APOCALIPSIS 11 - Quichua Imbabura 2016

Ishcai villajcunamanda

1Chai jipaca, tupuna varashnalla sucusta cushpami cashna nihuarca: “Jatari, Taita Diospaj huasitapash, altartapash tupugri. Shinallata, Diospaj huasipi, Diosta alicachishpa causajcunatapash yupagri.

2Ashtahuangarin, Diospaj huasi canlla patiotaca, na Israelcunaman cushca cajpimi, na tupuna cangui. Na Israelcunami, Diospajlla pueblotaca, chuscu chunga ishcai quillacaman, yangapi churashpa sarunajunga.

3Ñucamanda ishcai villajcunami, huaranga ishcai patsaj sucta chunga punllacaman, cañamuta churajushpa, ima tucunatapash villanajunga” nihuarcami.

4Chai ishcai villajcunaca, cai pachata mandaj Taita Diospaj ñaupajpi shayanajuj ishcai olivo quirucuna, ishcai candelerocunami.

5Chai ishcaicunata maijambash llaquichingapa munajtaca, paicunapaj shimimanda nina llujshishpami, paicunata fiñajcunataca rupachinga. Maijambash paicunata llaquichingapa munaj runaca, chashnallatami huañunga.

6Dios ima nishcata paicuna villanajui punllacunapi, ama tamiachunmi jahua pachata vichangapapash ushaita charinga. Shinallatami, yacucunata yahuarman tigrachitapash ushanga. Cai pachatapash, shuj shuj llaquicunahuanmi, mashna munashcata llaquichi ushanga.

7Paicuna villaita tucuchijpimi, ninan manllanayai animalca, yana yana ucumanda llujshishpa, paicunahuan macanajunga. Shina macanajushpami, chai villajcunataca mishashpa huañuchinga.

8Chai huañushcacunaca, jatun pueblo plazapimi sirinajunga. Jatun pueblo nishpaca, Sodoma, Egipto llactacunatami chashna nijun. Ñucanchi Apunchi Jesustapash, chaipillatami chacatashpa huañuchirca.

9Shuj gentecuna, shuj ayllucuna, shuj rimaicunata rimajcuna, shuj llactacunapi causajcunami, paicuna huañushcataca, quimsa punlla chaupicaman sirinajujta ricunga. Shina ricushpapash, pambachunga na saquingachu.

10Cai pachapi causajcunaca, paicuna huañushcata ricushpami, ninanda cushijushpa, imatapash paipura cararinajunga. “Chai ishcai profetacunaca, cai pachapi causajcunatami ninanda rimashpa manllachirca” nishpami, chashna cushijunajunga.

11Ashtahuangarin, quimsa punlla chaupi tucujpimi, Taita Dios causaita carajpi, paicunaca cutin causarishpa jatarinajurca. Chaita ricushpami, gentecunaca ninandapacha manllarinajurca.

12Chai ishcai villajcunaca: “Jahuaman vichai shamuichi” nishpa, jahua pachamanda ninanda caparijtami uyarca. Shina uyashpaca, fuyupi jahua pachaman rircallami. Shina rijtaca, paicunata fiñaj gentecunapashmi ricunajurca.

13Paicuna rinajujpillata alpa mama ninanda cuyushpami, chai pueblopi huasicunataca, chungapi chaupishpa, shujtaca tucuilla tucuchirca. Shinallata, alpa mama cuyushpami, canchis huaranga gentecunata huañuchirca. Na chaipi huañujcunaca, ninandapacha manllarishpami, jahua pacha Taita Diosta ninanda alicachinajurca.

14Ishcai llaquicunaca ña yalircami. Ricui, quimsa llaquicunami ña shamujun.

Suctapaj cati trompetamanda

15Suctapaj cati ángel trompetata huacachijpica, jahua pachapi cashna nishpa, ninanda caparinajujtami uyarcani:

“Cai pachapi causajcunaca,

ñucanchi Jatun Diospaj, Jesucristopajmi tucushca.

Jesucristomi, causaita causaicaman mandanga” ninajurcami.

16Taita Diospaj ñaupajpimi, ishcai chunga chuscu rucucunaca, paicuna mandangapa tiyarinapi tiyanajurca. Paicunaca cungurishpa, alpaman chayajta cumurishpami, Taita Diosta ninanda alicachinajurca.

17Paicunaca, cashnami ninajurca:

“Tucui Ushaita Charij, Mandaj Taita Dioslla,

Candami pashi ninajunchi.

Canga, cunambash, Canllatami causajungui.

Pundapash, Canllatami causajurcangui.

Canllatami shamungui.

Ninan ushaita charishpami, tucuita mandai callarishcangui.

18Llactacunapi causajcuna, Canda fiñashpa causanajujpimi,

cunanga Cambash ninanda fiñarishpa llaquichina punlla pactamushca.

Huañushcacunata tapuchishpa, llaquichina punllacunami pactamushca.

Shinallata, Cambajta rurashpa causaj profetacunaman,

Cambajlla causajcunaman,

Canda manllaj uchillacunaman, jatungunamambash,

imata carana cashcata, carana punllacunami pactamushca.

Shinallata, cai pachapi tucui ima tiyashcata huaglichijcunata,

tucuchina punllapashmi pactamushca” ninajurcami.

19Chai jipallami jahua pachapi, Taita Diospaj huasi pungupash pascarirca. Chai huasi ucupica, Dios “ari nishpa” quilcashcata alichishca arcami ricurirca. Shina ricurishpami, punchapamba shitajcunapash, rimanajuicunapash, ninanda culun nishcapash uyarijurca. Shinallata, alpa mamapash ninanda cuyushpami, jatun runducunapash ninanda tamiamujurca.