ISAÍAS 8 - Quichua Imbabura 2016

Mandaj Diostalla manllashpa causanamanda

1Mandaj Diosca, cashnami nihuarca: “Shuj jatun tablapi: ‘Maher-salal-hasbaz’ shimicunapimi, quilca cati ushanallata quilcana cangui” nihuarcami.

2Chai jipaca, imashna cashcatapash ricushpa chashnatapacha villachunmi, Urías shuti sacerdoteta, Jeberequías shuti runapaj churi Zacariasta, ñucahuan tandanajuchun cayarcani.

3Chai jipami, ñuca huarmi profetahuan pacta puñushpa, shuj jari huahuaguta charircanchi. Ñuca churi ña huacharijpimi, Mandaj Diosca cashna nihuarca: “Cai huahuagutaca, Maher-salal-hasbaz shutita shutichingui.

4Cai huahuaguca: ‘Ñuca taiticu’, ‘ñuca mamita’ nitapash nara yachajujpillatami, Damasco pueblopi, Samaria pueblopi causajcuna, imatalla charishcacunata quichushpa, Asiria llactata jatun mandajpaj ñaupajman apanga” nihuarcami.

5Mandaj Diosca, cutinmi cashna nihuarca:

6“Cai gentecunaca Diostapash,

alimanda rijuj Siloé yacutashna yangapi churashpami,

Rezín shuti runata, Remalías shuti runapaj churita manllashpa,

paicunahuan tandanajurca.

7Shina cashcamandami, Jatun Dios Ñucaca,

Éufrates jatun yacu jatarishpa quilpajshna, cai llactataca,

Asiria llactata jatun mandajta cachamushpa tucuchigrini.

Paimi, yacu jatarishpa, pambacunaman quilpajshna shamushpa,

cai tucui llactacunataca ninan ushaihuan llaquichinga.

8Chai jatun yacuca, Judá llactacaman yalishpa jundashpami,

chaipi causajcunataca cungacaman pambanga.

Shina cajpipash, cangunapaj Dios cangunahuan cashpami,

paipaj alasta pascashpa, cai tucui alpataca quishpichisha nircami” nihuarca.

9Llactacunapi causajcuna, tucuicuna tandanajushpapash, tucuchi tucunguichimi.

Caru llactacunapi causajcunapash, tucuicuna caita uyaichi:

Alipacha shayarichilla, llaquichi tucunguichillatami.

Alichirishcalla shuyaichilla, llaquichi tucunguichillatami.

10Imatapash yarinajuichilla, chaipash yangallatami canga.

Imatapash parlanajuichilla, chaipash napacha pactangachu.

Taita Diosca ñucanchihuanmi.

11Mandaj Diosca, ñucataca Paipaj ninan ushaihuan charijushpami, na alita ruraj gentecunata ama catichun yachachishpa, cashna nihuarca:

12“Llaquichingapa pacalla parlajushpapash, na tucuicuna chai yuyaihuanlla parlanajunllu. Cangunaca, paicuna imata manllanajujpipash, na manllanachu canguichi.

13Tucui ushaita charij Ñucatallami, jatunyachina canguichi. Ñucatallami manllashpa causana canguichi.

14Shina causajpimi cangunapajca, pacajuna huasishna casha. Shina cashpapash, ishcandi llactapi causaj Israelcunapajmi, nitijana rumishna casha. Ñucapillata nitijashpami urmanajunga. Jerusalenbi causajcunapajca, lazuna linllishnami casha.

15Taucacunami, paicunapura tsagnarishpa urmashpa, llaquichi tucunajunga. Chashna urmashpami, prezu japi tucunajunga.

16Imashna causanata Ñuca yachachishcata, mandashca shimicunata cushcata,

Ñucata catijcuna ricushpa yachajuchun, sellashpa aliguta alichingui” nihuarcami.

17Ñucaca, Mandaj Diostami shuyajusha.

Paica, Jacobpaj miraicunataca, jichushpami saquirca.

Shina cajpipash, Paitallami yariashpa causajusha.

18Ñucapash, Mandaj Dios cushca ñuca churicunapash,

Israelcuna ima tucunata yarichishpa ricuchijcunami canchi.

Sion lomapi causaj tucuita Mandaj Diosmi ñucataca, chaipaj agllahuarca.

19Maijan cashpapash cangunataca, cashnami ninga:

“Muspachij yumbucunata, alilla rimaj yachajcunata tapuichiyari” ningami.

Shina nijpica, cashna tigrachinguichi: “Dios agllashca gentecunaca, ¿nachu ñucanchi Taita Diosta tapuna canchi?

¿Causajcunamandaca, huañushcacunatachu tapuna canchi?” ninguichi.

20¡Dios mandashca shimicunata, imashna causachun yachachishcata ricuichi!

Chaipi nijushcata na villashpaca, yana tutapillatami causanajunguichi.

21Paicunaca ninanda shaijushca yarjachishcami, cai pachapica purinajunga.

Chashna purinajushpami, paicunata jatun mandajtapash ninanda fiñashpa ricunajunga.

Paicunapaj Taita Diostapash vichai ricushpa ninanda na alicachishpami rimanajunga.

22Shinallata cai pachata ricunajushpapash, jatun llaquitallami ricunajunga.

Paicunaca, ninan manllaihuan llaquipi cashpami, yana tutapishna causanajunga.