DEUTERONOMIO 12 - Quichua Imbabura 2016

Diospajlla shicanyachishca huasimanda

1Caicunaca, pactachinajuchun cushca tucui mandashca shimicunami. Cangunapaj taitacunata Mandaj Taita Dios, cangunaman carashca llactapi causanajushpa, tucui punllacunapi pactachishpa causajuchun cushcami.

2Canguna japigrijuj llactacunapi causajcuna, paicunapaj rurashcalla dioscunata alicachishpa causanajushca pushtucunataca, tucuillatami tucuchina canguichi. Paicunaca, urcucunapi, lomacunapi, tucuilla fanga junda quiru ucucunapimi chai dioscunata alicachishpa causanajurca.

3Paicunapaj altarcunata urmachishpa, rumi dioscunata faquishpa, Asera shuti huarmi diosman rijchajcunatapash, rupachishpami tucuchina canguichi. Imatapash llagllashpa rurashca paicunapaj dioscunataca tucuillata tucuchishpami, chaicunapaj shuticunataca chingachina canguichi.

4Cangunata Mandaj Taita Diostaca, na paicunashna ruranachu canguichi.

5Ashtahuangarin cangunapaj tucui ayllupuramandami, Paipaj shutita chaipi churangapa, Mandaj Diosca agllanga. Chai pushtuta mascashpami, chaipi alicachingapa rina canguichi.

6Chaimanmi, tucuillata rupachina animalcunatapash, Diosman cushpa huañuchina animalcunatapash, chungamanda shujguta cunatapash, vichai ricuchishpa cuna ofrendatapash, shuj ofrendacunatapash, chaimanmi apana canguichi. Shinallata, punda huachashca huagracunatapash, llamacunatapashmi apana canguichi.

7Chaipimi, cangunata Mandaj Taita Diospaj ñaupajpi cangunapash, cangunapaj ayllucunapash micunguichi. Cangunapaj maquihuan imatalla rurashcacunatapash, cangunata Mandaj Taita Dios bendiciashcamandami ninanda cushijunguichi.

8Cunanbica, tucuicunami ñucanchi munaita rurashpa causanajunchi. Ashtahuangarin chai llactapica, na shinallata rurashpa catinachu canguichi.

9Canguna samachun, cangunata Mandaj Taita Dios carashca llactamanga, cunangaman nara chayashpami purinajunguichi.

10Ashtahuangarin Jordán yacuta chimbashpami, cangunata Mandaj Taita Dios carashca llactaman yaicushpa causanguichi. Chaipica, cangunapaj muyundipi causaj tucui fiñajcunamanda samachijpimi, imatapash na manllashpa causanguichi.

11Cangunata Mandaj Taita Diosllata, Paipaj shutita chaipi churangapa agllashca pushtumanmi, tucui mandashcacunata apana canguichi: Tucuillata rupachina animalcunatapash, Diosman cushpa huañuchina animalcunatapash, chaimanmi apana canguichi. Shinallata, chungamanda shujguta cunatapash, vichai ricuchishpa cuna ofrendatapash, Mandaj Diosman carashami nishca ofrendatapash, chaimanmi apana canguichi.

12Cangunata Mandaj Taita Diospaj ñaupajman apashpami, cangunapaj churicunandi, ushicunandi, cangunapajta ruraj jaricunandi, huarmicunandi, cangunapaj llactapi causaj tucuilla levitacunandi tandanajushpa, cushijuna canguichi. Levitacunaca, cangunapurapica ima alpatapash na charishcamandami chashna rurana canguichi.

13Diosman cushpa tucuillata rupachina animaltaca, na maipipash rupachinallachu canguichi.

14Ashtahuangarin, cangunapaj ayllupuramanda, Mandaj Dios agllashca pushtupillami, tucuillata rupachina canguichi. Chaipimi, tucui ñuca mandashcacunataca pactachina canguichi.

15Shina cashpapash, can munashcashnami, canda Mandaj Taita Dios imashna bendiciashpa carashcashna, canguna causanajuj pueblocunapillata huañuchishpa aichataca micuna canguichi. Chai aichataca, mapa cashpa, na mapa cashpapash, gacela shuti, ciervo shuti animalcunapaj aichata micujshnallata micunallami canguichi.

