HECHOS 17 - Quichua Imbabura 2016

Tesalónica pueblopi causajcunami caparinajushca

1Pablondi, Silasndimi, Anfípolis, Apolonia pueblocunata yalishpa, Tesalónica puebloman chayagrirca. Chaipimi, judiocunapaj sinagoga tiyarca.

2Pabloca, maipi cashpapash, sinagogaman yaicujlla cashpami, quimsa sabadocunata, paicunahuan chaipi chimbapurashpa rimarinajurca.

3Dios quilcachishca Shimipi nijujtaca, aliguta villashpa, ricuchishpami, cashna nishpa yachachijurca:

“Cristoca, llaquita apashpa huañushpapash, huañushcacunapaj chaupimanda causarinapachami carca. Ñuca cangunaman villajushca Jesusca, Cristopachami” nijurcami.

4Shina yachachijpimi, paicunapuramanda taucacuna crishpa Pablohuan, Silashuan tandanajurca. Shinallata, Diosta yarij griego gentecunapash, alicachi tucushca huarmicunapashmi, ashtacacuna crinajurca.

5Chaita ricushpami, na crij judiocunaca ninandapacha fiñashpa, yanga purij, na ali runacunata, chai pueblopi caparichun tandachinajurca. Shinallata, Jasón runapaj huasi punguta faquishpami, paicunataca, tucuicunapaj ñaupajman llujchingapa munanajurca.

6Chaipi na tarishpaca, Jasón runatapash, huaquin crijcunatapash, pueblota mandajcunapaj ñaupajman apashpami cashna nishpa ninanda caparinajurca:

“Cai runacunaca, tucui cai pachapi causajcunatamari umachishpa purinajun. Chaipajmi caimambash shamushca.

7Paicunatami, cai Jasón runaca mingachishpa charijushca. Tucuilla paicunami: ‘Shuj jatun mandaj Jesusmi tiyan’ ninajun. Shina nishpaca, César mandashcatami yangapi churanajun” ninajurcami.

8Chashna nijta uyashpami, chai pueblopi causajcunapash, mandajcunapash, ninanda caparinajurca.

9Mandajcunaman culquita cujpimi, Jasón runatapash, caishuj crijcunatapash cacharinajurca.

Pablopash, Silaspash, Berea shuti pueblopimi yachachinajushca

10Chai tutallatami crijcunaca, Pablotapash, Silastapash, Berea shuti puebloman uchalla cachanajurca. Paicuna chaiman chayashpaca, judiocuna tandanajuj sinagogamanmi yaicurca.

11Chaipi causajcunaca, Tesalónica pueblopi causajcunataca yali, ali yuyaita charijcunami carca. Paicunaca, Diospaj shimita villajpica, ninanda cushijushpami uyanajurca. Shina cashpami Dios quilcachishcataca, chashnapacha cajta yachangapa, punllandi aliguta yachajushpa catinajurca.

12Shina cashpami, paicunapuramandaca ashtacacuna Jesusta crinajurca. Shinallata, alicachi tucushca griego gentecunamanda huarmicunapash, tauca jaricunapashmi crinajurca.

13Pabloca: “Berea pueblopipashmi, Taita Diospaj Shimita villajun” nijtami Tesalónica pueblopi causanajuj judiocunaca uyarca. Shina uyashpami, chai pueblomambash rishpa, Pablotaca fiñashpa, ashtaca gentecunapi caparinajurca.

14Shina cajpimi chaipi crijcunaca, mama cucha manñaman Pablotaca, uchalla cachanajurca. Silashuan, Timoteohuanga, chaipillatami saquirirca.

15Pablota pushangapa mingai tucushcacunaca, Atenas pueblomanmi pushanajurca. Paicunatami Pabloca: “Silastapash, Timoteotapash: ‘Ucha ñucapajman shamuichi nijunmi’ nigripaichi” nirca.

Atenas pueblopimi, Pabloca villajushca

16Pabloca, Atenas pueblopi Silasta, Timoteota shuyajushpami chai pueblopica, rurashcalla dioscuna junda cajta ricushpa, paipaj shungupica ninandapacha llaquirirca.

17Chaimandami Pabloca, sinagogapica, judiocunahuan, Diosta yariashpa causajcunahuan, fiñarishpa chimbapura rimari callarirca. Plazapi purijcunahuambash, chashnallatami punllandi rimarijurca.

