1Mandaj Diosca, Jeremiasmanmi cashna nishpa villarca:
2Israelcunata Mandaj Diosca, cashnami nirca: “Ñuca canman imata nishcatapash, quilcanami cangui.
3Mandaj Dios Ñucami, cashna nini: Ñuca agllashca Israelcunata, Judá llactapi causajcunata, prezu apai tucushcata tigrachimuna punllacunami ña chayamujun. Paicunapaj ñaupa taitacunaman Ñuca carashca cai llactamanmi tigrachimusha. Caipimi aligutapacha causanajunga” nircami Mandaj Diosca.
4Mandaj Diosmi, Israel llactapi, Judá llactapi causajcunamanda rimashpa cashna nirca:
5Mandaj Diosca: “Paicunaca: Ninan llaquihuan cashpami, manllarishpa caparinajurca” nijunmi.
Paicunaca, ali causaitaca napacha charircachu.
6¿Shuj jari runaca, huahuata ungunllachu? Chaita tapushpa yachanami canguichi.
Jaricunataca, unguna nanaihuan huarmishna vijsapi llapirinajujtami ricujuni.
Ñavicunapash, huañunalla tucushcatami ricurcani.
7¡Aij chai punllacunaca, jatun llaquimari canga!
Chashna llaquicunaca, pundamandapacha cunangaman na tiyashcachu.
Ashtahuangarin Israelcunataca, quishpichishami.
8Tucuita Mandaj Diosca, cashnatapashmi nin:
“Chai punllapica, Ñucami cangunapaj cungapi yuguta huatashcashna causanajushcataca cacharichisha.
Chashna cashpami, shuj llactamanda runacunapajca na ashtahuan gañan causanguichi.
9Ashtahuangarin, Mandaj Diospajta rurashpami causanguichi.
Shinallata, mandaj Davidpaj miraicuna mandajpimi causanguichi” nijurcami.
10Mandaj Diosca, cashnatapashmi nin:
“Ñucapajta ruraj Jacobpaj miraicunalla, na manllanachu canguichi.
Israel gentecunalla, imatapash na manllanachu canguichi.
Cangunataca, cangunapaj miraicunandimi, prezu causanajunmanda llujchimusha.
Shinamandami Jacobpaj miraicunaca, cushijushpa causanga.
Paicunataca, pipash na ashtahuan manllachingachu.
11Cangunata quishpichingapami, cangunahuan causajuni.
Ñucallatami cangunataca, shuj llactacunaman calpachircani.
Chai llactacunataca ñucallatami tucuchisha.
Ashtahuangarin cangunataca, na tucuchishachu.
Llaquichinallata cashpaca, can ali tucuchunmi llaquichisha” ninmi Mandaj Diosca.
12Mandaj Diosca, cashnatapashmi nin:
“Cambaj llaquicunataca, na alichi ushanallachu.
Cambaj chugricunatapash na jambi ushanallachu.
13Cambaj llaquicunata ali ricushpa alichingapaca, pipash illanmi.
Cambaj chugricunata alichingapa jambica illanmi.
14Canda ninanda juyajcunapash illanmi.
Candaca, pipash na ashtahuan mascangachu.
Candaca, fiñaj runa llaquichijshnami chugrichircani.
Millai runatashnami candaca astircani.
Canllata ninanda juchata rurashcamandami, ninanda fiñashpa chashna llaquichircani.
15Candaca na alita rurashcamandami llaquichircani.
¿Imashpata, tulluta faquijpishna caparijungui?
Cambaj nanaicunapaca, jambi illanmi.
Ninan na alicunata, ninan juchacunata rurashcamandami chashna llaquichircani.
16Shina cajpipash, canda llaquichijcunataca tucuillami tucuchisha.
Canda fiñajcunataca, tucuillami prezu cachasha.
Canda sarujshna llaquichijcunataca, Ñucami sarushpa tucuchisha.
Canda quichushpa apashcataca, shujcunami paicunatapash quichushpa apanga.
17Ashtahuangarin ñucallatami cambaj chugricunataca jambisha.
Candaca, shitashpami saquishca ninajunmi.
‘Sion shuti pueblotaca, pipash na yarinllu’ ninajunmi” ninmi Mandaj Diosca.
18Mandaj Diosca, cashnatapashmi nin:
“Jacobmanda miraicunataca prezumanda llujchimushpami, paicunapaj llactaman tigrachimusha.
Paicunapaj llactataca llaquishpami chashna rurasha.
Lomapi tiyashca pueblotapash, cutinmi shayachinga.
Ñuca huasipash, punda cashcashnami, cutin huasichi tucunga.
19Ñucata Jatunyachishpa candashcapash, ninanda cushijushpa caparinajushcapash cutinmi uyaringa.
Paicunataca, ninandami mirachisha.
Paicunaca shujllapash na huañungachu.
Paicunataca, Ñuca mirachishcamanda na yangapi churai tucungachu.
20Paicunapaj huahuacunaca, pundashnallatami miranga.
Paicunaca, Ñuca ñaupajpica alipacha shinlli cangapami tandanajunga.
Paicunata llaquichishpa charishca gentecunataca, tucuillatami llaquichisha” ninmi.
21Mandaj Diosca, cashnatapashmi nin:
“Paicunamandami, shuj mandaj llujshinga.
Chai llujshishpami paicunataca mandanga.
Paitaca, Ñuca ñaupajman shamuchun saquijpimi, Ñucapajman chayamunga.
¿Pita Ñuca ñaupajman shamui ushangayari? ninmi Mandaj Diosca.
22Cangunaca, Ñuca agllashcacunami canguichi.
Ñucapash, cangunapaj Diosmi cani” ninmi.
23Mandaj Dios ninanda fiñarishcapash, ninan huaira jatarinshnami.
Ninan huaira jatarinshnami, na cazuj gentecunataca llaquichishpa tucuchinga.
24Mandaj Dios ninanda fiñarishpa llaquichingapa yarijushcataca,
tucuicunata llaquichishpami pactachinga.
Tucurimui punllacunapimi, chaitaca yachanguichi.
Who We AreWhat We EelieveWhat We Do
2025 by iamachristian.org,Inc All rights reserved.
