DEUTERONOMIO 1 - Quichua Imbabura 2016

Moisesca, Horeb shuti urcupimi, Mandaj Dios imatalla carasha nishcata, Israelcunaman yarichishca

1Cai shimicunaca, Jordán yacu manñapi, Arabá shuti jichushca pambacunapi cashpa, tucuilla Israelcunaman, Moisés villashcami. Chai pambaca, Puca Cucha chimbapurapi, Parán, Tofel, Labán, Hazerot, Dizahab shuti pueblocunapaj quimiriapillami carca.

2Horeb shuti urcumanda, Seir shuti urcuta rishpa, Cades-barnea shuti puebloman chayangapaca, chunga shuj punllacunata rishpami chayana carca.

3Egiptomanda llujshishcapash, chuscu chunga huata tucujpi, chai huatapaj chunga shuj quilla callari punllapimi cashna tucurca: Israelcuna tucui imatalla ruranajuchun, Mandaj Dios mandashcatami Moisesca paicunaman villajurca.

4Amorreo gentecunata mandaj, Hesbón shuti pueblopi causajuj Sehón shuti runatapash, Edrei shuti, Astarot shuti pueblocunapi causaj, Basán llactata mandaj Og shuti runatapash ña mishashcami carca.

5Jordán yacu chimbaman tiyaj Moab shuti llactapi cashpami, Moisesca cai mandashca shimicunataca villai callarirca:

6“Ñucanchita Mandaj Taita Diosca, Horeb shuti urcupimi cashna nirca: ‘Cangunaca, cai urcupica ñami unaita causashcanguichi.

7Cangunaca, amorreo gentecuna causanajuj urcucunaman, chaipi tiyaj tucui llactacunaman tigrashpa richilla. Chaiman rishpaca, Arabá pambacunapi, urcucunapi, shuj pugru pambacunapi, Neguev shuti jichushca pambacunapi, mama cucha manñacunapi, cananeo gentecuna causanajuj llactacunapi causagrichilla. Shinallata, Líbano llactamanda, Éufrates shuti jatun yacucaman rishpa causagrichilla.

8Ricuichi, chai llactataca Ñucami cangunapaj maquipi churarcani. Chai llactataca, Mandaj Dios Ñucami, cangunapaj ñaupa taita Abrahamman, Isaacman, Jacobman, paicunapaj jipa miraicunamambash carashapachami nishpa juramenturcani’ nircami.

Juezcunata churashcamanda(Éx. 18:13-27)

9Chai huatacunallatami, cangunaman cashna nishpa villarcani: ‘Cangunataca na ñucalla pushai ushanichu.

10Cangunata Mandaj Taita Diosmi, cangunataca ashtacatapacha mirachishca. Shinamandami cunanga, jahua pacha luzerocunashna ashtacapacha canguichi.

11¡Cangunapaj ñaupa taitacunata Mandaj Taita Diosllata, cunan mashna cashcamanda, huaranga huarangacaman ashtahuan mirachipachun! ¡Shinallata Pai imashna nishcashnallata, cangunataca bendiciapachun!

12Cangunapaj tucui llaquicunata, cangunapura fiñanajushca llaquicunataca, ¿imashnata ñucalla ricushpa alichi ushashayari?

13Cangunata mandaj cachun churangapa, cangunapaj ayllupuramanda, alipacha yachajushcacunata, ali yuyaita charijcunata, imata ruranatapash alipacha yachaj runacunata apamuichi’ nircanimi.

14Shina nijpimi cangunaca: ‘Can nishcata ruranaca alipachami’ nircanguichi.

15Shina nijpimi, cangunapaj ayllupuramandaca, alipacha yachajushcacunata, imata ruranatapash alipacha yachaj runacunata agllarcani. Paicunatami, cangunata mandaj cachumbash huaranga runacunata, patsaj runacunata, picha chunga runacunata, chunga runacunata mandaj cachumbash churarcani. Shinallata, cangunapaj ayllucunata ricushpa mandachumbashmi churarcani.

