1Paicunaca cuchata chimbashpami, Gadara shuti llactaman shamurca.
2Barcomanda Jesús llujshijhuanmi, mapata rurachij aya jundashca shuj runaca, huañushcata pambana utujumanda llujshishpa tuparimurca.
3Chai runaca, huañushcata pambana utujupimi causajurca. Paitaca, cadenacunahuambash pipash na huatai ushanllu carca.
4Chai runaca, cutin cutinmi grillocunahuan, cadenacunahuan huatai tucushpa causarca. Ashtahuangarin, cadenacunataca, fitishpami tucuchij carca. Shinallata, grillocunatapash ñutushpami saquin carca. Charitacarin pipash na ushanllu carca.
5Chai runaca tutapash, punllapash urcucunapi, huañushcata pambana utujucunapimi, ninanda caparishpa purijuj carca. Paillata rumicunahuan huajtarishpami, chugririjun carca.
6Jesusta carumanda ricushpa calpamushpami, Paipaj ñaupajpi cungurirca.
7Paica cashna nishpami ninanda caparirca:
“Tucuita yali ninan ushaita charij Taita Diospaj Churi Jesús, Canga ñucahuanga, ¿imatata ricunata charinguiyari? Taita Diospaj shutipimi, ama llaquichihuaichu nishpa ninanda mañapani” nirca.
8Jesusca: “Mapa aya, cai runamanda llujshi” nijpimi, chashna caparijurca.
9Jesusca:
“¿Ima shutita cangui?” nishpami tapurca.
Shina tapujpimi:
“Huaranga Huaranga shutimi cani. Ñucanchica, ashtaca ashtacacunamari canchi” nirca.
10Shina nishpami:
“Cai llactamandaca ama llujchishpa cachahuaichu” nishpa, ninanda mañajurca.
11Chai urcu pambacunapimi, ashtaca cuchicuna micunajurca.
12Shina cajpimi tucui ayacunaca:
“Chai cuchicunapi yaicuchun, ñucanchitaca cachahuai” nishpa, ninanda mañanajurca.
13Shina mañajpimi, chai cuchicunapi yaicuchun saquirca. Mapa ayacuna chai runamanda llujshishpaca, cuchicunapi yaicujhuanmi chai cuchicunaca, jaca jahua patamanda cuchaman huashajushpa huañurca. Chai cuchicunaca, ishcai huarangashnami carca.
14Cuchicunata michijcunaca, paicuna causanajuj pueblopipash, pambacunapipash villangapami ninanda calpanajurca. Shina villajpimi, ima tucushcatapash ricungapa tucuilla gentecuna llujshinajurca.
15Jesuspajman chayamushpaca, ashtaca ashtaca aya jundashpa llaquichijpi causajuj runa ali tucushca tiyajujtami ricunajurca. Chai runaca, churajunatapash churajushca, ali juizupimi tiyajurca. Shinata ricushpami ninanda manllarinajurca.
16Chaita ricushca gentecunami, aya jundashca runa imashna ali tucushcatapash, cuchicuna imalla tucushcatapash paicunaman villanajurca.
17Chaimandami Jesustaca:
“Cai llactacunamandaca ripailla” nishpa ninanda mañanajurca.
18Barcopi Jesús ña yaicujujpimi, ayacunata llujchi tucushca runaca:
“Ñucatapash pushahuaiyari” nishpa ninanda mañajurca.
19Ashtahuangarin Jesusca, na paihuan richun saquishpami, cashna nirca:
“Cambaj huasiman rilla. Cambaj ayllucunapajman rishpa, Jatun Dios canman ninan alicunata rurashcatapash, canda llaquishpa juyashcatapash villagri” nircami.
20Shina nijpi chai runa rishpaca, Jesús imashna chai jatun alicunata rurashcatami, Decápolis shuti llactapi villai callarirca. Shina villajpimi, tucuicuna ninanda manllarinajurca.
Jairopaj ushimanda, Jesuspaj churajushcapi tacarishca huarmimanda(Mat. 9:18-26; Luc. 8:40-56)21Jesusca, cuchatami barcopi cutin chimbarca. Chai cucha manñapi cajpimi, ashtaca ashtaca gentecuna Paipajman tandanajumurca.
22Chaimanmi, sinagogapi mandajpuramanda Jairopash shamurca. Paica, Jesusta ricushpaca, ñapashmi Paipaj ñaupajpi cungurirca.
