1Job runaca, cashna nishpami tigrachirca:
2“Na ushaita charij runataca, ¿chashnachu yanaparcangui?
Imata ruraitapash na ushaj runataca, ¿chashnachu yanaparcangui?
3Imatapash na yachajushca runamanga, ¿ima ali yuyaitata curcangui?
¿Ima ali yachajunatata rijsichircangui?
4Can rimashca shimicunataca, ¿pita villarca?
Canmanga, ¿pita cai shimicunataca yachachirca?
5Huañushcacunapaj almacunaca, alpa ucupimi chujchunajun.
Mama cucha yacucunapash, chaipi imalla tiyajcunapashmi chujchunajun.
6Paipaj ñaupajpica, Seolpash ricunallami.
Abadonbash, na imahuambash quilpashcachu.
7Paica, jahua pachataca chushajpimi churarca.
Cai pachataca, imapillapash na huarcurcachu.
8Yacucunataca, Paipaj fuyupimi huatarca.
Chai tucui yacucunahuan cashpapash, fuyuca na liquirinllu.
9Pai mandangapa tiyarinataca pacashcami charijun.
Chai tiyarinataca, fuyu ucupimi pacashca.
10Maicamanlla yacucuna tiyachumbash, Paimi mujunda churarca.
Michatapash, yana tutatapash chashnallatami churarca.
11Jahua pachata charij pilarshnacunapashmi manllarishpa chujchunajun.
Pai jarcashpa rimashcata uyashpami, chashna chujchunajun.
12Paipaj ushaihuanmi, mama cucha yacutapash cuyuchijun.
Paica, ninan ushaihuanmi manllanayaita yacu jatarijpipash jarcajun.
13Paipaj Samaihuanmi jahua pachataca juyaillata rurarca.
Paipaj ushaihuanmi, quingushpa purij culebratapash rurarca.
14Cai rurashcacunaca, Paipaj ninan ushaihuan callari rurashcallami.
¡Paimandaca, ashagutallami yachanchi!
Ashtahuangarin, Paipaj ninan ushai imashna cajtaca,
¿pita yachai ushangayari?” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
