1Mandaj Diosca, cashnami nirca:
“¿Huarmita shitangapa quilcashca fangashna, Israel llactata jichushpa Ñuca saquishca fangaca maipitayari?
Na cashpaca, ¿Ñuca jatujpi cangunata randij runaca maipitayari?
Cangunaca na alicunata rurashcamandami, jatui tucushcanguichi.
Cangunallata na cazushpa causashpami, Israel llactaca jichui tucushcanguichi.
2Ñuca shamushpaca ¿Imashpata pitapash na tuparircani?
¿Imashpata cayajpipash, pipash na tigrachihuarca?
Cangunata quishpichingapaca, ¿ushai illajchu cani?
Cangunata quishpichingapaca, ¿nachu ushaita charini?
Ñucaca, mama cucha yacutapash rimashpallami chaquichini.
Jatun yacu rinajujcunatapash, chaquishca pambaman tigrachinillami.
Chai yacupi tiyaj pijicunapash, yacu illajpica huañushpa tucurinllami.
3Jahua pachatapash, Ñucaca, yana tutatashna ruranillami.
Cañamuta churachinshna quilpanillami” ninmi.
4Mandaj Jatun Diosca, alipacha yachajushca shimicunata rimachunmi ushaita cuhuashca.
Shaijushcacunaman, shinlliyachij shimicunata villachunmi chashna carahuashca.
Punllandimi, alipacha yachajushcacuna rimajta uyangapa causajuni.
5Mandaj Jatun Diosmi, ñuca rinrita pascahuarca.
Chaimandami ñucaca, huashamambash na tigrashpa, paita uyashpa cazurcani.
6Chugrichishpa llaquichinajujpipash saquircanillami.
Ñuca barbasmanda chutanajujpipash ricujurcanillami.
Ñucata t'ucashpa, na alicachishpa rimanajujpipash, saquircanillami.
7Mandaj Jatun Diosmi yanapahuanga, chaimandami na pingai tucusha.
Chaimandami, ñucaca shinlli rumishna cashpa, llaquitaca apajurcanilla.
Napacha pingai tucunataca, yachanipachami.
8Ñucata quishpichij Diosca, ñucahuanmi.
¿Pita, ñucahuan fiñarishpa chimbapurai ushanga?
¿Pita ñucata na ricunayachishpa, juchachishpa rimangapa munan?
Shina cajpica, shamuichi tandanajushunchi.
9Ñucataca, Mandaj Jatun Diosmi yanapahuanga.
¿Pita ñucata juchachishpa, llaquipi churangapa munanga?
Paicunaca churajuna maucayashpa tucurijshnami tucuringa.
Polilla jurumi, micushpa tucuchinga.
10Cangunapuramandaca, ¿maijanda Mandaj Diosta manllashpa causaj tiyanguichi?
Shinallata pita, Paipajta ruraj villashcata uyangapa tiyanguichi?
Shina cashpaca, yana tutapi micha illajshna causajcunaca,
Mandaj Diospaj shutitami yariajlla causana canguichi.
Taita Dios ushaita carajpimi causana canguichi.
11Cangunaca tucuicunami ninata japichinshna, cangunapaj munaita rurashpa purijcuna canguichi.
Canguna imashna causashcashnallata causaichilla.
Ñuca ninan ushaihuan llaquichijpimi paicunaca huañushpa pambai tucunajunga.
Who We AreWhat We EelieveWhat We Do
2025 by iamachristian.org,Inc All rights reserved.