23Paica cashna nishpami, Jesustaca ninanda mañajurca:
“Ñuca ushigumi ña huañugrijupan. Paipaj umapi Cambaj maquita churangapa ripashunyari. Shina churajpica, ali tucungallami” nircami.
24Shina nijpimi, Jesusca chai runahuan rirca. Paitaca, ashtaca gentecunami tangaripi catishpa rinajurca.
25Chaitaca, chunga ishcai huatata yahuar shamujujlla huarmipashmi catishpa rijurca.
26Chai huarmica, ashtaca jambijcunapajman rishpapash na ali tucushpami llaquilla causajurca. Tucui pai charishcacunata tucuchishpapash na ali tucushpami ashtahuan anllayashpa catirca.
27Chai huarmica, Jesusmanda parlanajujta uyashpami, gentecunapaj chaupita yalimushpa, huashata shamushpa jahualla churajushcapi tacarirca.
28Paica: “Jesús churajushcapi tacarishpalla ali tucushallami” yajurcami.
29Pai tacarijhuanmi, yahuar shamujujca ñapash chaquirca. Shinamandami, astijshna llaquichijun chai nanaimanda ali tucushcata yacharca.
30Chai jipami Jesusca, ninan ushai paimanda llujshishcata yachashpa, chai tucui gentecunata tigrarishpa ricushpa:
“¿Pita Ñuca churajushcacunapi tacarirca?” nishpa tapurca.
31Shina tapujpimi, Paipaj yachajujcunaca cashna ninajurca:
“¿Cai tucui gentecuna tangaripi catimunajujtaca nachu ricungui? Shinachu ¿Pita Ñucapi tacarirca nishpa tapujungui?” ninajurca.
32Ashtahuangarin, maijan Paita tacarishcata ricungapami muyundita ricujurca.
33Shina ricujujpimi chai huarmica, paipi ima tucushcata yachashpa, ninanda manllarishpa chujchurirca. Shina cashpami, Jesuspaj ñaupajman rishpa cungurishpa, na llullashpa tucuita villajurca.
34Shina villajpimi Jesusca:
“Ñuca huahualla, can tucui shunguhuan crishcamandami, ali tucushcangui. Cunanga, cushijushpa rilla. Astijshna llaquichijun nanaimandaca, ñami ali tucushcangui” nirca.
35Jesús shina nijujpillatami, sinagogapi mandajpaj huasimanda huaquin runacuna shamushpa cashna ninajurca:
“Cambaj ushiguca, ñamari huañurca. Yachachijtaca, ¿imapata yanga fiñachijungui?” ninajurca.
36Ashtahuangarin chashna ninajujta Jesús uyashpami, sinagogapi mandaj chai runataca:
“Ama manllaichu, critallami ali crina cangui” nirca.
37Jesusca, tucuicunata saquishpami, Pedrota, Jacobota, Jacobopaj huauqui Juandalla pushashpa rirca.
38Sinagogapi mandaj runapaj huasiman Jesús shamushpaca, gentecuna caparinajujta, huacanajujta, ninan llaqui llaqui tiyanajujtami ricurca.
39Jesús yaicushpaca cashnami nirca:
“¿Imashpata cashna caparishpa huacanguichi? Cuitsaguca na huañushcachu, puñuitallami puñujun” nircami.
40Shina nijpimi, Jesustaca asishpa ricunajurca. Ashtahuangarin Jesusca, tucuillata canllaman llujchishpami, chai cuitsagupaj taitata, mamata, paihuan shamushca yachajujcunatalla pushashpa, chai cuitsagu sirijuj ucuman yaicurca.
41Chaipica, chai cuitsagupaj maquita japishpami:
“Talita cumi” nirca.
Chashna nishpaca: “Cuitsagu, candaca jatari ninimi” nijunmi.
42Shina nijpica, chai cuitsaguca, jatarishpa puri callarircallami. Paica chunga ishcai huatatami charirca. Shinata ricushpami ninanda manllarinajurca.
43Ashtahuangarin Jesusca: “Cashna tucushcataca pipash na yachanachu” nishpami, cutin cutin mandarca. Shina nishpallami, cuitsaguman micunata carachun mandarca.
Who We AreWhat We EelieveWhat We Do
2025 by iamachristian.org,Inc All rights reserved.