16Ashtahuangarin yahuartaca, na micunachu canguichi. Yahuartaca, yacutashnami alpapi talina canguichi.

17Can causanajuj pueblocunapica, chungamanda shujguta Diosman cushca granocunatapash, aceitetapash, vinotapash na micunachu canguichi. Shinallata, punda huacharishca huagracunatapash, llamacunatapash, Diosman carashami nishca ofrendatapash, cambaj munaihuan imaguta carashcatapash, vichai ricuchishpa carashca ofrendacunatapash na micunachu canguichi.

18Ashtahuangarin, canda Mandaj Taita Dios agllashca pushtupimi, canda Mandaj Taita Diospaj ñaupajpi micuna canguichi. Chaipica, cambaj churicunandi, ushicunandi, cambajta ruraj jaricunandi, huarmicunandi, cambaj pueblocunapi causanajuj levitacunandi tandanajushpami micuna canguichi. Chashna rurashpami, canda Mandaj Taita Diospaj ñaupajpica, cambaj maquihuan imatalla rurashcamandapash cushijunguichi.

19Cai pachapi can causajui punllacunapi, levitacunataca na jichushpa saquinachu canguichi.

20Canda Mandaj Taita Diosca, pai imashna nishcashnami, cangunapaj alpataca ashtahuan mirachinga. Shina cajpimi: ‘Aichata micungapami munani’ nijushpaca, can munashcata micunalla cangui.

21Canda Mandaj Taita Dios paipaj shutita chaipi churangapa agllashca pushtuca, carupimi canga. Shina cajpica, Mandaj Dios carashca cambaj huagracunata, llamacunataca, Ñuca mandashcashna cambaj huasipillata huañuchishpa, can munashcashna micunguilla.

22Chai aichataca, gacela shuti, ciervo shuti animalpaj aichata micujshnalla micunguilla. Chaitaca mapa cashpa, na mapa cashpapash micunguilla.

23Ashtahuangarin, yahuarpi causai tiyashcamandami, yahuartaca napacha micuna cangui. Shinamandami, aichataca, yahuar illajta micuna cangui.

24Yahuartaca na micunachu cangui, yacutashnami alpapi talina cangui.

25Cambash, cambaj cati huahuacunapash, tucuipi ali causangapami, yahuartaca na micuna cangui. Mandaj Diospaj ñaupajpi aliguta rurashpa causashpami, chashna ali causangui.

26Ashtahuangarin, Mandaj Diosman carangapa shicanyachishcacunata, Diosman carashami nishcacunatapash, paita yarichun agllashca pushtumanmi apashpa shamuna cangui.

27Tucuillata rupachina animalcunataca aichatapash, yahuartapash, canda Mandaj Taita Diospaj altarpimi cuna cangui. Diosman cushpa huañuchishca animalcunapaj yahuartaca, canda Mandaj Diospaj altarpi talishpami aichataca micunalla cangui.

28Ñuca mandashca shimicunataca, cazushpa pactachishpami causana cangui. Canda Mandaj Taita Diospaj ñaupajpica, imatapash aliguta rurashpami, cambash, cambaj cati huahuacunapash, tucui causaipi ali causaita charinguichi.

Rurashcalla dioscunata ama mañachunmi yachachishca

29Canguna japina llactacunapi causajcunataca, cangunata Mandaj Taita Diosca tucuillatami tucuchinga. Chai jipami, cangunaca chai llactapi causanguichi.

30Cangunapaj ñaupajpi paicuna tucuchi tucushca jipa, paicunata catishpa pandarinamandaca anchurinami canguichi. Chai gentecunapaj dioscunamandaca: ‘Imashna chai gentecuna, paicunapaj dioscunata alicachishpa causajshnallata, ñucanchipash chashna rurashunchi’ nishpaca, napacha parlanachu canguichi.

31Chai gentecunaca, paicunapaj dioscunaman millanayaicunata rurashpami, paicunapaj churicunata, ushicunatallata, paicunapaj dioscunaman cushpa rupachinajurca. Chaicunatami, cangunata Mandaj Taita Diosca, ninandapacha millanayachishpa ricun.

32Tucui Ñuca mandashcacunataca, na mirachishpa, anchuchitapash na anchuchishpami, aliguta yarishpa tucuita pactachina canguichi.