18Epicúreos, estoicos alipacha yachaj runacunapashmi, Pablohuanga rimarinajurca. Jesús quishpichij cajtapash, huañushcacuna causarinatapash villajpimi, huaquingunaca:

“Cai shimisapa runaca, ¿imatata nirijunyari?” ninajurca.

Ashtahuan shujcunaca:

“Ñucanchi na rijsishca dioscunamanda villajmi yarin” ninajurcami.

19Pablota japishpami, tandanajuna Areópago ucuman pushashpa, cashna ninajurca:

“Ñucanchi nara uyashcata can yachachijujtaca, ¿yachai ushanallachu canchi?

20Ñucanchi nara uyashca shimicunatami villaj shamushcangui. Can villajujca, ima cajta yachangapami munanchi” ninajurcami.

21(Atenas pueblopi causajcunapash, caru llactamanda shamushpa chaipi causajcunapash, nara uyashca shimicunata ninandapacha uyangapa munajcunami carca).

22Pabloca, Areópago huasi chaupipi shayarishpami cashna nijurca:

“Atenas pueblopi causajcuna, cangunataca, dioscunata alipacha yarijcuna cajtami ricujuni.

23Shinallata, ñuca caita purijushpaca, cangunapaj dioscunata yarina huasicunatami ricurcani. Shuj altarpica: ‘NA RIJSISHCA DIOSTA YARINAMI’ nishpa quilcashca tiyajujtami ricurcani. Chai Diostaca, na ricushpapash, ninanda alicachishpami causashcanguichi. Paimandami cangunaman villajuni.

24Cai pachatapash, cai pachapi tucui ima tiyajtapash ruraj Taita Diosmandami villajuni. Paica jahua pachata, cai pachata Mandaj cashpami, gentecuna rurashca huasicunapica na causajun.

25Paita alicachishpa gentecuna imata maquihuan rurachumbash na munanllu. Paica, causaita, samaita, imata munashcatapash tucuicunamanmi caramujun.

26Shujlla runamandami cai pachapica, ninandapacha gentecuna mirashpa causanajuchun rurashca. Paillatami, gentecuna causana huatacunatapash, paicuna maicamanlla causanajuchumbash churashca.

27Ñucanchi causashpallata, Taita Diosta mascashpa, imashnallapash Paihuan tuparichunmi munan. Ashtahuangarin Paica, ñucanchimandaca na carupichu.

28Paimandami causanchi, purinajunchi, imatapash ruranchi. Cangunapuramanda juyailla shimicunahuan yachachij runacunapashmi, cashna nishca: ‘Ñucanchica, paipaj miraicunami canchi’ ninajushcami.

29Taita Diospaj huahuacuna cashpaca: Curita, culquita, rumita rurashcacunaca, Diosman rijchajpachami nishpaca, na yarinachu canchi. Chaicunaca, imatapash ruranata ali yachaj runacunapaj munaihuan rurashcallami.

30Shinallata, na yachaimanda na alita rurashpa causashcataca, Taita Diosca na llaquichishpami saquishca. Ashtahuangarin cunanga, maipi cashpapash, tucuicunatami, ninanda llaquirishpa, Paipajman tigrarichun mandajun.

31Diosca, ñami shuj punllata agllashca. Chai punllapimi, cai pachapi causajcuna imata rurashcatapash ricuchishpa, imata cuna cashcata cunga. Chaipajmi, tucuicuna yachachun pai agllashca Jesustaca, huañushcacunapaj chaupimanda causachirca” nijurcami.

32Shina nijpi, huaquingunaca: “Huañushcacunapaj chaupimandami causarirca” nijta uyashpaca, ninanda asishpami na alicachinajurca. Shujcunaca:

“Can villajujtaca, cutimbajmi uyashun” ninajurcami.

33Shina nijpimi Pabloca, paicunapaj chaupimandaca llujshishpa rirca.

34Ashtahuangarin, huaquingunaca Jesusta crishpami, Pablohuan tandanajurca. Chaipica, tandanajuna Areopagopi tandanajujpura, Dionisio shuti runapashmi carca. Dámaris shuti huarmipash, shujcunapashmi crirca.