1 PEDRO 3 - Quichua Imbabura 2016

Cazarashcacuna imashna causanamanda

1Shinamandami huarmicunapash, cangunapaj cusacunataca tucuipi aliguta cazuna canguichi. Shina cazunajujta ricushpami, Diospaj Shimita na crij cusacunapash crij tucunga.

2Tucuipi aliguta cazunajujta ricushpami, cusacunapash crij tucunga.

3Cangunaca, na jahualla juyailla alichirishca, ajchata alichirishpa juyailla curita churarishca, juyailla churajunata churajushcacunaca na canachu canguichi.

4Ashtahuangarin, shungu ucupimi, na fiñarishpa, ali juyaihuan, na tucurinalla juyailla causaiguta charina canguichi. Chashna causajpimi Taita Diosca ninanda alicachinga.

5Shinami, ñaupa punllacunaca, Diospajlla causaj huarmicunaca alichirishpa causashca. Paicunaca, Taita Diosta yariashpa causashpami, cusacunatapash cazunajushca.

6Sara huarmiguca, paipaj cusa Abrahamdaca aliguta cazuj cashpami: “Ñucata mandajmi capangui” nijushca. Shinallatami cangunapash, imatapash na manllashpa, aliguta rurashpa causanajushpaca, paipaj ushicuna tucushcanguichi.

7Shinallata cusacunapash, cambaj huarmihuanga aligutapacha yarishpami causana cangui. Cambaj huarmitaca, faquirinalla vasogutashnami, aliguta ricushpa charina cangui. Taita Diosca ishcanditallata ninanda juyashpami, ali causaiguta carashpa charijun. Chashna ali cajpimi, Diosta can mañashcatapash imapash na jarcanga.

Ali yuyaitami charina canguichi

8Ashtahuangarin, tucuicunallata shujllashnalla yarishpami, caishujhuan chaishujhuan llaquirishpa, huauquipurashna juyarishpa, pihuambash cushilla parlashpa causana canguichi.

9Na alita rurajpipash, na chashnallata tigrachinachu canguichi. “Ima llaquipash japishpaca alimi canman” nijpipash, na chashnallata ninachu canguichi. Ashtahuangarin cangunaca, bendiciai tucungapa cayai tucushcata yachashcamandami, paicunatapash bendiciana canguichi.

10Quilcashcapica cashnami nijun:

“Maijambash, paipaj causaita juyashpa,

ali punllacunata charingapa munashpaca,

paipaj jallu na alita parlanata jarcarichun,

paipaj shimipash llullanataca saquichun.

11Na alita ruranamanda anchurishpa, alitalla ruraichi.

Ali causaiguta mascashpa, catishpa causaichi.

12Jatun Diosca, alitalla rurajcunatami ricuriajun.

Paicuna mañanajujtapash, aligutapachami uyariyajun.

Ashtahuangarin, na alita rurashpa causajcunataca,

Taita Diosca ninandami fiñashpa ricujun” nijunmi.

13Canguna aliguta rurashpa causajpica, ¿pita cangunataca llaquichi ushangayari?

14Ashtahuangarin, alitalla rurashpa causanajushcamanda llaquichi tucushpaca, ninandami cushijuna canguichi. Shina cashcamanda, na paicunata manllaimandalla, llaquirishpa musparinachu canguichi.

15Ashtahuangarin Jesucristotaca, cangunapaj shungupica ninandapachami alicachina canguichi. Canguna japigrinata shuyanajushcata pipash tapuchijpica, ama jariyashpa ali shunguhuan tigrachingapami, ña ali yachajushcalla purina canguichi.

16Ali yuyaihuanmi causana canguichi. Shinallata, huañuchij runacunatashna na ricunayachijpipash, aligutami imatapash rurana canguichi. Yangata juchachishpa, na alicachishpa parlajcuna pingai tucuchunmi, chashna causana canguichi.

17Na alita rurashpa llaquita apangapa randica, Taita Dios munashcashna aliguta rurashcamanda, llaquita apanami ñucanchipaca ali.

18Cristoca, ñucanchipaj juchacunamandami shuj cutinlla huañurca. Paica alitalla ruraj cashpapash, na alitalla ruraj ñucanchita Taita Diospajman pushangapa huañurca. Paica, aichapi huañushpapash, Espiritupica causachi tucurcami.

19Shina cashpami, Cristoca prezu tiyanajuj espiritucunaman villangapa rirca.

20Chai espiritucunaca, Noé villajui punllacunapi Diosta na cazujcunami carca. Huambuna huasita Noé rurashpa tucuchingacamanmi Taita Diosca, paicunata llaquishpa shuyajurca. Chai huambuna huasita, yacu huambuchijpimi pusajpuralla quishpirirca.

21Chai yacuca, cunambi bautizarinatami ricuchijun. Chaimandami cunanga, Jesucristo causarishcamanda quishpirinchi. (Chai bautizarinaca, ñucanchipaj juchataca na anchuchinllu. Ashtahuangarin, tucui yuyaihuan Taita Diospajlla causanatami yachachijun).

22Cristoca jahua pachaman rishpami, Taita Diospaj ali maquiman tiyajun. Chaipimi angelcunapash, mandajcunapash, ushaita charijcunapash Paita cazunajun.