1Mandaj Diospaj arcataca, David rurachishca carpapimi, chaupi ucupi churanajurca. Chaipimi Davidca, Diosman animalcunata huañuchishpa tucuillata rupachijurca. Shinallata, Dioshuan ali cangapa shuj ofrendacunatapash ashtahuanmi cararca.
2Diosman cushpa tucuillata rupachinatapash, Paihuan ali cangapa carana ofrendacunatapash carashca jipami, Davidca, Mandaj Diospaj shutipi tucui gentecunata bendiciarca.
3Chai jipami, tucuilla Israel jaricunaman, huarmicunaman shuj mishqui tandata, asha fiti aichata, uvata chaquichishpa rurashca shuj tandata carajurca.
4Davidca, Mandaj Diospaj arca ñaupajpi Diosta yarinajuchun, juchacunata Diosman villanajuchun, Israelcunata Mandaj Taita Diosta alicachinajuchunmi, levitacunata agllashpa churarca.
5Paicunata mandajca, Asaf shuti runami carca. Paipaj catica, Zacariasmi mandajurca. Paicunapaj catica: Jeiel, Semiramot, Jehiel, Matatías, Eliab, Benaía, Obed-edom, Jeiel shuti levitacunami mandanajurca. Paicunami salteriocunata, arpacunata taquinajurca. Ashtahuangarin, Asaf shuti runaca platillocunatami huactajurca.
6Shinallata, Benaía shuti, Jahaziel shuti sacerdotecunapashmi, Taita Dioshuan ari ninajushpa quilcashcata alichishca arca ñaupajpi, trompetacunata punllandi huacachinajurca.
Diosta pashi nishpa candangapa David rurashca Salmomi(Sal. 105:1-15; 96:1-13; 106:47-48)7Davidca, chai punllallatami Asaf runataca, paipaj huauquicunandi, Mandaj Diosman, cashna candanajuchun churarca:
8“Mandaj Diosta ninanda alicachishpa, Paipaj shutipi mañaichi.
Pai imatalla rurashcataca, shuj gentecunaman villaichi.
9Salmocunata, Paiman candaichi.
Pai imatalla juyailla rurashcacunata villaichi.
10Jucha illaj Paipaj shutipi ninanda cushijuichi.
Mandaj Diosta mascajcunaca, tucui shunguhuan cushijuichi.
11Mandaj Diospajman quimirishpa, Paipaj ushaita mascaichi.
Paitaca, punllandi mascaichi.
12Ima juyaillacunata Pai rurashcataca na cungashpa yarichi.
Jatun manllarinacunata rurashcatapash,
Paipaj shimihuan rimashpa llaquichinatapash yarichi.
13Diospajta ruraj Israel runapaj miraicunalla.
Pai agllashca Jacobpaj miraicunami canguichi.
14Mandaj Diosmi, ñucanchi Taita Dios.
Pai rimashca shimicunaca, tucui cai pachapimi uyarijun.
15Pai ari nishcataca, causaita causaicamanmi Paica yarijun.
Huaranga huaranga miraicunaman,
Pai mandashca shimicunatapash na cungashpami yarijun.
16Abrahamman pactachishapacha nishpa ari nishcatapash,
Isaacman juramentushca shimicunatapash na cungashpami yarijun.
17Mandashcata pactachijuchunmi Jacobman curca.
Taita Israelmanmi, causaita causaicaman, ari nirca.
18Paica cashnami nirca: ‘Canaán llactatami canman carasha.
Chaitaca, cambaj cachunmi carasha’ nircami.
19Shuj llactamanda huaquinlla shamushpa,
chai llactapi huaquinlla purinajujpimi, chashna nirca.
20Paicunaca, llactan llactanmi purinajurca.
Shuj llactamandaca, shuj gentecunapajman yalishpami causanajurca.
21Paicunata pipash llaquichishpa charichunga, na saquircachu.
Ashtahuangarin, paicunata juyaimandami, caishuj jatun mandajcunataca llaquichijurca.
22‘Ñuca agllashca mandajcunataca, na tacarinachu canguichi.
Ñucapaj profetacunataca, na llaquichinachu canguichi’ nijurcami.
23Mandaj Diostaca, tucui cai pachapi causajcuna alicachishpa candaichi.
Pai quishpichij cajtaca, punllandi villaichi.
24Pai ninan ushaita charishcataca, gentecunapaj chaupipi candaichi.
Ima juyaillacunata rurashcatapash, tucui llactacunapi villaichi.