16Shina churashpami cangunapaj juezcunataca, cashna nishpa mandarcani: ‘Ima llaqui tiyajpipash cangunapaj huauquicunataca aligutami uyana canguichi. Maijan runata cashpa, cangunapaj huauquicunata cashpa, shuj llactamanda shamushca runata cashpapash, aliguta uyashpa ricushpami alichina canguichi.

17Ima llaquita ricushpa alichijushpapash, na ñavipi ricushpalla alichinachu canguichi. Charijcunatapash, huajchacunatapash, chashnallatami ali uyashpa ricushpa alichina canguichi. Chashna alichinaca, Taita Diospaj cajpimi, pitapash na manllashpa alichina canguichi. Canguna na alichi ushashcatallami, ñucapajman apamuna canguichi. Chaitaca, ñucami ali uyashpa ricushpa alichisha’ nishpami mandarcani.

18Chai huatacunallatami, canguna tucui imatalla ruranataca mandajurcani.

Chunga ishcai runacuna, pacalla chapangapa rishcamanda(Núm. 13:1-33)

19Horeb shuti urcumanda llujshishpaca, canguna ricushca chai tucui jatun jichushca pambacunatami purircanchi. Ñucanchita Mandaj Taita Dios mandashcashna, amorreo gentecunapaj urcu ñanda shamushpami, Cades-barnea shuti pueblocaman chayamurcanchi.

20Shinamandami cangunataca, cashna nircani: ‘Amorreo gentecunapaj urcumanmi chayamushcanguichi. Cai llactatami, ñucanchita Mandaj Taita Diosca ñucanchiman cararca.

21Ricuichi, cai llactataca cangunata Mandaj Taita Diosmi, cangunaman cararca. Cangunapaj ñaupa taitacunata Mandaj Taita Dios imashna nishcashna, na manllashpa, na shaijushpa vichai rishpa japinguichilla’ nircanimi.

22Shina nijpipash cangunaca, ñucapajman tucuilla shamushpami cashna nihuarcanguichi: ‘Ñucanchita ñaupashpa rishpa llactata rijsichun, runacunata cachashunchi. Paicuna tigramushpami, maijan ñanda ñucanchi vichai rinatapash, maijan pueblocunaman chayanatapash villaj shamunga’ nircanguichimi.

23Shina nishcacunaca ali uyarijpimi, cangunapuramanda chunga ishcai ayllucunamandaca, shuj shuj agllarcani.

24Paicunata cachajpi rishpami, urcuta vichai rishpa, Escol shuti pugru pambaman chayagrirca. Chaiman chayashpami, llactata rijsishpa purinajurca.

25Shina purinajushpa, chai llactapi fucushcacunata ñucanchiman apashpa tigramushpami cashna nishpa villanajurca: ‘Ñucanchita Mandaj Taita Dios, ñucanchiman carashca llactaca alipachamari cashca’ ninajurcami.

26Shina nijpipash vichai ringapaca na munashpami, cangunata Mandaj Taita Dios mandashcatapash na cazurcanguichi.

27Shinallata cangunapaj carpacunapica, cashna nishpami na alicachishpa parlanajurcanguichi: ‘Mandaj Diosca, ñucanchitaca na ricunayachishpami, amorreo gentecunapaj maquipi churashpa tucuchingapa, Egipto llactamandaca llujchimushca.

28¿Ñucanchica, maimanda rina canchiyari? Ñucanchi huauquicunapash cashna nishpa villashpami, ñucanchi shungupi manllaita curca: Chai gentecunaca, ñucanchita yali ashtaca, ninan jatun runacunamari. Chai jatun pueblocunaca, muyundi jatun pircacunahuan jarcashcamari. Shinallata, Anac shuti runapaj miraicunatapashmi, chaipica ricurcanchi ninajurcami’ nircanguichimi.

29Shina ninajujpimi cashna nircani: ‘Na manllarinachu canguichi. Chai runacunataca na manllanachu canguichi.

