1Maquir shuti runapaj churi, Galaad runapaj mirai ayllucunata mandajcunami Moisespajman shamurca. Galaad shuti runaca, Manasés runapaj churi, Josepaj miraimi carca. Paicunami, Israel ayllucunata mandajcunahuan tandanajushpa, Moiseshuan rimangapa shamunajurca.
2Paicunaca cashnami ninajurca:
“Mandaj Diosmi, pipaj urmajta ricushpa, alpata chaupishpa tucuilla Israelcunaman cuchun candaca mandarca. Shinallata, ñucanchi ayllu Zelofehad japina alpatapash, paipaj ushicunaman cuchunmi, Mandaj Diosca candaca mandarca.
3Ashtahuangarin, chai huarmicuna, ñucanchi Israelpurapillata caishuj ayllucunahuan cazarajpica, chai huarmicuna japinajushca alpacunaca, caishuj ayllu Israelcunapajmi tucunga. Shina rurashpaca, ñucanchi taitamanda japinajushca alpacunatamari quichunga.
4Ashtahuangarin, Israelpuracunapaj alpacunata tigrachina huata chayajpica, chai huarmicuna japinajushca alpaca, maijan ayllupurapi chai huarmi cazarashca cajpipash, chai ayllupajmi tucunga. Chashnami ñucanchi taitacunapaj ayllupurapi, chai huarmicuna japinajushca alpacunaca tucuringa” ninajurcami.
5Paicuna shina nijpimi Moisesca, Mandaj Dios mandashcata, Israelcunaman cashna nirca:
“Josepaj mirai ayllucunaca, alitami ninajun.
6Mandaj Diosca, Zelofehad shuti runapaj ushicunamandaca cashnami mandarca: Paicunapaj taitapaj ayllupurahuanga, maijanhuan cashpapash paicuna munashcashna cazarachunlla.
7Shina rurajpimi Israelcunaca, paicuna japinajushca alpacunataca, paicunapaj ayllupurapillata charishpa na chingachinga. Shina rurajpimi chai alpaca, chai ayllumandaca caishuj ayllupajmanga na yalinga.
8Pipaj ushi cashpapash, Israelcunapaj ayllupurapi paicunapaj cachun alpacunata japina cashpaca, paipaj taitapaj ayllupurahuanllatami cazaranga. Israelcunaca, tucuicunallata paicunapaj taitamanda alpacunata japishpa catinajuchunmi, chashna cazaranga.
9Shina rurashpami Israelcunaca, paicuna japinajushca alpacunataca, shuj ayllumanda caishuj ayllumanga na yalichinajunga. Tucui Israel ayllucunallatami, paicunapaj alpacunatallata japishpa catinga” nijurcami.
10Shina nijpimi Zelofehad shuti runapaj ushicunaca, Mandaj Dios imashna Moisesta mandashcashna ruranajurca.
11Shinamandami, Maala, Tirsa, Hogla, Milca, Noa shuticuna Zelofehad runapaj ushicunaca, paicunapaj taitapaj huauquicunapaj churicunahuan cazaranajurca.
12Zelofehad shuti runapaj ushicunaca, paicunapaj taitapaj ayllupuracunahuan cazarajpimi, paicuna japinajushca alpacunaca, Manasés ayllupurapajllata saquirirca. Manasesca, Josepaj churimi carca. Zelofehad shuti runapash, Manasespaj miraipurami carca.
13Cai mandashca shimicunaca, tucui Israelcuna pactachinajuchun Mandaj Dios, Moisesman cushca shimicunami. Caitaca, Jordán yacu manñapi, Jericó pueblo chimbapurapi tiyaj, Moab pambacunapimi curca.
Who We AreWhat We EelieveWhat We Do
2025 by iamachristian.org,Inc All rights reserved.