25Mandaj Diosca ninan ushaitami charin.
Paitaca ninandami alicachina canguichi.
Paica, rurashca dioscunataca yalipacha, ninan ushaita charij Diosmi.
26Shuj gentecunapaj dioscunaca, rurashcalla dioscunami.
Ashtahuangarin Mandaj Diosmi, jahua pachataca rurarca.
27Paitaca, juyaillaguta candashpami jatunyachina canguichi.
Paipajlla huasipica, juyailla punchapamba, ninan ushaimi ricurin.
28Tucui ayllucunami, Mandaj Diostaca, jatunmi Cangui nina canguichi.
Mandaj Diostami, ninan ushaita charij, punchapambami cangui nina canguichi.
29Mandaj Diostaca, Paipaj shuti ninan jatun cajpimi alicachina canguichi.
Paiman carana ofrendacunatapash, Paipaj ñaupajman apashpa shamuichi.
Mandaj Diostaca, jucha illaj, ninan juyailla cashcamanda Paipaj ñaupajpi cungurichi.
30Paipaj ñaupajpica, tucui cai pachapi causajcuna manllaichi.
Paimi, cai pachataca, ama cuyurichun shinllitapacha churashca.
31Jahua pachapash cushijuichi, cai pachapash ninanda cushijuichi.
‘Mandaj Diosmi mandajun’ nishpa, tucui llactacunapi villaichi.
32Mama cuchapash, chaipi imalla tiyajcunapash, ninanda caparichi.
Pambacunapash, chaipi tucui ima tiyajcunapash, ninanda cushijuichi.
33Shinallata, bosquepi shayanajuj quirucunapash,
Mandaj Diospaj ñaupajpimi candanajunga.
Paica, cai pachata mandangapami shamunga.
34Mandaj Diostaca caparishpa candaichi, Paica alimari.
Pai juyashpa llaquinaca, causaita causaicamanmi canga.
35Cashnatapash nichiyari: ‘Ñucanchita quishpichij Taita Diosmi cangui.
Llactacunapaj chaupicunamanda cacharichishpa quishpichihuayari.
Cambaj jucha illaj shutita villanajungapa,
Canda alicachishpa cushijunajungapa quishpichihuayari.
36Israelcunata Mandaj Taita Diosca, causaita causaicaman alicachi tucushca cachun’ nichiyari” nijurcami.
Shina nijpimi, tucui gentecuna: “Chashna cachun” nishpa, Mandaj Diosta alicachinajurca.
Diospaj arcata ricungapaca levitacunami mingai tucushca37Davidca, Mandaj Dioshuan ari ninajushpa quilcashcata alichishca arcata ricuchunga, Asaf shuti runatami paipaj huauquicunandi saquirca. Punllandi tucuita Diospajta ruranajuchunmi, chai arca ñaupajpi saquirca.
38Shinallata, Obed-edom shuti runatapash, sucta chunga pusaj paipaj huauquicunatapash, Jedutún runapaj churi Obed-edom shuti runatapash, Hosa shuti runatapashmi, pungupi ricuchun saquirca.
39Sacerdote Sadoc runataca, caishuj sacerdotecunandimi, Mandaj Diospaj jatun carpapi, Diospajta rurachun, Gabaón shuti lomapi tiyaj altarpi saquirca.
40Mandaj Diosman punllandi animalcunata cushpa huañuchinajuchun, tucuillata rupachina altarpi, chishipash, tutamandapash animalta Diosman cushpa tucuillata rupachinajuchunmi, chaipi saquirca. Paicunaca, Israelcunata mandashpa Mandaj Dios quilcachishcapi nishcashnami, tucuita rurana carca.
41Paicunahuanga, candachun agllashca Hemán shuti runatapash, Jedutún shuti runatapash, agllashca caishuj runacunatapashmi chaipi saquirca. Mandaj Diospaj juyaica, causaita causaicaman cajpimi, Paita ninanda alicachinajuchun chashna churarca.
42Chai candajcunahuanga, Hemán shuti, Jedutún shuti runacunatami trompetacunata, platillocunata, Taita Diospajlla shuj taquinacunatapash taquichun saquirca. Jedutún runapaj churicunataca, Diospaj carpa pungupi ricuchunmi saquirca.
43Chai jipaca, tucui gentecunami paicunapaj huasiman tigranajurca. Davidpash, paipaj huasi ucupurata bendiciangapami, paipaj huasiman tigrarca.
Who We AreWhat We EelieveWhat We Do
2025 by iamachristian.org,Inc All rights reserved.
