JONÁS 1 - Quichua Imbabura 2016

Mandaj Diospaj ñaupajmanda, Jonás pacajushpa rishcamanda

1Mandaj Diosca, Amitai shuti runapaj churi Jonás runatami cashna nirca:

2“Nínive shuti jatun puebloman rishpa, paicunata llaquichina cashcata villagri. Paicuna na alita rurashcacunaca, ñami Ñuca ñaupajman chayamushca” nircami.

3Shina nijpimi Jonasca, Mandaj Diospaj ñaupajmanda, Tarsis puebloman pacajushpa ringapa, Jope shuti puebloman urai rijurca. Paica, Mandaj Diospaj ñaupajmanda pacajushpa ringapami, Tarsis puebloman rigrijuj barcopi culquita cushpa, paicunahuan ringapa yaicurca.

4Ashtahuangarin Mandaj Diosca, ninan huairatami mama cuchaman cachamurca. Shinamandami mama cuchapica, barcopash faquirishpa tucurinatashna ninan huairahuan tamiajurca.

5Chaimandami barcota purichijcunaca, ninanda manllarishpa, paicunapaj dioscunata caparishpa mañanajurca. Shinallata, barco fangalla tucuchunmi, barcopi ima tiyashcatapash yacuman shitanajurca. Ashtahuangarin Jonasca, chai barcopi imatapash alichina ucuman uriajushpami, ninanda puñujushca carca.

6Shina puñujujpimi, chai barcota purichijcunata mandaj runaca, Jonaspajman urai rishpa cashna nirca:

“¿Imashpata puñujunguilla? Jatarishpa, cambaj Taita Diosta mañai. Imashpapash ñucanchita, cai llaquimanda quishpichingapashchari” nirca.

7Tucuicunami, paicunapaj cumbacunata cashna ninajurca:

“Maijanmanda cai llaquicunaca shamushcata yachangapa, Pipaj urmajta rurashpa yachashunchi” ninajurcami.

Pipaj urmajta rurashpa ricujpica, Jonás runapajpimi urmarca.

8Chaimandami paicunaca, cashna ninajurca:

“¿Imashpata cai llaquicunaca shamun? ¿Imatata rurashpa causangui, maimandata shamungui? ¿Maijan llactamandata cangui, maijanpurata cangui?” ninajurcami.

9Shina nijpimi Jonasca cashna nirca: “Ñucaca, hebreo runami cani. Jahua pachapi causaj Mandaj Taita Diostami cazushpa causani. Paica, mama cuchatapash, cai pachatapash ruraj Taita Diosmi” nirca.

10Shina nijpimi chai runacunaca, ninanda manllarinajurca. Shinallata, Mandaj Diospaj ñaupajmanda pacajushpa rijushcata villajpi yachashpami:

“¿Imapata chashna rurarcangui?” ninajurca.

11Mama cuchaca, ashtahuan ashtahuan shinlliyashpa cuyujujta ricushpami:

“Cunanga, cai yacu casilla tucuchunga, ¿candaca imatata rurashun?” ninajurca.

12Shina nijpimi Jonasca cashna nirca:

“Ñucata mama cuchaman shitajpillami, mama cuchaca casilla saquiringa. Ninan huairahuan cai tamiapash, ñucamanda cangunata cashna llaquijujtami yachani” nircami.

13Chai runacunaca, barcota alpaman llujchishun yashpami, ashtahuan shinllita purichinajurca. Chai mama cuchaca, ashtahuan ashtahuan shinlliyashpa cuyujujpimi, alpaman llujchitaca na ushanajurca.

14Chaimandami chai runacunaca, cashna nishpa Mandaj Diosta mañanajurca: “Mandaj Dioslla, cai runamandaca, ama ñucanchitapash huañuchihuaichu. Ima na alitapash na ruraj cai runapaj yahuarmandaca, ama ñucanchitapash juchachihuaichu. Mandaj Dioslla, can imata rurangapa munashcatami rurashcangui” ninajurcami.

15Chai jipami Jonastaca, mama cuchaman shitanajurca. Shina shitajpimi mama cuchaca, ninandapacha shinlliyashpa cuyujushpapash, casilla saquirirca.

16Chaita ricushpami, Taita Diostaca ninanda manllanajurca. Chaimandami animalta Taita Diosman cushpa huañuchishpa, tucuipi cazushpa causangapa ari ninajurca.

17Ashtahuangarin Mandaj Diosca, Jonasta langachunmi, shuj jatun pijita cachamurca. Chai piji langajpica, quimsa punlla quimsa tutatami, pijipaj vijsa ucupi carca.