1 CORINTIOS 12 - Quichua Imbabura 2016

Diospaj Espiritumi imata rurachumbash ushaita caran

1Juyashca crijcuna, canguna imata rurai ushachumbash, Diospaj Espíritu ushaita caramujujtami yachana canguichi.

2Diosta nara crijcuna cashpaca, rimaitapash na rimajuj, rurashcalla dioscunapajman apai tucushpami, pandashpa causarcanguichi. Chaitaca ña yachanguichimi.

3Maijan cashpapash, Taita Diospaj Espíritu rimachijpi rimajushpaca, Jesustaca na ali shimicunahuanga na rimanllu, ashtahuangarin, Taita Diospaj Espíritu rimachijpi rimajushpaca, “Jesusca ñucata Mandajmi” nijunmi.

4Shuj shuj ushaicunatami caramujun, shina cashpapash, shujlla Diospaj Espiritumi chashna caramujun.

5Shinallata, Diospajta ruranacunapash, shuj shujmi tiyan. Shina cajpipash, shujlla Apunchi Jesusmi.

6Ima ruranapash ashtacami tiyan. Shina cajpipash, Taita Diosllatami tucui imata rurachumbash ushaita caramujun.

7Shinallata, Diosllatami ima ushaitapash caramujun. Chai ushaihuan tucuicunaman alita rurachunmi Espirituca ricuchijun.

8Shina cashpami, Diospaj Espirituca, ali yachajushca shimicunata villachun ushaita caramujun. Shinallata, chai Espiritullatami, ali yachajushca cachun ushaita caramujun.

9Shinallata, caishujmanga, chai Espiritullatami ali crij cachun ushaita caramujun. Caishujmanga, chai Espiritullatami, huañujujcunata alichi ushachun ushaita caramujun.

10Shinallata, shujmanga, pipash na rurai ushanallata rurachun, shujmanga Diosmanda villaj profeta cachun, shujmanga ima espirituta charijta yachai ushachun, shujmanga, shuj shuj rimaicunata rimachun, ashtahuan shujmanga, shuj shuj rimaicunata yalichishpa villai ushachunmi, chai Espiritullata tucuicunaman caramujun.

11Shina cajpimi, Diospaj Espiritullata, Pai imashna munashcashna, imata rurai ushachumbash tucuicunaman ushaita caramujun.

12Gentecunapaj cuerpoca shujlla cashpapash, imatapash ashtacatami charin. Cuerpoca, imatapash ashtacata charishpapash, shujlla cuerpomi. Shinallatami, Cristopash shujlla.

13Ñucanchica, judiocuna cashpa, griegocuna cashpa, gañanguna cashpa, na gañanguna cashpapash, Diospaj shujlla Espiritumanda bautizarishpami, tucuilla shujlla cuerposhnalla canchi. Ñucanchica tucuillami chai Espiritutallata chasquircanchi.

14Shinallata, cuerpoca na shujlla cashpami, ashtacacunata imatapash charin.

15Chaquica: “Na maqui cashcamandaca, na cuerpopajchu cani” nijushpapash, ¿nachu cuerpopajllata canga?

16Shinallata rinripash: “Na ñavi cashcamandaca, na cuerpopajchu cani” nijushpapash, ¿nachu cuerpopajllata canga?

17Tucuilla cuerpo ñavi cashpaca, ¿maipishi rinrica tiyajunman? Tucuilla cuerpo rinri cashpaca, ¿maipishi singaca tiyajunman?

18Ashtahuangarin cunanga, Taita Diosmi cuerpopi ima tiyachumbash, pai munashcashna churashca.

19Cuerpopi imalla tiyashcapash shujlla cajpica, ¿cuerpoca maipishi tiyajunman?

20Ashtahuangarin cunanga cuerpoca, imatapash ashtacata charishpapash, shujlla cuerpomi.

21Ñavica, maquitaca: “Candaca imatapash na mañanachu cani” nitaca na ushangachu. Shinallata umapash, chaquitaca: “Cangunataca imatapash na mañanachu cani” nitaca na ushangachu.

22Ashtahuangarin, imapatapash na rurai ushanallacunashna cuerpopi tiyanajushpapash, paicunami ashtahuan imatapash ruranajun.

23Imapash na yapa alicachi tucushca cuerpopi tiyajujtarami alicachishpa churajunchi. Shinallata, imapash na yapa alicachi tucushca cuerpopi tiyajujtarami ashtahuan alicachishpa taparinchi.

24Ñucanchi cuerpopi imapash ashtahuan ali ricurijcunaca, na yapa taparichun shuyanllu. Ashtahuangarin Taita Diosmi, ñucanchi cuerpopi imapash na ricurijujtapash ashtahuan jatumbi churashca.

25Cuerpopi ima tiyajcunaca, tucuilla shujlla cashpami, imatalla rurana cajpipash caishuj chaishuj pactachinajun.

26Shina cajpimi, cuerpopi tiyajcunamanda shuj nanachijpica, tucuilla paihuan nanachin. Shinallata, shuj alicachi tucujpica, tucuillami paihuan ninanda cushijun.

27Cangunaca, shujllashnalla tandanajushcami canguichi, chaimandami, Cristohuan shujlla cuerpo canguichi.

28Shina cajpimi Taita Diosca, tandanajuj crijpurapica, pundaca apostolcunata, chaipaj catica, profetacunata, chaipaj catica yachachijcunata churashca. Shinallata, pipash na rurai ushanallata rurajcunata, huañujujcunata alichijcunata, shujcunata yanapajcunata, pushajcunata, shuj rimaita rimai ushajcunatapashmi churashca.

29Shina cajpica, ¿tucuillachu apostolcuna? ¿tucuillachu profetacuna? ¿tucuillachu yachachijcuna? ¿tucuillachu, pipash na rurai ushanallata rurajcuna?

30¿Tucuillachu huañujujcunata alichina ushaita charin? ¿tucuillachu shuj rimaita rimajcuna? ¿tucuillachu chai rimashcata yalichishpa villajcuna?

31Cangunaca, Dios carashca ashtahuan ali ushaitami mascana canguichi. Ashtahuangarin cunanga, cai tucuitapash yali ashtahuan alitapachami yachachigrini.