30Cangunata ñaupashpa rijuj, cangunata Mandaj Taita Diosmi, cangunamandaca macanajunga. Egipto llactapi tucui imatalla cangunapaj ñaupajpi rurashcashnami ruranga.

31Cangunata Mandaj Taita Dios pushamushcatami, jichushca pambapica yacharcanguichi. Shuj taita, paipaj huahuata marcashpa pushamunshna, tucui ñambi huacaichishpa, cai pushtucaman chayachimushcatami ricurcanguichi’ nircanimi.

32Shina nijpipash cangunaca, cangunata Mandaj Taita Diostaca, na crishpami purircanguichi.

33Paimi, carpacunata shayachishpa canguna maipi tiyarinata ricuchingapa, ñanda ñaupashpa rijurca. Tutapica, canguna ñanda richun ninahuan, punllapica, fuyuhuanmi ñaupajurca.

Taita Diosmi, Israelcunataca llaquichishca(Núm. 14:20-35)

34Mandaj Diosca, canguna rimashcata uyashpami, ninanda fiñarishpa cashna nishpa juramenturca:

35‘Paicunapaj ñaupa taitacunaman carashami nishpa juramentushca juyailla llactataca, cai na ali miraicunamandaca maijanllapash na ricungachu.

36Shina cajpipash, Jefone shuti runapaj churi Caleb runami, chai llactataca ricunga. Pai purijushca llactataca, Mandaj Dios Ñucata ali cazushpa catijushcamandami, paimambash, paipaj miraicunamambash carasha’ nircami.

37Cangunamandami Mandaj Diosca, ñucahuambash ninanda fiñarishpa cashna nihuarca: ‘Cambash, chai llactamanga na yaicunguichu.

38Nun shuti runapaj churi Josuemi, cambajta rurashpa purijun. Paimi, chai llactaman yaicunga. Chai llactata, paillata Israelcunaman cuna cashcamandaca, paimanga ali yuyaicunata cuna cangui.

39Cangunaca, cangunapaj jari huahuacunataca, macanajushpa quichushpami apanga yashpami causarcanguichi. Cunanbica alitapash, na alitapash nara yachaj cambaj churicunami, chai llactaman yaicunga. Chai llactata paicunaman cujpimi, paicunapaj cachun japinga.

40Ashtahuangarin cangunaca, Puca Cuchaman rina ñanda catishpa jichushca pambaman tigraichilla’ nihuarcami.

Horma shuti pueblopi mishai tucunajushcamanda(Núm. 14:39-45)

41Shina nijpimi cangunaca, cashna nircanguichi: ‘Ñucanchica, Mandaj Diosta fiñashpami juchata rurashcanchi. Ñucanchica, ñucanchita Mandaj Taita Dios imashna tucuita mandashcashnami, vichai rishpa macanajungapa rishun’ nircanguichimi. Cangunaca, macanajunacunata tucuicuna japishpami, macanajungaj urcuman vichai ringapa alichirircanguichi.

42Chaimandami Mandaj Diosca, cashna nihuarca: ‘Macanajungapaca, na vichai rinachu canguichi. Ñucaca na cangunahuan rishachu. Cangunata fiñajcunahuan ama mishai tucungapami, na rina canguichi ningui’ nihuarcami.

43Chaita cangunaman villajpipash na cazushpami rircanguichi. Ashtahuangarin Mandaj Dios mandashcatapash, jatun tucushpa, na uyangapa munashpami, na cazushpa chai urcuman vichai rircanguichi.

44Ashtahuangarin, chai urcupi causaj amorreo gentecuna cangunata tuparingapa llujshimushpami, millai balun chuspicunashna catinajurca. Seir shuti urcupi mishashpaca, Horma shuti pueblocamanmi cangunataca catirca.

45Shinamandami chaimanda cutin tigramushpaca, Mandaj Diospaj ñaupajpi huacarcanguichi. Ashtahuangarin Mandaj Diosca, canguna huacanajujtaca napacha uyangapa munarcachu.

46Shinamandami cangunaca, Cades shuti pushtupica unaitapacha causarcanguichi.