1Pablomi cani. Cristopaj ninan juyaimandami cangunataca ninanda mañani. Cangunapaj ñaupajpi cashpaca manllajllami cani. Ashtahuangarin carupi cashpaca, ninanda shinlli tucunillami.
2Cangunahuan chaipi cashpaca, na shinllitapacha rimangapa munaimanllu. Huaquingunaca, “paicunapaj munaitallami rurashpa purinajun” nishpami ñucanchitaca juchachinajun. Chashna nijcunatami, shinllitapacha rimangapa munani.
3Cai pachapi causashpapash, na cai pachapajta rurashpa purijcunachu canchi.
4Ñucanchi macanajunaca, na cai pachapi gentecunahuan macanajungapa rurashcachu. Ashtahuangarin, Taita Dios caramushca ushaihuanllami, jatun na alita rurana munaicunataca mishashpa tucuchina canchi.
5Shinallata, Taita Diosta ama ali rijsichunmi, ninanda jariyashpa, na ali yuyaicunata cushpa jarcariyanajun. Tucui chaicunata mishangapami, ñucanchi yuyaicunataca, Cristotalla cazuchun saquina canchi.
6Na pandashpa canguna aliguta cazunajujpica, shujcuna na cazushcamanda llaquichingapami shuyanajunchi.
7Cangunaca, ñavipi ricurishcatallami ricushpa causanguichi. Maijan cashpapash, Cristopajmi cani yajushpaca, paipash Cristopaj cashcashnallata, ñucanchitapash, Cristopajmi yachunmi munani.
8Apunchi Jesus ñucanchiman ushaita carashcamandami ninanda cushijuni. Canguna ama chingachun, ashtahuangarin shinlli tucushpa catichunmi chai ushaitaca carashca. Chaimandami na pinganayachishpa rimajuni.
9Cangunata manllachingapa quilcashpa cachamushcataca na yanachu canguichi.
10Ñucataca cashnami ninajun: “Quilcashcacunapica, yapa shinllitapacha rimashpami cachamun. Ashtahuangarin, paillata ñucanchihuan cajpica, pipash yangata ricunllami, pai rimashcapash na imapash canllu” ninajunmi.
11Maijan chashna nijushpapash aliguta yachachunmi cashna nini: “Carupi cashpa, imashnami quilcashcacunapi rimashcanchi, chashnallatami, cangunahuan cashpapash, tucuita rurashpa pactachishun” ninimi.
12Huaquingunaca, alimi canchi yashpami, paicunapurallata alicachirinajun. Ñucanchica na chashna rurajcunachu canchi. Ashtahuangarin paicunallata, “alimi canchi” yashpa, paicunallata alicachirinajushpami, juizu illajcunashna ricurinajun.
13Ñucanchica, na yangata jariyashpami, imata rurachumbash Taita Dios ushaita carashcamandalla cushijunchi. Chai ushaihuanmi cangunaman villangapa chayai usharcanchi.
14Cangunapajman na rishcashna, yapalla jariyanajushpaca na alichu canchiman. Cristomanda ali villanata villangapaca, cangunapajmanmi punda chayarcanchi.
15Chaimandami, shujcuna ruranajushcamandaca na jariyaita ushanchi. Ashtahuangarin, canguna aliguta Diospi crishpa, ñucanchi mandashcashnallata catinajujpimi, ñucanchipash alicachi tucushun.
16Shinallata, shujcuna punda villashca llactacunata yalishpa, shuj llactacunaman rishpami quishpirinamanda villangapa munanchi. Shina rurashpami, shujcuna villashpa callarishcacunataca na ñuca rurashcashna jariyajusha.
17Ashtahuangarin, alipi ricuringapa munashpaca, Jatun Diosmandalla alipi ricurichun ninimi.
18Maijambash paillata alicachirijushpaca napacha alichu, ashtahuangarin, Taita Dios alicachijpi causanami ashtahuan ali.
Who We AreWhat We EelieveWhat We Do
2025 by iamachristian.org,Inc All rights reserved.
