mandaj Miguel shuti angelmi yanapangapa shamunga” nircami.