EZEQUIEL 38 - Quichua Imbabura 2016

Gog shuti jatun mandajta llaquichinamanda

1Mandaj Diosca cashnami nirca:

2“Huañuna aichayuj runa. Magog shuti llactata ricushpa, Mesec shuti llactatapash, Tubal shuti llactatapash, jatun mandaj Gog shuti runa llaquita apanata” villangui.

3Cashna nishpa villangui: “Mandaj Diosca cashnami nijun: ‘Mesec shuti, Tubal shuti llactacunataca, Gog shuti runami mandajungui. Candaca ninanda fiñashpami llaquichigrini.

4Cambaj quijadapica, garfio jirrucunatami churachisha. Cambaj macanajuj runacunatapash, cambaj caballocunatapash, caballocunapi tiyarishpa macanajuj runacunatapash, jarcarina jatun jirrucunandi, jarcarina uchilla jirrucunandimi, alipacha alichirishca gentecunandimi llujchishpa calpachisha. Tucuilla espadahuan purinajuj gentecunatami, llujchishpa calpachisha.

5Persia, Cus, Fut shuti llactacunamanda macanajuj runacunapashmi canhuanga rinajunga. Paicunaca, jarcarina jirrucunandi, umapi churajushca jirrucunandimi rinajunga.

6Shinallata, Gomer shuti llactamanda, Togarma shuti llactamanda, tucui janajman tiyaj llactacunamanda, ashtaca macanajuj runacunapashmi canhuanga rinajunga.

7Shina cashcamandami cambash, cambaj macanajuj runacunapash alichirina canguichi. Canmi, paicunataca pushangui.

8Cunanmanda ashtaca punllacuna yalijpimi, imata ruranata yachangui. Unai huatacuna jipami, ninanda llaquichi tucushca, espadamanda quishpirishca, llactacunamanda puchushca, Israel llacta urcupi causaj gentecunapajman shamungui. Chai gentecunaca shuj llactacunamanda tigramushca cashpami, imatapash na manllashpa causanajunga.

9Canga ninan huairahuan, tamiashnami shamungui. Cambaj macanajuj runacunapash, canhuan tandanajushca runacunapash, fuyushnami chai llactataca quilpanguichi’ ninmi nishpa villai” nihuarcami.

10Mandaj Jatun Diosca cashnatapashmi nirca: “Chai punllapimi, cambaj shungupica, na ali shimicunata rimana yuyaicunalla tiyanga.

11Chaimandami cashna yuyajungui: ‘Macanajunata na yachaj llactata llaquichingapa vichai rishalla. Imatapash na manllashpa, cushijushpa causajcunata llaquichigrishalla. Paicunaca, muyundi pircacunapash, punguta jarcanacunapash illajmi causanajun.

12Shina cajpimi paicunataca ninanda llaquichishpa quichungui. Paicunaca shuj llactacunamanda tigramushpami, jichushca sirij pambapi cutin alichishpa causanajun. Paicunaca, animalcunatapash, tucuitami ninanda charijyashca. Paicunaca, cai pacha chaupipimi causanajunchi’ yashpami causanajun” yajunguimi.

13Sabá shuti, Dedán shuti llactacunapi causajcunapash, Tarsis pueblomanda randishpa jatuj gentecunapash, tucui mandajcunapashmi, candaca cashna ninajunga: “¿Tucuita charishcata shuhuashpa apangapachu shamurcangui? ¿Culquita, curita, animalcunata charishcacunata, macanajuipi mishashpa quichushcacunata, shuhuashpa apangapachu tandachishpa shamurcangui?” ninajungami.

14Shina cashcamanda, huañuna aichayuj runa. Gog shuti runaman cashna nishpa villai: “Mandaj Jatun Diosca cashnami nin: ‘Chai punllacunapica, Ñuca agllashca Israelcuna, imatapash na manllashpa causanajujtaca’ yachanguimi.

15Cambaj llactamanda gentecunapash, janajman causaj gentecunapash, shinlli macanajuj gentecunalla tandanajushpami, caballocunapi tiyarishpa chayanguichi.

16Ñuca agllashca Israel llacta gentecunata llaquichingapami chai punllapica, fuyushna muyundi quilpamunguichi. Gog shuti runalla, cai llactaman can chashna shamujpimi, Ñucataca jucha illaj cashcata paicuna alipacha yachanajunga. Ñucallatami candaca apamusha” ninmi.

17Mandaj Jatun Diosca cashnami nijun: “¿Nachu Ñucallata, Israelcunaman villaj profetacunata, canmanda villachun punda huatacunallata cachamurcani? Paicunallatami, Israelcunata imashna can shamushpa llaquichinataca villanajurca” nijurcami.

18Mandaj Diosca cashnami nin: “Israel llactata, Gog shuti runa llaquichingapa shamujui huatacunapimi, Ñucapash ninandapacha fiñarisha.

19Chai punllacunapica, Ñuca ninanda fiñarishca cashpami, Israel gentecunataca alpa mamata cuyuchishpa llaquichijusha.

20Mama cuchapi causaj pijicunapash, jahuata purij animalcunapash, sachapi causaj animalcunapash, llucashpa purij culebracunapash, cai pachapi causaj tucui gentecunapash, Ñuca ñaupajpimi llaquita apanajunga. Urcucunapash tuniringami, jarcashca pircacunapash, muyundi jatun pircacunapash, tucuillami urmashpa tucuringa.

21Ñucapaj tucui urcucunamandami, Gog shuti runata huañuchinajuchun espadata cayasha. Mandaj Jatun Dios Ñucami chashna nini. Chaipica paicunapaj espadahuanllatami, huauquipurallata huañuchirinajunga.

22Jatun mandaj Gog runataca, millai ungüihuanmi llaquichisha. Shinallata paipaj macanajuj runacunatapash, paihuan tandanajushca runacunatapash, jahua pachamanda ninanda tamiachimushpa, rundutapash, azufretapash cachamushpami llaquichisha.

23Shina rurajpimi, Ñuca Jatun cashcatapash, jucha illaj cashcatapash tucui llactacuna yachaj chayanga. Chaimandami, Mandaj Dios cajta yachanajunga” ninmi ningui.