1Mandaj Diosca, cashnami nirca:
“Tucuicunaman aliguta rurashpa, pactachishpami causana canguichi.
Cangunata quishpichina punllapash,
alitalla rurashpa mandana punllapash ñami chayamujun.
2Tucuita alita pactachin runaca ninanda cushijuchun.
Paicunapaj tucui causaipi ali pactachishpa causajcunami ninanda cushijunga.
Samana punllatapash pactachishpa, na alimandapash anchurishpa causajcunaca ninanda cushijuchun” nircami.
3Shuj llactamanda shamushcacuna, Mandaj Diosta catijushpaca, ama cashna nichun:
“Mandaj Diosca, Pai agllashca gentecunamandaca, ñucata anchuchingami” nishpaca, ama nichun.
Shinallata eunuco runapash: “Ñucami chaquishca yurashna cani” nishpaca, ama nichun.
4Mandaj Diosca, cashnami nin:
“Eunuco runacunapash, samana punllacunata pactachishpami causana.
Shinallata, Ñuca mandashca shimicunatapash aliguta pactachishpami causana.
5Chashna pactachijpimi, Ñuca agllashca pueblopi tiyajuj huasipi, paicunataca chasquisha.
Paicunataca, huahuacunata charij runacunatapash yali ashtahuan jatumbimi churasha.
Shinallata, paicunapaj shuticunapash causaita causaicamanmi alicachi tucushca canga.
6Caru llactamanda shamushcacunapaj churicunapash, Mandaj Diospaj Ñucapajta rurashpami causanga.
Shinallata, Mandaj Dios Ñucata juyaimanda tucuita pactachinajuchun.
Samana punllatapash na yangapi churashpa, ashtahuangarin tucuipi pactachishpa, Ñuca mandashcatapash pactachishpa causachun.
7Chashna causajpica, Ñucapajlla urcuman pushashpami, Ñucata mañana huasipi samachisha.
Animalcunata huañuchishpa, Ñuca altarpi churashpa tucuillata rupachishcatapash chasquishami.
Ñuca huasica, tucui gentecuna Diosta mañana huasimi nishpa rijsishcami canga” nijunmi.
8Tucui llactacunaman calpachi tucushca Israelcunata tandachij Mandaj Diosca, cashnami nijun:
“Ashtahuan shuj llactacunapi causanajun Israelcunatapash tandachimusharami” nijunmi.
9Pambacunapi causaj animalcunapash,
quirucuna junda pambacunapi causaj millai animalcunapash, micushpa tucuchingapa shamuichilla.
10Paicunapaj pirca jahuacunapi chapashpa shayanajuj runacunaca, juizu illaj, ñausacunami.
Paicunaca, na huacaj alcucunashnami ricunajun.
Paicunaca, puñunatallami yali juyanajun.
11Paicunaca, sajsaitapash na sajsashpa micunajuj alcucunashnallami.
Pushajcunapash, imatapash na yachajcunami.
Paicunapaj munashcatalla rurashpami causanajun.
Paicunapajlla, ali cachunmi, imatapash tucuita ruranajun.
12Paicunaca, cashnami ninajun:
“Shamuichi, vinota, sidrata ufiashpa machashunchi.
Caya punllacarin, cunan punllatapash yali, ashtahuan ali punllami canga” ninajunmi.
Who We AreWhat We EelieveWhat We Do
2025 by iamachristian.org,Inc All rights reserved.
