NÚMEROS 27 - Quichua Imbabura 2016

Zelofehad shuti runapaj ushicuna imatalla mañashcamanda

1Zelofehad shuti runaca, Hefer shuti runapaj churimi carca. Hefer shuti runaca, Galaad shuti runapaj churimi carca. Galaad shuti runaca, Maquir shuti runapaj churimi carca. Maquir shuti runaca, Manasés runapaj churimi carca. Manasesca, Josepaj churimi carca. Zelofehad shuti runapaj ushicunaca: Maala, Noa, Hogla, Milca, Tirsa shuticunami carca.

2Paicunami, Moisespajman, sacerdote Eleazarpajman, tandanajushca Israelcunata mandajcunapaj ñaupajman shamunajurca. Mandaj Dioshuan tuparina jatun carpa punguman shamushpami cashna ninajurca:

3“Ñucanchi taitaca, chaquishca pambapimi huañuparca. Paica, Mandaj Diosta fiñashpa, Coré shuti runa tandachishca runacunahuanga na tandanajurcachu. Ashtahuangarin, paillata rurashca juchamandami huañurca. Paica, churicunatapash na chariparcachu.

4¿Imashpata ñucanchi taitapaj shutica, churita na charishcamandalla, paipaj ayllupuramandaca illapanga? Ñucanchi taitapaj ayllupurapica, ñucanchimambash alpata chaupishpa carahuai nipanchimi” ninajurcami.

5Paicuna chashna mañanajujpimi Moisesca, Mandaj Diosta tapurca.

6Mandaj Diosca, Moisestaca cashnami nirca:

7“Zelofehad shuti runapaj ushicunaca, paicuna japinatallatami mañanajun. Paicunapaj punda ayllucuna chaupishpa japina cashcamandaca, paicunapaj taitapaj japina cana alpataca, chai huarmicunaman cunami cangui.

8Shinallata Israelcunataca cashna ningui: ‘Maijambash jari huahuata na charishpa huañujpica, imatalla charishcacunaca ushipajmi saquirina canga.

9Ushitapash na charishpa huañujpica, imatalla charishcacunataca, paipaj huauquicuna japinata charin.

10Huauquicunapash na tiyajpica, imatalla charishcacunataca taitapaj huauquicuna japichun cunguilla.

11Paipaj taitapaj huauquicunapash na tiyajpica, paicunapaj ayllupuramanda ashtahuan quimirialla ayllucunamanmi cuna cangui. Tucui Israelcunami, cai mandashcacunataca pactachinapacha canga. Mandaj Dios imashna Moisesman mandashcashnami pactachina canga’ ningui” nijurcami.

Moisespaj randi pushaj cachun, Josueta churashcamanda(Deut. 31:1-8)

12Mandaj Diosca, Moisestaca cashnami nirca: “Abarim shuti urcumanmi vichai rina cangui. Chaimandami, Israelcunaman Ñuca carashca llactataca ricungui.

13Chai llactata ricushpaca, cambaj huauqui Aaronshnallata huañushpami, cambaj ñaupa taitacunahuan tandanajugringui.

14Zin shuti chaquishca pambapimi, Ñuca mandashcata na cazurcanguichi. Yacu illajpi tandanajushca Israelcuna fiñashpa Ñucata rimanajujpi, Ñuca ninan ushaita charishcata paicunapaj ñaupajpi na ricuchishcamandami, chai llactaman na chayashpallata huañugringui” nircami.

Zin shuti jichushca pambapi, Cades shuti pushtupimi, chai fiñanajushca yacuca llujshijushca.

15Moisesca, Mandaj Diostaca cashnami nirca:

16“Mandaj Dioslla, Canmari tucui gentecunaman causaita cuj, samaita caraj Taita Dios capangui. Tandanajushca Israelcunata pushachun shuj runata churapailla.

17Paica, Israelcunata ñaupashca llujshijuchun, yaicujuchun, maiman llujchishpapash pai pushashpa rijuchun churapailla. Mandaj Diospaj tandanajushca Israelcunaca, ama michij illaj llamacunashna purinajuchun chashna churapailla” nircami.

18Shina nijpimi Mandaj Diosca, Moisestaca cashna nijurca:

“Nun shuti runapaj churi Josuemi, Ñuca Espirituta charin. Paita pushamushpami, paipaj umapi cambaj maquita churana cangui.

19Chai jipaca sacerdote Eleazarpaj ñaupajman, tandanajushca tucuilla Israelcunapaj ñaupajman pushangui. Chaipica paicunapaj ñaupajpimi, paicunata mandaj cachun churana cangui.

20Shinallata tandanajushca tucui Israelcuna paita cazuchunga, cambaj mandana ushaita, shuj ashata paiman cungui.

21Josueman villangapaca, sacerdote Eleazarmi, Urim rumihuan, Mandaj Dios Ñuca ñaupajpi, Ñuca ima nishcata tapungapa shamunga. Pai mandajpimi Josuepash, tandanajushca tucuilla Israelcunapash llujshishpa, yaicushpa purinajunga” nijurcami.

22Moisesca, Mandaj Dios mandashcata pactachishpami Josuetaca, sacerdote Eleazarpaj ñaupajman, tandanajushca tucuilla Israelcunapaj ñaupajman pusharca.

23Chaipimi Moisesca, Mandaj Dios mandashcashna, Josuepaj umapi maquita churashpa, paipaj randi Israelcunata mandachun churarca.