1Cangunapurapica, “huainayashpa causanajun” nijtami uyani. Chashna causanajujtaca, Diosta na crijcunapurapipash na uyashcanichu. Shuj churica, “paipaj taitapaj huarmihuanllatami causajun” nijtami uyani.
2Chashna cashpapash, jariyashpami causanguichi. ¿Nachu chashna na alita ruraj runataca, ninanda llaquirishpa, cangunapuramandaca llujchishpa cachana canguichi?
3Cangunahuan na chaipi cashpapash, ñuca espiritupica cangunahuanmi cani. Shina cashpami, juchata ruraj chai runataca, chaipi cashcashnallata ninanda na alicachijuni.
4Ñucanchi Apunchi Jesucristopaj shutipimi tandanajuna canguichi. Ñuca espiritupash, ñucanchi Apunchi Jesucristopaj ushaipash cangunahuanmi pacta canga.
5Shina tandanajushpami, chai runapaj causaitaca, Satanás tucuchijuchun cushpa saquina canguichi. Apunchi Jesús shamui punllapi, chai runapaj espíritu “quishpirichun” yashpami chashna rurana canguichi.
6Canguna jariyanaca napacha alichu. Tanda masapica, ashalla levadurata chapujpipash tucuillata punguichijtaca, ¿nachu yachanguichi?
7Mushuj masashna tucungapaca, huaglishca levadurata shitashpami, mapa illaj tucushpa, levadura illaj tandashna tucunguichi. Pascua punllapi Diosman carajpi huañuchishca Llamagushnami, Cristoca ñucanchimanda huañurca.
8Shina cashcamandami, pascua punllapica, cushijunapacha canchi. Huaglishca, jatun na ali levadurashna canataca saquishpami, levadura illaj tandagushna cashpa, ima na alitapash na yarishpa, ali shunguhuambacha causana canchi.
9“Huainayashpa causajcunahuanga, na tandanajunachu canguichi” nishpami ña pundata quilcamurcani.
10Shina cashpapash: “Cai pachapaj munaita rurashpa huainayajcunahuan, charijyangapalla munajcunahuan, shuhuacunahuan, rurashcalla dioscunata mañajcunahuanga, na tandanajunachu canguichitaca” na nircanichu. Chashna cajpica, cai pachamandami llujshishpa rina canguichiman.
11Ashtahuangarin, cashna nishpami quilcamurcani: “Crijmi cani nijushpapash huainayashpa, charijyangapalla munashpa, rurashcalla dioscunata mañashpa, ‘ima llaquipash japishpami ali canman’ nishpa, machashpa, shuhuashpa causajcunahuanga, na tandanajunachu canguichi, paicunahuanga micuitallapash na pacta micunachu canguichi” nircanimi.
12Na crijcuna, na alita rurashcataca ¿ima ricunatata charini? Crijcunataca, ¿nachu cangunallata ima na alita rurashcatapash ricuna canguichi?
13Taita Diosmi, na crijcuna imatalla rurashcataca ricuchinga. Jatun na alita rurashpa causaj chai runataca, cangunapuramandaca llujchishpa cachanami canguichi.
Who We AreWhat We EelieveWhat We Do
2025 by iamachristian.org,Inc All rights reserved.
