ÉXODO 20 - Quichua Imbabura 2016

Chunga Mandashca Shimicunamanda(Deut. 5:1-21)

1Taita Diosca, tucui cai shimicunatami cashna nishpa villajurca:

2“Ñucami Egipto llactapi gañan causanajushcamanda llujchimuj, canda Mandaj Taita Dios cani.

3Ñuca ñaupajpica, shuj rurashcalla dioscunata ama charinguichu.

4Imaman rijchajtapash ama ruranguichu. Jahua pachapi, cai pachapi, alpa ucupi, alpa ucu yacupi tiyajcunaman rijchajtapash ama ruranguichu.

5Paicunataca ama cunguringuichu, ama alicachinguichu. Ñucami, canda Mandaj Taita Dios cani. Ñucaca ninan ushaita charij, Ñucapajlla cachun munaj Diosmi cani. Ñucata fiñashpa, na cazuj taitacunapaj juchamandaca, paicunapaj huahuacunataca, quimsa miraicaman, chuscu miraicamambash llaquichij Diosmi cani.

6Ashtahuangarin Ñucata juyashpa, Ñuca mandashcacunata pactachijcunataca, huaranga huaranga miraicunacaman llaquishpa juyaj Diosmi cani.

7Canda Mandaj Taita Diospaj shutitaca, ama yangata rimanguillachu. Mandaj Diospaj shutita yangata rimajtaca, llaquichishapachami.

8Samana punllataca na cungashpa, Ñucapajlla shicanyachingui.

9Tucui imata ruranatapash, sucta punllacamanllami rurana cangui.

10Ashtahuangarin canchis punllapica, canda Mandaj Taita Diosman shicanyachishca samana punllami canga. Chai punllapica, ima ruranatapash ama ruranguichu. Cambash, cambaj churipash, cambaj ushipash, cambajta ruraj jaripash, huarmipash, cambaj animalpash, shuj llactamanda shamushpa, cambaj huasipi causajuj runapash, chai punllapica ima ruranatapash na ruranachu.

11Cangunata Mandaj Diosca, sucta punllacamanmi, jahua pachatapash, cai pachatapash, mama cuchatapash, chaicunapi tucui ima tiyajcunatapash churarca. Canchis punllapica samarcami. Shinamandami, Mandaj Diospaj samana punllataca bendiciashpa shicanyachirca.

12Cambaj taitata, cambaj mamataca alicachishpa cazungui. Mandaj Taita Dios canman carashca llactapi, unai punllacunacaman causanata ashtahuan mirachijuchunmi chashna cazuna cangui.

13Ama huañuchinguichu.

14Cazarashca jahua ama shujhuan causanguichu.

15Ama shuhuanguichu.

16Ama pitapash yangata chashnapachami nishpa juchachinguichu.

17Ama pipaj huasitapash, ñucapaj cashcanman yashpa ricunguichu. Ama pipaj huarmitapash, ñucapaj cashcanman yashpa ricunguichu. Shinallata, pipajta ruraj jaritapash, huarmitapash, pipaj huagratapash, pipaj burrutapash, ashtahuan imatalla charishcacunatapash, napacha ñucapaj cashcanman yashpa ricunachu cangui” nijurcami.

Israelcuna ninanda manllarishcamanda

18Tucuilla Israelcunami, culun nijujta, punchapamba shitajujta, cachuta huacachijujta uyanajurca. Shinallata, urcu cushnijujtapashmi ricunajurca. Israelcunaca, chaita ricushpa manllarishpa, chujchushpami caruman shayarinajurca.

19Shinamandami Moisestaca:

“Ñucanchiman imata nina cashpapash, canmi rimana capangui. Ñucanchica cazupashunllami. Taita Dios ñucanchihuan rimajpica huañuringapachami” ninajurcami.

20Shina ninajujpimi Moisesca, Israelcunataca cashna nirca:

“Na manllanachu canguichi. Canguna cazujta, na cazujta yachangapami Taita Diosca shamushca. Canguna, Paita manllaihuan cazushpa causachunmi, chashna shamushca” nircami.

21Shinamandami, Israelcunaca carupi shayanajurca. Shinallata Moisesca, maipi Taita Dios rimajuj amsa fuyumanmi chayajurca.

22Mandaj Diosca, Moisestaca cashnami nirca: “Israelcunataca cashna ningui: ‘Cangunaca, Ñucataca jahua pachamanda, cangunahuan rimajujtami ricushcanguichi.

23Ñucaman rijchaj, culqui dioscunatapash, curi dioscunatapash napacha ruranachu canguichi.

24Ñucamanga, alpamanda rurashca altartami rurana canguichi. Chai altarpimi, Ñucaman cushpa tucuillata rupachina animalcunatapash, Ñucahuan ali cangapa cuna animalcunatapash, cangunapaj llamacunatapash, huagracunatapash huañuchina canguichi. Maipi cashpapash, Ñuca shutita yarina cachun, Ñuca rurashca pushtumanmi, cangunata ricungapa shamushpa bendiciasha.

25Ñucaman rumicunahuan altarta rurashpapash, rumicunata llagllashpaca na ruranachu canguichi. Imahuambash llagllashca rumica na altarta rurangapachu canga.

26Altarman vichai rijujpi, cambaj lluchulla ama ricurichunmi, gradacunatapash na churana canguichi’ ningui” nircami.