1Cai pachapica, ninandapacha llaquichinajujtami ricurcani. Llaquita apajcuna huacanajujpi cushichingapaca, pipash na tiyarcachu. Paicunata llaquichijcunallami ushaita charirca. Paicunata shinllichij runaca, na tiyarcachu.
2Chashna llaquicunahuan causangapa randica, huañushpa rishcacunara ali cajtami yacharcani.
3Shinallata, cai pachapi llaquipi causajcunahuan, huañushpa ñaupajcunahuan ricujpica, nara huacharishcarami ali canga yajurcani. Cai pachapi llaquicunataca nara ricushca cashpami, chashna ali canga yajurcanimi.
4Shinallata, tucuita imata aliguta rurajpipash, shuj charishcata munashpa quichurishpa fiñanajunatami yacharcani. Chaicunapash yangalla, yuyaita shaijuchingapalla cajtami yacharcani.
5Cashnami nishca carca: “Imatapash na rurashpa yanga tiyajuj juizu illaj runaca, paillatami yarjaimanda huañunga.
6Na samashpa imatapash rurashpa ninanda shaijungapa randica, ashaguta samashpandi imagutapash rurashpami ali canga” nishcami.
7Cai pachapica, imapash yangalla cashcatami cutin ricurcani.
8Shuj runatami, churipash, huauquicunapash illaj cashpa, paipaj randi mandangapaca pipash na tiyajta ricurcani. Shina cashpapash, na samashpami imata cashpapash rurajun. Paica, ashtaca charishcacunata ricujushpapash, na chaihuanlla cushijunchu. Shinallata: “¿Piman saquingapata chashna ninanda imatapash rurashpa, ñucallata ninanda llaquita apajuni?” nishpapash, na tapurinllu. Chaipash yangallata, shinllipachami.
9Shujlla causangapa randica, ishcaipura causanami ashtahuan ali. Shina causashpami, imata rurashcamandapash ashtahuan japinata charin.
10Shuj urmajpipash, shujca paipaj cumbata jatarichingami. Ashtahuangarin, ¡shujlla causaj runalla! Pai urmajpi, maijan jatarichijca na tiyangachu.
11Shinallata, ishcandi pactalla puñushpaca, cunujllami puñunga. Ashtahuangarin shujlla cashpaca, ¿imashnata cunujlla puñunga?
12Shujlla cajpica pipash macashpa mishangallami. Ishcai tucushpaca shinlli shayaringami. Shinallata, quimsata caupushca racu puchaca na uchalla fitirinllu.
13Jatun mandaj rucu runaca, shinlli shungu cashpami, ali yuyaita cujpipash, ña na chasquingapa munan. Chaipaj randica, imagutapash na charij huambragu alipacha yachajushca cashpami, ashtahuan ali.
14Chai jatun mandaj runaca, imagutapash na charij huacharishca cashpapash, prezuna huasimanda llujshishpami, mandana ushaita japirca.
15Cai pachapi tucui causajcunaca, chai jatun mandajpaj randi, mandana huambrahuan pacta purinajujtami ricurcani.
16Paita catijcunaca, na tucurinalla ashtaca gentecunami carca. Shina cashpapash paicunapaj jipa miraicunaca, paihuanga na cushijungachu. Chaipash yangalla, yuyaita shaijuchingapallami.
Who We AreWhat We EelieveWhat We Do
2025 by iamachristian.org,Inc All rights reserved.
